▪ Jehová Diosca israelitacunataca paishnalla santo, jucha illajmi cana canguichi nircami. Chaita paicuna pactachi ushachunga, “cambaj gente purapica, ama huasha parlashpa puringuichu. Cambaj cumba runagutapash, ama huañuchinatalla yariashpa puringuichu. Ñucami, Mandaj Dios cani” nirca (Lev. 19:2, 16).

Levítico 19:16​pica “Cambaj cumba runagutapash, ama huañuchinatalla yariashpa puringuichu” nijunmi. Shinapash Levítico librota estudiashca shuj judioca cashnami nirca: “Hebreo shimipica cai shimicunaca ‘yapa ladogupi na shayarina o ladogupi na cana’ nisha nin. Cashna nijushcamandami hebreo shimipica cai shimicuna imatapacha ningapa munashcataca na tucuita intindi usharinllu” nin.

Shinapash caicunamanda estudiashca huaquingunaca cashnami nin: “Versículo 16​pi imata nijushcata intindingapaca, Levítico 19:15​pi imata nijujta ricunami ayudaita ushanga” ninmi. Chaipica: “Shuj juiciopica pita cashpapash alimi juzgana cangui. Ama imagutapash na charij cajpilla llaquichinguichu. Shinallata ama charij charij cajpilla imatapash favoricinguichu. Canba cumba runagutaca na ñavitallachu ricushpa juzgana cangui” nijunmi (Lev. 19:15, TNM). Levítico 19:16​pi nijushca shimicunata ashtahuan intindingapaj Levítico 19:15​ta liina cashca cajpica, cai shimicunaca caitapashmi ningapaj munanman. Pitapash juzgana cashpaca tucuicunata igual tratashpa juzganata, negociocunapi o familia ucupi paipa cumba runaguhuan tucuipi honrado cana cashcatapash. Ciertomi can tucuicunata igual tratanaca minishtirishcapachami can. Shinapash verso 16​pi nishca shimicunata ashtahuan ali intindingapaca shuj yuyaipashmi tian.

Versículo 16​pi imata ningapaj munashcata intindi ushangapaca, cai versomandallata callari shimicunata ricunami ayudanga. Chaipica: “Cambaj gentepurapica, ama huasha parlashpa puringuichu” nijunmi. Pensaripashunchi, pitapash yangamanda juchachishpa huasha rimanaca na solo shuj chismellachu can. Jatun llaquimanmi apaita ushan. Aunque chismecunapashmi shujcunataca llaquichita ushan (Prov. 10:19; Ecl. 10:12-14; 1 Tim. 5:11-15; Sant. 3:6). Shinapash pitapash yangamanda juchachishpa rimanaca ninandami shuj personataca llaquichita ushan. Shujcunata yangamanda imatapash juchachishpa rimajcunaca chai personapa causaitami peligropi churaita ushan. Chaitami Bibliapi parlashca, Nabot runaguhuanga pasarca. Nabot runagumandaca huaquin jaricunaca pai nimata na rurashca cajpitami yangamanda juchachishpa paimi chaita o caita rurarca nishpa rimarca. Shinamandami pai inocente cajpipash paitaca rumicunahuan pigashpa huañuchirca (1 Rey. 21:8-13). Shinaca pipash shuj personata yangamanda imatapash juchachishpa rimashpaca Levítico 19:16​pi nishcashnami shuj personataca huañuiman apaita ushan.

Shinallata pitapash yangamanda juchachishpa rimanaca shuj personata odiashcatami ricuchijun. 1 Juan 3:15​pica: “Shuj crijta millanayachijcunaca, maijan cashpapash genteta huañuchij runashnami. Maijan huañuchijpipash, causaita causagrinataca napacha paipaj shungupi charinllu” ninmi. Jehová Diosca israelitacunaman, Levítico 19:16​pi shimicunata pactachichun mandashca jipaca, caitapashmi paicunataca nirca: “Canba huauquitaca ama cambaj shungupilla millanayachishpa puringuichu” nishpa (Lev. 19:17).

Shinaca Levítico 19:16​pi mandashca shimicunaca cunan punllacunapipash ñucanchicunataca ninandami ayudaita ushan. Chaimandami imapash nali pensamientocuna shamujpica uchallami chaicunataca llujchina capanchi. Shinallata ñucanchica, nunca pitapash na yangamanda juchachishpa huasha rimanachu capanchi. Pitapash yangamanda juchachishpa huasha rimashpaca chai personata envidiashcata, odiashcatami ricuchinajunchiman. Jesusta catijcunaca na pitapash odiashpaca ricungapaj munapanchichu. Más bien tucuicunata juyashcatami ricuchingapaj munapanchi (Mat. 12:36, 37).