Ne fakamalosi atu a Ieova ki tino Isalaelu ke tapu latou. E ‵tusa mo te mea tenei, ne fai atu a ia ki a latou: “E se ‵tau mo koe o fatufatu valevale a nisi tino ki ou tino. E se ‵tau mo koe o salasala ki auala ke fakaseai ei te ola o tou tuakoi. Au ko Ieova.”—Levi. 19:2, 16.

A te tugapati “salasala ki auala ke fakaseai ei te ola” e fakamatala faka‵lei mai i ei a te uiga tonu o te tugapati Epelu, kae se a te mea e fakauiga ki ei? E fai mai se tusi Iutaia e uiga ki te Levitiko, penei: “A te vaega o te fuaiupu tenei . . . e faigata ke fakamatala atu ona ko te uiga o te pati Epelu (telā e fakaaoga i konei), telā e fakauiga ki te ‘ke mo a ma tu mai luga, i tafa, io me se koga pili.’”

E fai mai a nisi tino ‵poto me e isi se sokoga o te tugapati tenā ki te fuaiupu tenā mai mua, telā e fai mai: “E se ‵tau mo koe o fai ne fakamasinoga sē ‵tonu. E se ‵tau mo koe o fakaasi atu te fakailoga tino ki tino ma‵tiva io me fakaasi atu te fapito ki tino mau‵mea. E ‵tau mo koe o fakamasino a tou tuakoi mo te fakamaoni.” (Levi. 19:15) I te feitu tenā, a te fakatonuga e maua i te fuaiupu e 16 ke mo a ma salasala o “fakaseai te ola” o se tino e mafai o fakauiga me e se ‵tau mo tino o te Atua o fakalogo‵mae atu ki se taina i loto i se fono fakamasino, mea tau pisinisi, io me ko mea a te kāiga, kae ke mo a ma ‵fuli fakakotua ne ia a mea mō tena ‵lei eiloa. E tonu, e se ‵tau o fai ne tatou a mea konā kae e isi se auala ‵lei e ‵tau o malamalama tatou i te tugapati tenei i te fuaiupu e 16.

Ke mafaufau ki te kamataga o te fuaiupu tenā. Ne fakatonu atu te Atua ki ana tino ke mo a ma olo o fatufatu a nisi tino. E tiga eiloa e mafai foki o māfua mai a fakalavelave e uke i te gutu fai‵tala, masaua la me e masei atu te gutu fatufatu i te gutu fai‵tala. (Faata. 10:19; Fai. 10:12-14; 1 Timo. 5:11-15; Iako. 3:6) A te gutu fatufatu e masani o aofia i ei a pati mo te fakamoemoega ke fakamasei ei a te suā tino. E mafai ne se tino gutu fatufatu o fai se molimau sē tonu e uiga ki te suā tino faitalia me e fai ei ke tu te ola o te tino tenā i se tulaga fakamataku. Masaua la me ne fai ne tāgata gutu fatufatu se molimau sē tonu e uiga ki a Napota telā ne iku atu ei ki te peipeiga ki fatu ke mate i se auala sē tonu. (1 Tupu 21:8-13) E tonu, a te tino gutu fatufatu e mafai o salasala ke fakaseai ne ia te ola o te suā tino e pelā mo te mea e fakaasi mai i te lua o vaega o te Levitiko 19:16.

E se gata i ei, e mafai o fatufatu ne se tino a te suā tino ona ko te takalialia ki ei. E fai‵tau tatou penei i te 1 Ioane 3:15: “So se tino e takalialia ki tena taina se tino tatino, kae e iloa ne koutou me e seai se tino tatino e tumau i a ia te ola se-gata-mai.” Se mea ‵lei ke iloa atu me mai tua o pati i te fuaiupu e 16 ne fai mai ne te Atua a pati konei, “E se ‵tau mo koe o takalialia ki tou taina i tou loto.”—Levi. 19:17.

Tela la, a te fakatonuga telā e ‵tagi fakaatea i te Levitiko 19:16 e tuku mai i ei se fakamalosiga tāua mō Kelisiano. E ‵tau mo tatou o ‵teke atu ki mafaufauga sē ‵lei mo te fatufatu ne tatou a nisi tino. I tugapati faigofie, kafai tatou e salasala ki auala ke fakaseai atu te suā tino mai te fatufatu ne tatou ona ko te ‵tou sē fia‵fia io me ko te loto masei, a te mea tenā se fakamaoniga o te takalialia ki a ia. E ‵tau mo Kelisiano o ‵kalo katoatoa keatea mai te faiga o te mea tenā.—Mata. 12:36, 37.