UJehova watshela ama-Israyeli ukuthi abe ngcwele. Waphinda wawatshela okunye okwakuzawenza abe ngcwele. Wathi: “Lingahambahambi linyeya kwabakini. Ungenzi lutho olulimaza umakhelwane wakho. Mina yimi uJehova.”—Levi. 19:2, 16.

Umutsho wesiHebheru ohunyutshwe ngokuthi “ungenzi lutho olulimaza” ungahunyutshwa langokuthi “ungasukumi umelana.” Utshoni umutsho lo? Elinye ibhuku elichasisa uLevi lithi: ‘Akulula ukuzwisisa amazwi la ngoba kunzima ukwazi okutshiwo yisitsho sesiHebheru [esitholakala lapha].’

Ezinye izikhwicamfundo zicabanga ukuthi umutsho lo uhambelana lalokho okutshiwo kuvesi 15 othi: “Lingawutshili umthetho; lingabandlululi umyanga kumbe litshengise ukukhetha abakhulu, kodwa lahlulele umakhelwane wenu ngokulunga.” (Levi. 19:15) Nxa kunjalo, umlayo okuvesi 16 othi “ungasukumi umelana” lomunye wakho wawungabe usitsho ukuthi abantu bakaNkulunkulu kwakungamelanga baphathe kubi abanye emthethwandaba, kwezamabhizimusi kumbe emulini. Kanti njalo kwakungamelanga benze ubuqili ukuze bathole okuthile. Khona akumelanga sizenze sibili izinto lezi. Kodwa kulendlela engcono esingachasisa ngayo amazwi la akuvesi 16.

Emazwini okuqala evesi le, uNkulunkulu walaya abantu bakhe ukuthi bangahambi benyeya kumbe benyundela abanye. Umuntu onyeyayo angabangela ukuthi kube lenhlupho sibili. Kodwa onyundela abanye udala umonakalo omkhulu. (Zaga. 10:19; UmTshu. 10:12-14; 1 Tim. 5:11-15; Jak. 3:6) Izikhathi ezinengi umnyundeli ukhuluma amanga esenzela ukuthi omunye umuntu akhanye emubi. Angafakaza amanga ngomunye umuntu lanxa lokho kungafaka impilo yalowomuntu engozini. Khumbula ukuthi abanyundeli bafakaza amanga ngoNabothi futhi lokhu kwabangela ukuthi akhandwe ngamatshe lanxa wayengelacala. (1 AmaKho. 21:8-13) Yikho ngokwalokho okutshiwo kuLevi 19:16, umnyundeli wayengasukuma amelane lokuphila komunye ngokubangela ukuthi abulawe.

Kanti njalo umuntu anganyundela omunye ngenxa yokuthi uyamzonda. U-1 Johane 3:15 uthi: “Wonke umuntu ozonda umfowabo ungumbulali njalo liyakwazi ukuthi ukuphila okungapheliyo kakuqhubeki kusemuntwini ongumbulali.” Yikho akumangalisi ukuthi ngemva kokutsho amazwi akuvesi 16, uNkulunkulu waqhubeka wathi: ‘Ungamzondi umfowenu enhliziyweni yakho.’—Levi. 19:17.

Ngakho amaKhristu athola iseluleko esilamandla emazwini akuLevi 19:16. Kumele silwisane lemicabango emibi esingaba layo ngomunye umuntu futhi singaqali ukumnyundela. Nxa ‘singasukuma simelane’ lomunye umuntu, okutsho ukumnyundela ngenxa yokuthi asimthandi kumbe silomona ngaye, siyabe sitshengisa ukuthi siyamzonda. AmaKhristu akumelanga azonde muntu loba sekutheni.—Mat. 12:36, 37.