Yehowa wawambelele enya Isalele egi adi naye gukhala athu a gijila. Ha guakuatesa ha gukhala athu a gijila, waawambelele egi: ‘Umbilago akuaku’aye mambo. Ukambigo gushiyisa phangi’aye. Ame Yehowa Nzambi waye.’—Levi 19:2, 16.

Mbimbi jia Hebelu jiabalumuiwe egi ‘Ukambigo gushiyisa muthu’ jidi mukotelesa itshi? Mukunda umoshi wa enya Yuda wana zuelela mukanda wa Levi udi muzuela egi: “Gitshinyi gia verse eyi . . . giakhala lamba ha gubalumuna handaga mbimbi jia Hebelu akalegele mu verse yene jiazuelewe mu ishima.”

Enya ndunge ako ana zuela egi mbimbi jidi mu verse eyi jiana gudivua nu ndaga jidi mu verse 15. Verse yene idi muzuela egi: ‘Sophesenu milonga ya athu nu giamatshidia giagasue. Unginyilago muenya umonyi ha gufuisa phutu milonga. Sophesenu milonga ya aphangi’enu nu giamatshidia giagasue.’ (Levi 19:15) Gula idi ngenyi, yajiya gukhala egi mukhuala udi mu verse 16 wakhalele mutunyisa “gushiyisa muthu,” wakhalele mukotelesa egi enya Isalele akhalelego naye gutshita ndaga ishigo gudivua nu mukhuala mu mingenda nu mu fami jiawo. Akhalelego naye nji guhuiga athu ako ha gukamba gubonga guawo. Idi yadiago egi tushigo naye gutshita ndaga eji, uvi gudi nu ndaga yajiya gutukuatesa ha gukotelesa verse 16 muabonga.

Tutadilenu mbimbi jia gisendeselo jia verse yene. Nzambi wahanele akombeledi enji mukhuala egi ashigo naye gumbila athu ako mambo. Idi yadiago egi gula muthu wakhala nu khadilo dia gufeta athu ako, yajiya nji guzola nguma. Uvi gula muthu wana mbila athu ako mambo, idi diago ndaga yabola. (Ish. 10:19; Mulo. 10:12-14; 1 Tim. 5:11-15; Yak. 3:6) Muthu wakhala nu khadilo dia gumbila athu ako mambo, wana bolesa lukuma luawo. Wajiya nji guta uthemua wa mambo ngatshima ndaga yazuedi muene yajiya gubatele athu gufua. Ha gufezagesa, muthu mumoshi wambidile Nabota mambo. Hene athu asonuene Nabota maseso. (1 Maf. 21:8-13) Yadiago, gula muthu udi nu khadilo dia gumbila athu ako mambo, wajiya gushiyisa muthu muko gifua luholo gitshinyi gia mbadi gia Levi 19:16 gidi guyimonesa.

Muthu wajiya gumbila muthu muko mambo handaga ganago gumuzumba. 1 Yone 3:15 idi muzuela egi: ‘Muthu wagasue udi nu umbalagaji nu phangi’enji udi mushiyi wa athu. Mudi mujiya muabonga egi gushigo nga muthu mumoshi wana shiya athu mbawuheta monyo wa ivo nu ivo.’ Tangua Nzambi wazuelele ndaga jidi mu Levi 19:16, wazuelele nji egi: ‘Ukhadigo nu umbalagaji mu mutshima waye gudi phangi’aye.’—Levi 19:17.

Hene mukhuala udi mu Levi 19:16 udi nu longo dia ndando Aklisto adi naye gukalegela. Tushigo naye gukhala nu matangi abola mukunda nu athu ako nga guambila mambo. Gula tudi muvuila muthu ginjiongo nga ndo tushigo gumuzumba yajiya gututuma ha gumumbila mambo. Aklisto ashigo naye gukhala nu khadilo dia luholo elu.—Mat. 12:36, 37.