Siohwa ketin mahsanihong mehn Israel ko en sarawihla. Pwehn sewese irail en wia met, e mahsanih: “Ke sohte pahn waseli karaun likamw nanpwungen omw aramas akan. Ke sohte pahn rapahki mouren iengomw men pwehn kihsang. Ngehi me Siohwa.”​—Lip. 19:2, 16, NW.

Lepin lokaia ko “rapahki mouren iengomw men pwehn kihsang” kawehwehdi mwahu lepin kahs en Ipru ehu, ahpw ia wehwehn met? Ehu pwuhken Suhs duwen Lipai koasoia me e apwal en wehwehki lepin lokaia ko nan iretikitiko pwehki dahme lepin kahso dokedoke uhdahn sohte sansal. Uhdahn wehwehn lepin lokaia ko iei en dehr kesihnenda powe, limwah, de karanih.

Ekei me semen kan medewe me lepin lokaia ko kin pidada iretikitik 15, me mahsanih: “Kumwail wia dahme mehlel oh pwung ni amwail kin koasoanehdi pwunglahn kopwung kan nan mwoalen kopwung; dehr uhpalihki me semwehmwe kan, de masak me kepwehpwe kan.” (Lip. 19:15) Eri kehkehliko nan iretikitik 16, “rapahki mouren iengomw men pwehn kihsang,” kak wehwehki me mehn Israel men en dehr wia kopwung sapahrek nan mwoalen kopwung, nan pesines, de nan peneinei. Oh mehn Israel men en dehr pitih meteikan pwehn ale kamwahupe. Ei mehlel, kitail sohte kin men wia soahng pwukat, ahpw mie ehu ahl en wehwehki mwahu lepin lokaia ko nan iretikitik 16.

Medewehla tepin iretikitik 16. Koht ketin kehkehlingkihong sapwellimen aramas ako en dehr kohseli oh waseli karaunlikamw. E mehlel me en lipahnede meteikan kak kahrehda kahpwal. Ahpw ni emen eh karaunlikamwih emen, met suwedsang. (Lep. Pad. 10:19; Ekl. 10:12-14; 1 Tim. 5:11-15; Seims 3:6) Soun karaunlikamw men kak kauwehla adamwahu en emen. Soun karaunlikamw men kakete kihda mehn kadehde likamw duwen emen, mehnda ma met kakete kemehla aramaso. Tamanda me soun karaunlikamw kei me kahrehda aramas akan en kostakaih Napod oh kemehla. (1 Nan. 21:8-13) Ei, soun karaunlikamw men kak rapahki mouren emen pwehn kihsang, nin duwen me Lipai 19:16 kasalehda.

Oh pil ehu, emen kak karaunlikamwih emen pwehki e kailongki aramaso. 1 Sohn 3:15 mahsanih: “Mehmen me kin kailongki rie iei sounkam aramas emen, oh kumwail ese me sohte sounkam aramas emen pahn ale mour soutuk.” Patehng met, mwurin Koht eh mahsanih, “Ke sohte pahn rapahki mouren iengomw men pwehn kihsang,” e pil ketin kapatahiong: “Ke sohte pahn kailongki riomw nan omw mohngiong.”​—Lip. 19:17, NW.

Eri lepin lokaia ko nan Lipai 19:16 kihda kaweid kehlail ehu ong Kristian kan. Kitail anahne soikala lamalam suwed oh karaunlikamwih emen. Ma kitail ‘rapahki mouren emen pwehn kihsang’ de ma kitail karaunlikamwih pwehki kitail kailongki de peirinki, met kadehdehda me kitail uhdahn tateki. Kristian kan en dehr wia met.​—Mad. 12:36, 37.