Jehovha ganede gu khuye Vaisrayeli va di yede gu khala vathu nya guage. Gasi gu phasa va na Israyeli gu gira isoso, uye a va embede gu khuye: “U nga gimbili u ganelela guvivba khu vathu va na gyanu, mwendro gusambanya malipha u songisa muthu kwanu. Eni kheni Pfhumu Nungungulu.” — Levhi 19:2, 16.

Malito ma gu khayo “gusambanya malipha” wuvbindrugedzeyi nya Gihebheru, ganiolu ma gu tshamuseya ginani? Libhuku nyo khaguri nya Gijudha manigano ni libhuku la Levhi li ganede gu khilo: “Gipandre gegi nya livhesi . . . gi ngu garadza gu gi pwisisa, kholu kha hi wuti tshamuselo nyo khongome nya malito nya Gihebheru ma thulago gu khayo: ‘Gu ema vbatshani nya gilo nyo khaguri, bambe mwendro vbafuvbi.’”

Sihevbuli nyo khaguri so pimisa gu khiso malito yaya ma ngu pwana ni malito ma gomogo omu ga livhesi 15, ma gu khayo: “Vbamahungutunu u nga hambanisi nayo, u lamula khu ndzila nyamba lulama. U nga khedzi khu khovbe, u kalavela gisiwana mwendro gu emela oyu nya gumanele. U na lamula muakelane wago khu nayo ni lisine.” (Levhi 19:15) Abari kharato, gileletelo gi gomogo avba ga livhesi 6 maningano ni gu “sambanya malipha” khu mumbe muthu, adzina si nga thula gu khiso Vaisrayeli kha va nga ba va yede gu gira silo nya ba sadi umo nya dzitribhunali, va gu ba va gira dzinogosi mwendro mudzindrangani gwawe. Lisine gu ethu kha hi yeli gu gira silo sesi, ganiolu gu na ni tshamuselo nya wadi wu hi phasago gu pwisisa malito yaya ma gomogo omu ga livhesi 16.

Wona malito nyo pheye nya livhesi 16. Avba Nungungulu a embede vathu vaye gu khuye kha va nga ba va yede gu ganeleya malipha. Gwadi gu dundrugeya gu khethu gu ganeya malipha khu vambe gu nga vanga sigaradzo guvbindra gu ganeya khu womi nya vathu. (Mav. 10:19; Muh. 10:12-14; 1 Thim. 5:11-15; Jak. 3:6) Gu tala nya dzitepo muliphi o ganeya silo si gu siri lisine khagwenye khu gu vbweta gu tshundzisa lina la mumbe muthu. Muliphi a nga fakazeya malipha mumbe muthu ambari silo soso na si gu gira gu muthu wule a songwa. Giyeyedzo nya isoso khu vama vale va vavili va nga ganeya malipha khu Nabhoti, iso si nga gira gu a veteledwa khu siwindri nya mba na nandru. (1 Dzipf. 21:8-13) Kha nga si yeyedzwago avba nya gipandre nya wuvili gya Levhi 19:16, muliphi a nga sambanya malipha khu mumbe muthu ambari isoso sa gu gira gu muthu wule a songwa.

Gu diga isoso, muthu a gu sambanya malipha khu mumbe muthu so yeyedza gu khiso a ngu mu nyenya. 1 Johane 3:15 wari khuye: “Oyu a vengago ndriyaye musongi. Enu mu ngu dzitini gukhenu musongi mwalo guvbanya nya gupindruge.” Hwane nya gu ba Nungungulu a ganede gu khuye: ‘U nga sambanyi malipha u songisa muthu kwanu,’ uye a di engendza khuye: “U nga vengeli muthu kwanu monyoni gwago.” — Levhi 19:17.

Khu kharato, nayo wu gomogo omu ga Levhi 19:16 wa gu thuma kha nga gidundrugiso ga Makristo. Hi yede gu dzi garadzeya gu nyenya mipimiso nya mba yadi hi bwe hi si ganeleyi malipha khu vambe. Ha gu “sambanya malipha khu muthu kwanu,” a gu gu ganeya malipha mwendro guvivba khu muthu nyo khaguri, si na yeyedza gu khiso hi ngu mu nyenya muthu wule. Kha nga Makristo kha hi yeli gu gira isoso. — Mat. 12:36, 37.