Gudxi Jehová ca israelita gácacaʼ ti guidxi santo. Nga runi bidiibe laacaʼ mandatu riʼ: «Cadi saluʼ ndaaniʼ xquídxiluʼ para guiniʼluʼ xiixa para guninaluʼ stobi. Cadi gúniluʼ xiixa ni cuʼ xpida prójimo stiluʼ lu peligru. Naa nga Jehová» (Lev. 19:2, 16).

¿Xi raca significar diidxaʼ «cadi gúniluʼ xiixa» ni riete lu Levítico 19:16? Ti comentariu judíu stiʼ libru de Levítico ná: «Nagana para guiénenu versículo riʼ purtiʼ lu diidxaʼ hebreu raca traducir ni casi “cadi guzuhuaaluʼ gaxha o cueʼ xiixa”».

Caadxi binni ni nanna de tema riʼ riníʼ íquecaʼ tobi si versículo riʼ né ni riete lu versículo 15, raca ná: «Cadi gúnitu ni cadi jneza ora guni juzgartu. Cadi gúnitu menu ca binni pobre ne cadi gúnitu jma pur ca binni ricu. Laguni juzgar prójimo stitu jneza» (Lev. 19:15). Pa ñaca zacá ni, mandatu ni zeeda lu versículo 16 ni ná cadi gúniluʼ xiixa sti binni, zándaca riniʼni cadi naquiiñeʼ guni ca israelita xiixa cosa ni cadi jneza ora guni juzgarcaʼ ti binni, ora gúnicaʼ negocio ne ndaaniʼ familia sticaʼ. Peru laaca riniʼni cadi naquiiñeʼ guni ti israelita xiixa ni cadi jneza para si cueendú ni galán para laa. Maca nánnanu cadi naquiiñeʼ gúninu ca ni bizéʼtenu riʼ, peru nuu sti modo zanda guiénenu ni riete lu versículo 16 riʼ.

Guidúʼyanu xi ná primé ndaa stiʼ versículo riʼ. Racá gudxi Dios ca israelita cadi guiniʼcaʼ xiixa para guninacaʼ stobi. Cadi guiaandaʼ laanu, maʼ gadxé nga guindisaʼ tobi falsu luguiáʼ binni ne gadxé nga ti chisme, peru guiropaʼ cosa riʼ zanda cuʼ ni tuuxa lu guendanagana (Prov. 10:19; Ecl. 10:12-14; 1 Tim. 5:11-15; Sant. 3:6). Ora riníʼ tuuxa xiixa para guniná stobi, rúnini para guiaana binni ca mal ne pur ni guiniʼbe riʼ zanda cuʼbe xquendanabani binni riʼ lu peligru. Nga peʼ nga ni bizaaca Nabot, caadxi hombre gundísacaʼ falsu luguiabe ne pur ngue biiticabe laabe de pedrada neca qué gápabe donda (1 Rey. 21:8-13). Nga runi, casi ná guiropa ndaa stiʼ Levítico 19:16, ti binni ni riníʼ xiixa para guniná stobi zanda cuʼ xquendanabani ti binni lu peligru.

Ne zándaca guiníʼ tuuxa xiixa para guniná stobi purtiʼ nanalaʼdxiʼ laabe. Lu 1 Juan 3:15 ná: «Tuuxa ni nanalaʼdxiʼ hermanu stiʼ la? naca tobi ni ruuti, ne laatu nánnatu nin ti binni ni ruuti qué zacaa guendanabani ni qué zaluxe». Ne guendaridxagayaa nga despué de bidii Dios mandatu ni zeeda lu Levítico 19:16 guníʼ: «Cadi gaca nanaláʼdxiluʼ bíʼchiluʼ ndaaniʼ ladxidoʼloʼ» (Lev. 19:17).

Caguixhená ni riete lu Levítico 19:16 guiráʼ ca xpinni Cristu. Nga runi cadi naquiiñeʼ guiníʼ íquenu ni cadi jneza ne cadi guininu xiixa para guninanu stobi. Purtiʼ pa gúninu ni purtiʼ si qué riábabe laanu o purtiʼ nápanu envidia laabe, zándaca zusihuínninu nanaláʼdxinu laabe, nga runi, casi xpinni Cristu, qué chuʼ dxi gúninu ca ni bizéʼtenu riʼ (Mat. 12:36, 37).