Ingganggan nen Jehova ed saray Israelita ya nepeg a magmaliw iran masanto. Pian nagawaan da itan, oniay sakey ed saray imbilin tod sikara: “Agkayo onliliber ed saray kabaleyan yo pian mangikayat na panagpauges. Agyo ipepeligro so bilay na kapara yon too. Siak si Jehova.”—Lev. 19:2, 16.

Diad lenguahen Hebreo, saray salitan, “Agyo ipepeligro so bilay na kapara yon too” et literal ya mankabaliksan na “agka onaalagey sumpa ed dala” na kaparam ya too. Antoy labay ya ibaga na satan? Oniay imbaga na sakey ya reperensya: “Mairap ya talosan iyan parte na sayan bersikulo ta aliwan malinew so labay ya ibaga na samay salita ya say literal ya kabaliksan to et ‘agka onaalagey, agka onaabay, agka onaasingger.’”

Ibabaga na arum ya scholar na Biblia ya walay koneksion na saya ed bersikulo 15 ya ditan et oniay nabasa tayo: “Nepeg a makatunongan so pangukom yo. Agyo pipilaan so mairap-bilay odino papaboran so mayaman. Nepeg yon ukomen so kapara yon too unong ed inkahustisya.” No duga so iisipen na sarayan scholar, nayarin say labay ya ibaga na bersikulo 16 et nepeg ya patas ed amin iray Israelita—balanglan diad korte, negosyo, o diad pamilya. Say sakey ya Israelita et agnepeg ya mansaol parad sarili ton kapakanan. Tua met ya agtayo dapat gagawaen iratan. Pero, walay mas dugan pakatalos ed ganggan ya walad bersikulo 16.

Diad unonan parte na satan ya bersikulo, ingganggan na Dios iray Israelita ya ag-ira mangikakayat na panagpauges. Aliwliway resulta no i-tsismis moy sakey ya too. Pero mas grabe so epekto na panagpauges nen say tsismis. (Pro. 10:19; Ecl. 10:12-14; 1 Tim. 5:11-15; Sant. 3:6) No say sakey et paugesen toy arum, gagalaen toy mangikayat na tila pian naderal so reputasyon da. Singa bilang, ompan sikatoy mantestigo ed korte sumpad sakey ya too, pero puro katilaan so ibaga to anggano amta to ya manresulta itan ed ipatey to may too! Ontan so ginawa na saramay lalaki ya nantestigo sumpad si Nabot. Lapud impantila ra, tinutupak na totoo si Nabot ya anggad inatey. (1 Ara. 21:8-13) On, say sakey ya managpauges et ipepeligro toy bilay na kapara ton too ya singa abitla ed komaduan parte na Levitico 19:16.

Ontan met, say managpauges et kabusol to may toon papaugesen to. Oniay nabasa ed 1 Juan 3:15: “Balang sakey a mamubusol ed agi to et sakey a managpatey, tan amta yo ya anggapoy managpatey a nawalaan na bilay ya andi-anggaan.” Kampegan oniay nabasa tayon ganggan kayari na Levitico 19:16: “Agyo nepeg a busolen so agi yo diad puso yo.”—Lev. 19:17.

Samay ganggan sirin ya walad Levitico 19:16 et nepeg ya seryosoen na saray Kristiano. Agtayo papaugesen so arum odino manisip na mauges ed kapara tayon too. Ta no ontan so gawaen tayo, ‘ipepeligro tayoy bilay to,’ tan labay ton ibaga, walay pambusol ed puso tayo. Agtayon balot labay ya gawaen itan!—Mat. 12:36, 37.