Geovà el gavea dito che i israeliti i gavea de esser santi. Par giutarli a esser santi, Geovà el ghe ga dito: ‘No stà contar busia sora i altri in meso el pòpolo. No stà levarte su contra nantra persona. Mi son Geovà.’ — Lev. 19:2, 16.

Le parole ‘levarte su contra’ l’è pròpio come dise el testo in ebraico. Ma cossa che vol dir? Un libro sora la léngua dei giudei el ga dito: “Questa parte del versìcolo la ze . . . fadiga de capir parché no savemo ben cossa vol dir ‘no restar in pié sora, dela banda o darente’ in ebraico.”

Arquanti studiosi i pensa che el versìcolo 16 l’è ancora drio parlar de quel che dise nel 15. El versìcolo 15 el dise: ‘Gavé de giulgar de maniera giusta. No stà far difarensa col poareto gnanca stà tratar meio el sior. Te ghè de giulgar a tuti con giustìssia.’ (Lev. 19:15) Se quel che i studiadi i dise l’è giusto, le parole ‘no levarse su contra’ le vol dir (1) no giulgar nantra persona de maniera ingiusta nei tribunai, nei negossi o nela fameia, e (2) un israelita no’l podea far una roba sbaliada sol par guadagnar quel che el volea. L’è vera che no ghemo de far queste robe, ma ghen’è una maniera pi giusta de capir le parole del versìcolo 16.

Nel scomìnsio del versìcolo 16, Geovà el ga dito par no contar busie sora i altri in meso el pòpolo. Ghemo de ricordarse che contar busie sora i altri l’è pedo che parlar sora quel che sucede nela so vita. (Pro. 10:19; Ecl. 10:12-14; 1 Tim. 5:11-15; Tiago 3:6) Qualchedun che el conta busie contra nantra persona el pol far i altri pensar mal dela o anca farla esser copada. Varda quel che ga sucedesto con Nabote. Due òmini i ga contà una busia sora Nabote davanti de altre persone. Par quela, i lo ga giulgà de maniera ingiusta e i lo ga copà a sassade. (1 Rè 21:8-13) Alora, de acordo con Levìtico 19:16, una persona la se leva su contra qualchedun quando la conta busie sora lu. Par causa de queste busie, la pol farlo anca morir.

Dopo che Geovà el ga dito che no l’era par levarse su contra nantra persona, el ga anca dito che no l’era par odiar nel cuor nantro fradel. (Lev. 19:17) Quando una persona la conta busie contra nantra, la mostra che la òdia. In 1 Gioani 3:15, dise che se qualchedun el òdia el so fradel, l’è come che se lo copesse e, par causa de questo, lu no’l podarà viver par sempre.

Alora, l’è tanto importante quel che dise in Levìtico 19:16. Noantri ghemo de star atenti par mai odiar a qualchedun o contar qualche busie sora lu. Quei che i va drio a Gesù no i fà mia queste robe. — Mat. 12:36, 37.