Jehová kiniljuik israeleuanij monekiyaya elisej tlatsejtseloltikej. Yeka kinmakak ni tlanauatili: “Amo xikijilnamiki se tlakatl [...]. Amo xijteiljui se tlakatl ika se tlamantli tlen axmelauak pampa tijneki ma miki. Na niinmoTeko tlen niinmechiljuia” (Lev. 19:2, 16).

Nopa tlajtoli “amo xijteiljui se tlakatl” kuali kiixtoma tlake kiijtosneki ika tlajtoli hebreo. Uan, ¿tlake kiijtosneki? Se amochtli judío kej ni kiijtoua tlen nopa Levítico: “Ni versículo ouij tijkuamachilis tlake nelnelia kineki kiijtos pampa ika hebreo kiijtosneki ‘amo timoketstos inechka o tiitstos inakastla’”.

Se keskij ixtlamatinij kiijtouaj nopa tlajtoli mouika ika nopa versículo 15, kampa kiijtoua: “Se tlen tekitiketl moneki tetlajtolsenkauas xitlauak. Axmakichikoikneli tlen teikneltsi, niyon tlen rico o tlen ueyi. Nochi moneki ma kinchiuili sanse” (Lev. 19:15). Tlaj kiampa eliskia, uajka kema kiijtoua versículo 16 “amo xijteiljui se tlakatl”, uelis kineki kiijtos israeleuanij amo kinamikiskia kichiuasej tlen amo xitlauak kema tetlajtolsenkauasej, kej kitlanisej tomij uan ika ininchampoyouaj. Nojkia, amo kinamikiyaya tlakajkayauasej o kichiuasej san tlen kinpaleuiskia. Maske tijmatij amo kinamiki kiampa tijchiuasej, onka seyok tlamantli tlen techpaleuia tijkuamachilisej versículo 16.

Ma tikitakaj kampa peua nopa versículo. Jehová kiniljuik israeleuanij amo ma teistlakauijtinemikaj. Ma tikilnamikikaj kema se akajya teistlakauia amo eli sanse kej kema se akajya teijilnamiki. Maske amo sanse, nojkia uelis kichiuas ma tlaijiyouikaj sekinok (Prov. 10:19; Ecl. 10:12-14; 1 Tim. 5:11-15; Sant. 3:6). Katli teistlakauia kichiua pampa amo kineki kuali ma kiitakaj se akajya, uan kiampa kichiuas maske ueliskia mikis katli kiistlakauia. Kiampa kipanok Nabot. Se keskij tlakamej kiijtojkej tlen amo melauak, yeka kimiktijkej maske amo kichijtoya tlen amo kuali (1 Rey. 21:8-13). Uajka, kej kiijtoua kampa tlami versículo 16, kema se akajya teistlakauia uelis kichiuas ma miki se maseuali.

Nojkia, kema se akajya teistlakauia kichiua pampa tekualankaita. Ipan 1 Juan 3:15 kiijtoua: “Ajkeya kikokolia iikni ipan Cristo itstok keja se temiktijketl. Uan inkimatij se temiktijketl axkipia yolistli tlen yankuik para nochipa”. Maske Jehová ya kinmakatoya nopa tlanauatili tlen kiijtoua ipan Levítico 19:16, nojua kiniljuik: “Amo xijkokoli seyok ipan moyolo” (Lev. 19:17).

Uajka, nopa tlanauatili tlen kiijtoua Levítico 19:16 techmachtia se tlamantli tlen tlauel ipati: amo kinamiki timoiljuisej tlen amo kuali uan amo titeistlakauisej. Tlaj tikistlakauiaj se akajya pampa amo tikitasnekij o tijnekij tijpiasej tlen kipia, tijnextiaj tijkualankaitaj. ¡Tlauel amo kuali tlaj kiampa tijchiuaskiaj! (Mat. 12:36, 37).