Jehova Diosmi Israel runakunata kamachirqa chuya kanankupaq. Chaymi kaynata nirqa: ‘Llaqtaykipiqa amam cuento qipiqa kankichu. Amataqmi runamasikipa vidanpa contranpiqa sayarinkichu. Ñuqa tayta Diosmi chaynata nini’, nispa (Lev. 19:1, 2, 16).

‘Amam contranpiqa [...] sayarinkichu’ nisqanqa hebreo rimaypi qillqasqa kasqanman hinam nichkan. Ichaqa, ¿ima ninantaq chayqa? Levitico qillqamantam huk libro kaynata nin: “Kay versiculopa nisqanqa hebreo rimaypi rimasqankuman hina qillqasqa kasqanraykum sasa entiendena. Hebreo rimaypiqa nichkan ‘waqtallanpi utaq hichpallanpi mana sayaymantam’”, nispa.

Wakin yachaysapa runakunam ninku chay versiculopa nisqanqa ñawpaqnin versiculowan tupasqanta, chaypim nin: “Juez kaspaykiqa allinllatam arreglanki, amam sayapakunkichu wakchamanpas nitaq apumanpas. Derechonpim sumaqta arreglanki runamasikipa quejantaqa”, nispa (Lev. 19:15). Chayna kaptinqa 16 versiculopi nisqanqa rimachkarqa Israel runakuna juiciopi kaspanku, negocioyuq kaspanku utaq familiayuq kaspanku mana pimanpas sayapakunankumantam. Manataqmi kikillankupaq munasqankuraykuchu runamasinkuta engañananku karqa. Manamá ñuqanchikpas chaykunataqa ruwananchikchu. Chaywanpas, ¿imataq yanapawachwan Levitico 19:16 nisqanta allinta entiendenapaq?

Chay versiculopa qallariyninpim Israel runakunata Jehova Dios nirqa ama cuento qipi kanankupaq. Imatapas pantaruspa rimaruymantaqa aswan mana allinraqmi cuento qipi kayqa (Prov. 10:19; Ecl. 10:12-14; 1 Tim. 5:11-15; Sant. 3:6). Cuento qipi runaqa runamasinta dañayta munasqanraykum wañuymanpas chayarachinman. Chaynam pasarqa Nabot sutiyuq runawan. Huk runakunam paypa contranpi llullata willakurqaku, chayraykum Nabottaqa rumiwan chuqaspa wañurachirqaku (1 Rey. 21:8-13). Chaymi Levitico 19:16 nisqanman hina pipas cuento qipi kaspanqa runamasinpa vidanpa contranpi hatarichkanman.

Chaymantapas, cuento qipi kaytaqa pipas qallaykunman runamasinta chiqnisqanraykum. 1 Juan 3:15 nisqanpim kaynata nin: “Pipas iñiqmasinta chiqniqqa runa wañuchiqmi rikurirun. Qamkunaqa yachankichikmi runamasin wañuchiqqa mana wiñay kawsayniyuq kananmanta”, nispa. Jehova Diosqa Levitico 19:16 nisqanpa qatiqninmanpas kaynatam nirqa: ‘Runamasikitaqa amam sunquykipiqa chiqninkichu’, nispa (Lev. 19:17).

Chayraykum Diosta serviqkunaqa Levitico 19:16 nisqanta kasukunanchik. Chaymi mana allinkunataqa mana piensananchikchu. Manataqmi haykapipas cuento qipiqa kananchikchu. Pimantapas yanqa cuentokunata rimaspanchikqa chiqnisqanchiktam qawachichkanchik. Diosta serviqkunaqa manamá chiqnikuqchu kananchik (Mat. 12:36, 37).