Hii juu Jehovah bi ta piki dee Isaëli sëmbë taa de musu dë santa. U di soni aki hedi mbei a bi piki de taa: „Wan musu ta waka ta mindi hogi hati soni da wotowan. Wan musu suku u kii di wotowan fuunu. Mi da Jehovah.”​—Leif. 19:2, 16.

Unfa u musu fusutan dee wöutu: „Wan musu suku u kii di wotowan fuunu”? Wë wan buku u dee Dju, bi taki soni u di buku Leifitiki taa: „A taanga u konda andi di pisi u di tëkisi aki kë taki, u di di Hebelejën sikifima aki sikifi di pisi aki a nöngö fasi, nöö wa dë seiki andi di nöngö aki kë taki. Ma ee u kë puu ën leti kumafa a sikifi ën, nöö a kë taki: Na taanpu a di woto së u, na taapu nëën bandja, nasö na taanpu zuntu ku wan wotowan.’”

So könima ta taki taa di pisi aki nama ku di tëkisi di waka a disi fesi, ka a sikifi taa: „Wan musu kuutu soni a wan föutu fasi e. Wan musu tei sëmbë së, aluwasi ee a dë wan möfina sëmbë nasö wan guduma. Un musu kuutu soni a wan leti fasi” (Leif. 19:15). Ee a bi o dë sö, nöö di wëti di dë a vers 16 taa ja musu „suku u kii” di wotowan fii, bi o kë taki nöö taa di föluku u Gadu an bi musu du hogi ku wan sëmbë di de tja go a kuutu, te de bi ta bai soni ta sei da deseei, nasö te famii kisi toobi ku deseei, söseei de an bi musu bia wan taki u di de kë feni wini. A dë sö tuu taa wa musu du dee soni aki, ma wan woto fasi dë fa u sa ko fusutan di soni di sikifi a vers 16.

Buta pakisei a di bigi pisi u di vers aki. Gadu ta bai dee sëmbë fëën aki u de an ta waka ta mindi hogihati soni da wotowan. Hoi a pakisei taa te i ta mindi hogihati soni da wotowan, nöö di soni dë hogi möön te i ta waka ta taki sëmbë soni, hii fa di soni aki seei sa tja toobi ko tu (Nöng. 10:19; Peleik. 10:12-14; 1 Tim. 5:11-15; Jak. 3:6). Te wan sëmbë ta mindi hogihati soni da wan wotowan, nöö a ta taki soni di o poi di bunu në u di sëmbë dë. Di sëmbë di ta taki hogi u wotowan sa konda soni di an dë tuu a kuutu fesi seei. A di lö fasi aki seei a bi o sa mbei de kii di wotowan fëën. Pakisei dee womi dee bi mindi soni da Nabotu. Dee soni di de bi taki bi mbei taa de bi tuwë sitonu a Nabotu liba u tefa a dëdë (1 Kön. 21:8-13). Awa, wan sëmbë di ta mindi hogihati soni da wan wotowan, ta suku u kii di wotowan fëën, kumafa di u tu pisi u Leifitiki 19:16 ta taki.

Wan sëmbë di lo’ u mindi hogihati soni da wan wotowan, ta du di soni aki u di a buuse di sëmbë. U ta lesi a 1 Johanisi 3:15 taa: „Biga ee wan sëmbë i buuse di otowan fii, nöö hën da wisihatiböö i abi. Nöö un sabi taa ee wan sëmbë i a’ wisihatiböö, nöö ja abi di teego libi u Masa Gadu möönsö.” Baka di Gadu bi taki di soni di sikifi a vers 16, hën a bi taki taa: „Wan musu buuse unu baaa a unu hati.”​—Leif. 19:17.

Di pisi u di tëkisi u Leifitiki 19:16 da wan fanöudu soni da Keesitu sëmbë a di ten aki. U musu biinga fu wa ko abi taku pakisei u wotowan, söseei wa musu mindi hogihati soni da wan wotowan fuu. Boo taa, ee u mbei a ko pasa taa u ta „suku u kii” wan sëmbë u di wa lobi ën, nasö u di u ta haun ku ën, tee taa u ko ta mindi hogi hati soni dëën, nöö di soni dë bi o lei taa u ta buuse ën. Aan misi, Keesitu sëmbë musu koti pasi da di soni aki.​—Mat. 12:36, 37.