Jiova kiniluij israelitas ke monekia yeskij yektikej. Yejua ika kinmakak nejin tanauatil: “Amo xikintakajkayauilijtinemi akin nemij itech moxolal. Amo ximoajokui para tikijtakos mokniuj. Nejua niJiova” (Lev. 19:2, 16).

Tajtolmej “amo ximoajokui para tikijtakos” kuali kiteajsikamatiltia tein kijtosnekia itech tajtol hebreo. ¿Toni kijtosnekij nejin tajtolmej? Se amatajkuilol judío tein ika tajtoua Levítico kijtoua: “Ouij tekisa se kimelauas nejin tajtolmej porin amo se kiyekmati toni senkis kijtosnekia itech tajtol hebreo, tein mokepa kemej ‘amo se ijkatos ompakauin oso inakastan’”.

Seki tamatinij kinemiliaj ke nejin tajtolmej mouikaj ika versículo 15, tein kijtoua: “Amo xikchiuakan tein amo kuali keman nantamelauaskej. Amo xikpaleuikan aksa sayoj porin kipanoua tatasojtilis nion okachi xikpaleuikan aksa sayoj porin tominpia. Xitamelauakan kemej kinamiki” (Lev. 19:15). Komo melauj yeskia nejon, tanauatil “Amo ximoajokui para tikijtakos mokniuj” ueliskia moajsikamatis ke israelitas amo monekia kichiuaskej tein amo kuali keman tamelauaskiaj, itech tanamakalis oso iniuan ininchankauan. Uan amo no monekia takajkayauaskej. Ipa amo moneki se kichiuas nejon, sayoj ke moajsi okse taman kemej okachi kinamiki se kiajsikamatis tein kijtoua versículo 16.

Itech nejin versículo, Dios yekinika kiniluij israelitas maj amo tetakajkayauilijtinemikan. Melauj ke amo kuali yetok maj ininka se tajtojtinemi oksekin, porin uelis kichiuas maj onka kuejmolmej. Sayoj ke okachi amo kuali yetok maj se tetakajkayauili (Prov. 10:19; Ecl. 10:12-14; 1 Tim. 5:11-15; Sant. 3:6). Miakpa, akin kitakajkayauilia aksa, kichiua porin kitemoua maj amo kuali kiitakanok. Xa kijtos teisa tein amo melauj, maski nejon uelis kichiuas maj momikili akin kitakajkayauilij. Yejua nejon kipanok Nabot. Seki takamej kitakajkayauilijkej, uan nejon kichiuak maj kitetemanij hasta ke kimiktijkej (1 Rey. 21:8-13). Yejua ika, keman aksa tetakajkayauilia ‘moajokui para kijtakos’ se taltikpaknenkej, ijkon kemej kisentoka kijtoua Levítico 19:16.

Uan no, se taltikpaknenkej xa kitakajkayauilia aksa porin kitauelita. Itech 1 Juan 3:15 moijtoua: “Nochi nekes ten kitauelitaj ninikniu, yejuan nojonkes temiktiani ya. Uan ijkon namejuan kuali nankimatokke ya ke in temiktiani amo uelis kipiaske [...] nemilis ten amo keman tamis”. Satepan ke Jiova kijtoj “Amo ximoajokui para tikijtakos mokniuj”, no kijtoj: “Amo xiktauelita mokniuj” (Lev. 19:17).

Yejua ika, tanauatil tein moajsi itech Levítico 19:16 kinnejmachtia nochin itekitikauan Dios. Moneki amo tiknemiliskej tein amo kuali uan maj amo keman titetakajkayauilikan. Komo timoajokuij para tikijtakoskej aksa, tein kijtosneki, komo tiktakajkayauiliaj porin amo tikyekitaj oso porin tiknexikoluiaj, nejon kinextiskia ke tiktauelitaj. Uan se itekitikauj Dios amo moneki tetauelitas (Mat. 12:36, 37).