Jehovaqa israelitasman nerqa llimphus chayri santos kanankuta. Chaypajtaj kay kamachiyta qorqa: “Ama pimantapis llullasta parlaspa llajtaykipi purinkichu. Amallataj runa masiykita llullakuspa juchachankichu payta wañuy pataman churaspa. Noqamin Jehová Diosqa kani”, nispa (Lev. 19:2, 16).

Runa masiykita “wañuy pataman churaspa” nisqa palabrasqa, hebreo parlaypi niyta munan “ama contranpi oqharikunkichu”. ¿Ima niytataj munan chay palabras? Uj judío libro, Levítico libromanta parlaspa nin: “Chay versiculotaqa mana entiendeyta atikullanchu, imaraykuchus mana yachakunchu imatapunichus hebreo parlaypi niyta munasqanta”, nispa.

Wakin yachayniyoj runasqa ninku, chay versiculoqa ñaupaj versiculowan sumaj ujchasqa kashasqanta. Chaypi nin: “Uj juiciopeqa ama mana cheqan kajta ruwankichu. Ama wajchaman kutikunkichu, nitaj qhapajpajpis uyata orqhonkichu. Runa masiykipajqa cheqan justiciata ruwapunki”, nispa (Lev. 19:15). Chay iskay versículos ujchasqapuni kajtenqa, ama contranpi oqharikunkichu nisqa palabrasqa, israelitaspaj niyta munanman karqa juzgashaspa, negociospi, familiapipis cheqan kajman jinapuni ruwananku kasqanta. Chantapis allinta qhawarikunanku karqa mana wajkunamanta aprovechakunankupaj. Arí, chay imastaqa manapuni ruwananchejchu kashan. Jinapis 16 versiculopi rikhurej palabrastaqa, waj jinamanta astawan sutʼita entiendesunman.

Qhawarina imatachus chay versiculoj qallariyninpi nisqanta. Chaypeqa israelitasman Dios nerqa ama llullasta parlaspa purinankuta. Cuento qʼepi kaspaqa problemasta rikhurichisunman, jinapis wajkunamanta llullasta parlaspaqa, aswan sinchʼi problemastaraj rikhurichisunman (Pro. 10:19; Ecl. 10:12-14; 1 Tim. 5:11-15; Sant. 3:6). Wajkunamanta llullasta parlajkunaqa, chayta ruwanku pillatapis pʼenqaypi rikhurichinankupaj chayri mana allinpaj qhawachinankupaj. Llullasta parlaj runaqa wajpa contranpi llullasta parlanman chay runaj kausayninta wañuy pataman churanan kajtinpis. Nabotwanpis chaytapuni ruwarqanku. Iskay runas paymanta llullasta parlarqanku. Chayraykutaj mana juchayojta rumiwan chʼanqaspa wañucherqanku (1 Rey. 21:8-13). Chayrayku Levítico 19:16 versiculoj tukukuyninpi nin jina, uj runa waj runaj contranpi llullasta parlaspaqa, chay runaj kausayninpa contranpi oqharikushanman.

Chantapis uj runaqa ichapis runa masinta chejnikusqanrayku paypa contranpi llullasta parlanman. 1 Juan 3:15 nin: “Pichus hermanonta chejnikojqa runa wañuchi, qankunataj yachankichej ni mayqen runa wañuchipis wiñay kausayniyojchu kananta”, nispa. Chantapis Diosqa, Levítico 19:16 versiculopi ama wajpa kausayninpa contranpi oqharikunkichu niytawan, 17 versiculopi nerqa: “Ama hermanoykita sonqoykipi chejnikunkichu”, nispa (Lev. 19:17).

Levítico 19:16 versiculopi imatachus Jehová kamachisqanta, cristianosqa kasukunanchejpuni kashan. Umanchejmanta mana allin yuyaykunata orqhonanchej tiyan. Nitaj jaykʼajpis wajkunamanta llullasta parlanachu tiyan. Pejpa contranpipis oqharikushanchej chayqa, nisunman pipis mana allinchu rijchʼawasqanchejrayku chayri paymanta envidiakusqanchejrayku paypaj llullasta parlaspaqa, payta chejnikusqanchejta rikuchishasunman. Cristianostaj manapuni pitapis chejnikunchejchu (Mat. 12:36, 37).