Iˉsaˍreˍlaˆ chaw lehˬ daꞈ kehˬ ve chaw gʼa hpehꞈ ve tehꞈ Yaˬhoˉvaˬ kʼoˆ piˇ ve yoˬ. Hkʼe te leh, Gʼuiˬ sha yawˇ hui htaꞈ kʼoˆ piˇ ve, ‘chaw teˇ gʼaˇ ve awˬ lawn maˇ heˆ heˆ ve taˇ kʼoˆ. Chaw teˇ gʼaˇ gʼaˇ htaꞈ suhˉ taˇ taˆ piˇ. Ngaˬ lehˬ Yaˬhoˉvaˬ hpehꞈ ve yoˬ.’—Oˉ kʼoˍ pui ve 19:2, 16.

Chaw teˇ gʼaˇ gʼaˇ htaꞈ suhˉ taˇ taˆ piˇ, chi lehˬ hkʼaˬ hkʼe kʼoˆ gaˇ ve le? Yuˇdaꞈ chaw ve liꞈ kʼoˆ teˇ kʼoˆ Oˉ kʼoˍ pui ve liꞈ htaꞈ caˉ daꞈ ve hkʼaw kʼoˆ ve, “Heˍbrehˇ hkawˇ tawˇ hkawˇ chi ve hteˇ˗ehˬ kʼoˆ ve kʼo, hteˇ˗ehˬ huˉ taˍ ve, maˇ heˆ leh awˬ paˇ lo huˉ taˍ ve, chi hkʼe kʼoˆ ve pa taw na gʼa haˍ jaˇ. Hkʼe te leh, tcuhˉ kuiˬ hkʼaˬ hkʼe kʼoˆ gaˇ ve ngaˬ hui maˇ shiˍ.”

Cuˇ yiˍ cawˬ paˍ kʼoˆ ve, tawˇ hkawˇ chi ve lehˬ kaˇ nanˉ ehˉ 15 htaꞈ hawˍ daꞈ ve yoˬ. Oˇ kaˬ lo kʼoˆ ve, “suhˉ jehˬ suhˉ taˆ piˇ kuiˬ lo hteˇ lehˍ cawˇ lehˍ te˗o. Haˍ gʼawˇ ve chaw hui htaꞈ hkʼa mvuhˇ hkʼa na taˇ te. Paw sha ve chaw htaꞈ taˇ kawˆ.” (Oˉ kʼoˍ pui ve 19:15) Chi hkʼe hpehꞈ ve kʼo, kaˇ nanˉ ehˉ 16 hkʼaw Heˍbrehˇ hkawˇ hteˇ˗ehˬ kʼoˆ ve kʼo, hteˇ˗ehˬ huˉ taˍ ve, maˇ heˆ leh awˬ paˇ lo huˉ taˍ ve lehˬ, Iˉsaˍreˍlaˆ chaw shaˉ nanˉ hkʼaw suhˉ jehˬ htaˇ maˇ hteˇ maˇ cawˇ ve maˇ heˆ leh yehˬ kʼa hkʼaw tanˇ kaˬ te htaˇ kaꞈ maˇ hteˇ maˇ cawˇ ve maˇ gʼa te ve htaꞈ kʼoˆ gaˇ ve yoˬ. Chi hkʼoˆ kaꞈ, yawˇ hui a shu yawˇ awˬ pon tiˉ maˇ dawˇ nyi leh shu htaꞈ kaꞈ maˇ gʼa heˍ caˇ. Ngaˬ hui kaꞈ chi hkʼe maˇ gʼa te cawˇ. Kaˇ nanˉ ehˉ 16 htaꞈ caˉ daꞈ ve kʼawꞈ kʼoˆ maˍ laˇ taˍ ve htaꞈ teˇ geh nyi sheˍ.

Kaˇ nanˉ ehˉ 16 tanˬ htaˇ ve htaꞈ teˇ geh nyi sheˍ. Iˉsaˍreˍlaˆ chaw teˇ gʼaˇ ve awˬ lawn maˇ heˆ heˆ ve taˇ kʼoˆ tehꞈ Yaˬhoˉvaˬ kʼoˆ piˇ taˍ ve yoˬ. Shu htaꞈ hkʼaiˉ ve lehˬ, shoꞈ shaꞈ ve laiˉ ceuˬ cawˬ la gʼa ve htawˇ, chaw teˇ gʼaˇ ve awˬ lawn maˇ heˆ heˆ kʼoˆ ve lehˬ chi ve aꞈ kehˉ kaꞈ haiˬ jaˇ. (Tawˇ naˉ ve 10:19; Cuˇ yiˍ piˇ ve 10:12-14; 1 Tiˆmoˉseˍ 5:11-15; Yaˍkoˆ 3:6) Chaw teˇ gʼaˇ ve awˬ lawn maˇ heˆ heˆ kʼoˆ ve lehˬ, yawˇ ve awˬ meh luˬ tuˬ te piˇ ve yoˬ. Chaw teˇ gʼaˇ ve awˬ lawn maˇ heˆ heˆ kʼoˆ ve chaw lehˬ, oˇ ve teˇ gʼaˇ htaꞈ caˉ daꞈ ve awˬ tehˬ maˇ heˆ ve kʼoˆ leh oˇ ve teˇ gʼaˇ htaꞈ suh tuˬ kaꞈ te piˇ ve yoˬ. Naˍboˆ ve awˬ lawn htaꞈ teˇ geh nyi sheˍ. Awˬ nu ve chaw yawˇ htaꞈ maˇ heˆ heˆ kʼoˆ leh awˬ leh meuˇ htaˇ yawˇ htaꞈ haˉ pui baˬ pehˍ piˇ ve yoˬ. (1 Jawˇmawˇ 21:8-13) Oˉ kʼoˍ pui ve liꞈ 19:16 hkʼaw kʼoˆ taˍ ve hkʼe, chaw teˇ gʼaˇ ve awˬ lawn maˇ heˆ heˆ kʼoˆ ve lehˬ, yawˇ htaꞈ suhˉ taˆ piˇ ve hkʼe hpehꞈ ve tehꞈ ngaˬ hui gʼa mawˬ ve yoˬ.

Chi hkʼoˆ kaꞈ, oˇ ve teˇ gʼaˇ htaꞈ nyi bawˬ ve pa taw, shu ve awˬ lawn maˇ heˆ heˆ ca kʼoˆ ve yoˬ. 1 Yoˇhanˬ liꞈ 3:15 hkʼaw kʼoˆ ve, “a shu yawˇ ve awˬ viˉ awˬ nyi htaꞈ canˇ ve chaw teˇ gʼaˇ le le lehˬ, chaw htaꞈ tiˇ pehˍ shehˍ hpaˇ hpehꞈ ve yoˬ. Chaw htaꞈ tiˇ pehˍ shehˍ hpaˇ hkʼaˬ ve teˇ gʼaˇ maˇ kʼoˆ, yawˇ awˬ hkʼaw lo co tiꞈ ha tiꞈ maˇ cawˬ ve htaꞈ nawˬ hui shiˍ ve yoˬ.” Chi ve lehˬ kaˇ nanˉ ehˉ 17 hkʼaw Yaˬhoˉvaˬ kʼoˆ taˍ ve htaꞈ hawˍ daꞈ ve yoˬ. Yawˇ kʼoˆ ve, “chaw teˇ gʼaˇ htaꞈ kaꞈ nawˬ maˇ gʼa canˇ.”—Oˉ kʼoˍ pui ve 19:17.

Oˉ kʼoˍ pui ve liꞈ 19:16 hkʼaw Hkriꞈ yaˇ teˇ gʼaˇ le le htaꞈ shaˍ tiꞈ peꞈ laˇ ve tawˇ cawˬ ve yoˬ. Ngaˬ hui chaw teˇ gʼaˇ gʼaˇ htaꞈ maˇ daꞈ ve awˬ lawn leh maˇ heˆ heˆ ve kaꞈ maˇ gʼa kʼoˆ. Ngaˬ hui chaw teˇ gʼaˇ gʼaˇ htaꞈ maˇ dawˇ cawˇ leh hkawehˉ ve kʼo, ngaˬ hui yawˇ ve awˬ lawn maˇ heˆ heˆ ve kʼoˆ leh ngaˬ hui yawˇ htaꞈ nyi bawˬ ve tehꞈ kʼoˆ gaˇ ve yoˬ. Hkriꞈ yaˇ teˇ gʼaˇ le le chi hkʼe maˇ te cawˇ.—Maꞈhtehˍ 12:36, 37.