Epẹ k’akẹ phọ, aZizọs atuughạ ni raagharạ dị elhoghonhaạn nyodị ḍighaạgh oḍighi ogey oye dị aḅọph oḍighi r’abunhọn mem mọ odị aru bọ siẹn ade phọ. Ika kụ idị yira kotue omooghọm suọ eḍeenhaan phọ aZizọs? Yira omhaạr okiririom ophogh eḍeenhaan phọ odị, yira kotue ni omiịn iraạr asinhị iilhogh dị ketue ilhoghonhaạn iyira ḍighaạgh oḍighi abugey awe dị oḅọph oḍighi r’abunhọn. Asinhị iilhogh phọ iphẹn phọ kinyaamhị iyira olhọgh ophophe uwaloor amuḅọph igbo abumor r’abumarani phọ.

Ogey oye dị aḅọph oḍighi r’abunhọn, r’osooromhi aloor ramaghamhị ghan maạr buphẹ r’odị rokumuan bọ, kụ ra/kparaghạ ghan omiteom aḍien. AZizọs atuughạ ni eegharạ osooromhi aloor phọ ephẹn phọ ḍighaạgh Odẹ phọ odị. Ii obọ ogina aZihova amạn ni dị awe komạgh mọ Olemhiạ, kuolọ odị awạ ni dị abunhọn kolegheri okpanhạ oḍighi phọ Oọny phọ odị aḍighi aani bọ. Yira ulhegheri iphẹn phọ esi ipẹ Enhaạn eḅẹm bọ mọ: “Nyiidiphọ yira kolẹm oye okighimạ loor ayira.” (Gen. 1:26) Mem mọ aZihova aḅạ bọ ikpo onhụ phọ iphẹn phọ, aZizọs alhegheri ni mọ Odẹ phọ onọ akạr kụ asooromhi loor.—Ps. 18:35.

AZizọs asooromhi aani ni loor mem mọ arọl bọ siẹn ade phọ. Mem dị osẹph nyodị esi iyaạr dị odị aḍighi, odị angọ ghan ghụn ḍisẹph phọ Opọ akpeanhaạn bọ. (Mạk 10:17, 18; Jọn 7:15, 16) AZizọs alhọgh ni inyaạm omhiịn mọ odị apamhanhạm eephọ r’abumatuạn phọ odị, ḅilhẹ kẹn odị o/sighẹ  bidị idiphọ arebenhẹ kuolọ idiphọ arighirị. (Jọn 15:15) Odị aatol kẹn ruwol abidị otughemhị abidị ilọ osooromhi aloor. (Jọn 13:5, 12-14) Ewạ mọ yira phọ kẹn oghuenhi ghan buphẹ r’ayira oḅọph bọ rukumuan phọ kparipẹ r’owạ ghan ilọ asuọ ayira. Mem dị ‘oniin aghueni ghan nyoniin’ ḅilhẹ u/gbon ghan osighẹ aḍisẹph, yira koḅophoghạn ni oḍighi iboom araraạr.—Rom. 12:10.

Oye dị asooromhi loor ralọgh ghan kẹn elhegh mọ ‘oromha o/lho, pọ onọ m’aphe.’ (Prov. 15:22) Etigheri onhụ asiạ phọ obobọ olhegheri iyaạr phọ ayira, ewạ mọ yira olhegheri mọ oye o/lho dị alhegheri oomo araraạr amhạn. AZizọs bịn aḅẹm ni mọ araraạr edi ni dị onọ u/legheri. (Mat. 24:36) Ḅilhẹ kẹn, ibadị amem odị awạ ghan ni onhaghạn aani aḍiitughiạn abumatuạn phọ odị u/munughan bọ. (Mat. 16:13-16) Iikia i/lo, pọ kụ iyaạr phọ aloor abuphẹ okumuan ghan bọ r’odị ephọ ghan bọ! Igina phọ kẹn ni, mem dị yira osooromhi loor kụ olhọgh elhegh esi dị olhegheri iyaạr ayira asi, kụ ongọ ghan eepoogh bunhọn osogh aani ghan aḍiitughiạn, pọ yira rolọgh kophophe eephọ igbo ayira. Kụ oromha phọ abidị kaḍighi iyaạr dị yira ‘ko/pe.’

Idị egbolhomaam oghaạph phọ ophọn phọ, ekạr emạn maạr dị ikumor awe phọ kotuughaạny Zizọs iduọn bidị rokumuan bọ r’abunhọn. Ikumor awe phọ olhọgh elhegh mọ uwaloor iigbia phọ katue ni anyu oniin okumor oye siphẹ igbo phọ abidị oghaạph iyaạr. Esi iduọn phọ, eḍighi maạr dị ikumor awe phọ ongọ ghan eepoogh dị torobọ onyọ abidị kasogh aani ghan ḍiitughiạn mem dị bidị ophạm ruupuruan, pọ bidị koḅophoghạn ni osogh ḍiitughiạn dị kengọ suọ ookpomhoghan phọ.

Ogey oye dị aḅọph oḍighi r’abunhọn raḍeenhaan ghan ni eeḅi ezọ k’aghị esi abuphẹ r’odị rokumuan bọ. Odị aḍighi oye dị ayoghoyoghọ ḅilhẹ rameeraam aani ghan ilọ abunhọn oghaạph. Agey ni, aZizọs akạr kụ amhoọgh roopoogh omhiịn eeḅi ezọ Odẹ phọ odị. Esi omaạm, odị kụ edị aZihova arom oru isiẹn ade phọ otagharạn omhạr awe esi ooruẹn aḍuugh.—Jọn 3:16.

AZizọs ayoghoyoghọ ghan ni mem dị ekpeanhaạn. Tuutughiạn ipẹ odị alhoghonhaạn bọ ḍighaạgh anhịr olọ aKenan phọ, ghalhamọ r’iduọn orom bọ nyodị oghị isiphẹ otu phọ Izrạl. (Mat. 15:22-28) Odị aḅilhẹ kẹn aḍeenhaan eeḅi ezọ esi ipẹ odị awạ ghan bọ ḍighaạgh abumatuạn phọ odị. Mem mọ aPita ogbogh oyaghirị phọ odị apharanhaạn bọ nyodị esi ogbo, aZizọs asạr ri awilhenhaạn nyodị. Onyebel roten, odị aḅọgh ni iiḍighi dị emhạn maạr iboom angọ Pita. (Luk 22:32; Jọn 21:17; Iiḍighi 2:14; 8:14-17; 10:44, 45) Eḍeenhaan phọ aZizọs meegholhomhi mọ ewạ ni dị yira koḍighi idị “oomo awe komiịn eeḅi ezọ phọ” ayira, esi  omheearaam aani ghan ilọ abunhọn oghaạph.—Fil. 4:5.

Eeḅi ezọ kilhoghonhaạn kẹn iyira ḍighaạgh odaphạn asidọl, orue oḅophoghạn okumuan r’atorobọ oye. AZizọs azoọm ghan ni agey buphẹ oru ghan bọ onhaghạn oghaạph phọ odị, dị tutụ amulhọgh-ḍien phọ odị osiph nyodị olhogh mọ “oyaghirị abubonyiọm iisogh r’abukarạph awe.” (Mat. 11:19) Idiphọ aZizọs, yira kotue ni okumuan aani r’awe kirokirọ ḍughụm? Onyọ umor dị oghol mọ Louis, dị maghị ni ibadị arikpisi akumuan r’awe kirokirọ ghalhamọ r’epẹ Betẹl, aḅẹm mọ: “Mị rakparaghạ ghan ni omhiịn awe phọ abuẹn r’amhị rokumuan ghan bọ idiphọ ikpo ablọk dị ii/leeny dị roḅiirọm iikpe. Mem dị mị aanmeni iniin ikpo ablọk phọ alhoghoḍị inhọn ariisi, iikpe phọ reeleeny ghan ni. Mị rakparaghạ ghan ni oolemhi araraạr siẹn aloor phọ amhị, pidị mị atue aḍighi aani idị iikpe phọ keeleeny.” P’eeghe emạ eeḅi ezọ!

Pụr amem kụ edị yira koḍeenhaan ghan eeḅi ezọ r’abuphẹ r’ayira rokumuan bọ siphẹ ookpomhoghan phọ ayira? Yira omoọgh eepoogh oḍighi iduọn phọ mem dị yira omite epẹ erugh phọ r’abumor phọ ayira. Eeni otue ni udi iyira ongọ bukaaphọm dị iiḍighi eghunotu phọ abidị egbatanhaạn r’iphẹn ayira, obobọ budị asiạ ayira i/ḍighi iniin. Yira kotue ni oḍeenhaan bidị eeḅi ezọ esi odaphạn asidọl phọ abidị mem dị yira rotelhean r’abidị, pidị bidị oghelhọm aani rukumuan epẹ erugh phọ ḍughụm?

Ogey oye dị aḅọph oḍighi r’abunhọn ratọl ghan “wiriwirị” r’abunhọn. (1 Tim. 6:18) Mem mọ odị rakumuan bọ r’Odẹ phọ odị, aZizọs alhọgh ni elhegh mọ aZihova aa/ghinhaạn ghan nyodị iyaạr. Mem mọ aZihova “aseere bọ okuaḍio phọ esi phọ odi bọ,” aZizọs “arọl li siphẹ” amhiịn ghan ipẹ odị raḍighi bọ aḅilhẹ atuughạ raraạr. (Prov. 8:27) Kụ aZizọs aru bọ siẹn ade phọ, odị aa/ghinhaạn bumatuạn phọ odị “oomo phọ ipẹ [odị] anaghạn bọ” esi Odẹ phọ odị. (Jọn 15:15) R’emạ eḍeenhaan phọ ephẹn phọ, ewạ kẹn dị yira kotọl ghan wiriwirị r’abuphẹ r’ayira rokumuan bọ esi otughemhị aani ghan abidị torobọ iyaạr dị yira olhegheri. Okạr oghaạph, ogey oye dị aḅọph oḍighi r’abunhọn k/abooghinhaạn iyaạr dị ewạ mọ abuphẹ odị ratughemhị bọ olhegheri, loor esi dị mọ komaạr opu nyinhọ. Olhoghi odị kaḅaạl ghụn otughemhị aani abunhọn ipẹ dị malhegheri bọ.

Yira kotue ni oḅạ ikpo onhụ okparamhiọm abuphẹ r’ayira oḅọph bọ oḍighi. Olhoghi ayira ra/ḅaạl ghan mem dị oye usẹph iyira loor esi ikuph dị yira olhọgh oḍighi iyaạr? AZizọs aḅenhị ghan ni budaphạm mọ odị imạ dị bidị oḍighi. (Poghom Matiu 25:19-23; Luk 10:17-20.) Odị aḅenhị kẹn bidị mọ bidị ‘koḍighi ni idị epu’ ipẹ onọ aḍighi bọ. (Jọn 14:12) Ḍughul phọ aḍiphẹ eḅaạl kokiigh bọ nyodị, odị asẹph ni butelhedom mọ odị mọ: “Nyina kụ irolạn bọ omạn amị oomo phọ amem mọ odẹgh ophogh phọ uteẹny ghan bọ imị.” (Luk 22:28) Gbiom olhoghi anạ odọ idị ikpo onhụ phọ iphẹn phọ etir ekpom mọ abidị eḅilhẹ enyu bidị oḍighi iyaạr! Esi iduọn phọ, eḍighi maạr dị yira osẹph ghan buphẹ r’ayira oḅọph bọ oḍighi, olhoghi abidị kakạr kụ aḅaạl kụ oḅilhẹ oḍighi idị epu siphẹ.

Onyọ umor dị oghol mọ Kayode aḅẹm mọ, “i/moghi mọ ogey oye dị aḅọph oḍighi r’abunhọn aḍighi oye dị amhunhughan, kuolọ odị kaḍighi ghan idị abuẹn r’odị rokumuan bọ komoọgh oḅaạl olhoghi ḅilhẹ r’idị oḍighi phọ kadughanhaan bidị.” Nạ aḍighi ni odọ oye phọ ophọn phọ ḍughụm? Nạ atue ni apuru iyạl ikpo abumor r’abumarani ilọ odọ oye phọ nạ aru bọ idị egbolhomaam oghaạph phọ ophọn phọ. Eḍighi maạr dị bidị rokelhọm ghan ni okumuan r’anạ, idiphọ abumatuạn phọ aZizọs oghelhọm ghan bọ okumuan r’aZizọs, pọ nạ katue ni aḅẹm aani iphẹn otelhedom mọ aPọl aḅẹm bọ mọ: “Yoor ghụn [oḅọph oḍighi r’anyina] obọ nyina emoọgh oḅaạl ologhi.”—2 Kọr. 1:24.