Jehofa o ile a botša Baisiraele gore e be ba bakgethwa. Ka ge a be a nyaka go ba thuša gore e dule e le ba bakgethwa o ile a ba botša gore: “O se ke wa sepela mo bathong ba geno o tšama o thomeletša. O se ke wa bea madi a wa geno kotsing. Ke nna Jehofa.”​—Lef. 19:2, 16.

Polelwana yeo e rego “o se ke wa bea wa geno kotsing” e fetoletšwe gabotse go tšwa dingwalweng tša mathomo tša Seheberu. Eupša e ra gore’ng? Puku e nngwe ya Sejuda yeo e bolelago ka Lefitiko e re: “Mantšu a temana ye . . . a thata go a hlalosa ka gobane ga go bonolo go a kwešiša gore a ra gore eng ka Seheberu. Ge re a fetolela lentšu ka lentšu a ra gorei, ‘o se ke wa ema kgauswi.’”

Diithuti tše dingwe di nagana gore mantšu a re boletšego ka ona a swana le temana yeo e rego: “Le se ke la hloka toka ge le ahlola. Le se ke la swara mmotlana ka go beba sefahlego, le gona le se ke la šia sefahlego sa motho yo mogolo setšhabeng. Le ahlole mogagabo lena ka toka.” (Lef. 19:15) Ge e ba ka nnete mantšu ao a sepedišana le temana ye, seo se bolela gore molao wo o lego go temana 16 woo o rego o se ke wa bea yo mongwe kotsing o ka bolela gore batho ba Modimo ba be ba se ba swanela go dira selo seo se bego se ka bea maphelo a ba bangwe kotsing. E ka ba kgorong ya tsheko, ge ba swaragane le molato wa mabapi le tša kgwebo goba ge ba rarolla mathata a lapa. Le gona ba be ba se ba swanela go dira dilo gore ba ikhole. Ke nnete gore ga se ra swanela go dira dilo tše, eupša go na le tsela e nngwe yeo e ka re thušago gore re kwešiše mantšu ao a lego go temana 16.

Nagana ka mantšu a mathomo go temana 16. Modimo o ile a laela batho ba gagwe gore ga se ba swanela go tšama ba thomeletša batho ba bangwe. Ke nnete gore ge motho a seba batho ba bangwe a ka ba bakela mathata, eupša ge a ba thomeletša, a ka bea maphelo a bona kotsing. (Die. 10:19; Mmo. 10:12-14; 1 Tim. 5:11-15; Jak. 3:6) Gantši motho yo a thomeletšago batho ba bangwe o bolela maaka ka bona ka boomo gore a ba senye leina. E bile a ka bolela le dilo tšeo di ka beago maphelo a bona kotsing. Nagana ka banna bao ba ilego ba bolela maaka ka Nabothe, moo mafelelong a ilego a kgatlwa ka maswika. (1 Dikg. 21:8-13) Go ya ka lengwalo la Lefitiko 19:16, motho yo a thomeletšago a ka bea maphelo a batho ba bangwe kotsing.

Le gona, motho yo a thomeletšago motho yo mongwe a ka dira seo ka gobane a mo hloile. Johane wa Pele 3:15 e re: “Yo mongwe le yo mongwe yo a hloilego ngwanabo ke mmolai gomme le tseba gore ga go mmolai wa batho yo bophelo bjo bo sa felego bo dutšego go yena.” Ka morago ga gore Modimo a bolele mantšu ao a lego go Lefitiko 19:16 o ile a bolela gore: “O se ke wa hloya ngwaneno ka pelong ya gago.”—Lef. 19:17.

Mantšu a ao a sa tlwaelegago ao a lego go Lefitiko 19:16 a bohlokwa kudu go Bakriste. Ga se ra swanela go bolela dilo tše mpe ka motho yo mongwe le go mo thomeletša. Ge e ba re ka ‘bea motho yo mongwe kotsing’ ka go mo thomeletša ka gobane re mo swaretše sekgopi, seo se tla be se bontšha gore re mo hloile. Bakriste ga se ba swanela go dira seo.​—Mat. 12:36, 37.