Benɛ Yesu ngɛ hiɔwe ɔ, e kase suhi nɛ maa ye bua lɛ konɛ e kɛ nihi nɛ pee kake kɛ tsu ní. Nɛ benɛ e ba zugba a nɔ ɔ, e kɛ nihi pee kake kɛ tsu ní. Kɛ wa ma plɛ kɛ ná Yesu nɔ hyɛmi nɔ́ ɔ he se ha kɛɛ? Ke wa susu e nɔ hyɛmi nɔ́ ɔ he saminya a, wa maa na sisi tomi mlaa etɛ nɛ ma nyɛ maa ye bua wɔ konɛ waa kɛ nihi nɛ pee kake kɛ tsu ní. Sisi tomi mlaa nɛ ɔmɛ ma nyɛ maa ye bua wɔ konɛ kake peemi nɛ hi waa kɛ wa nyɛmimɛ ɔmɛ wa kpɛti.

Nɔ nɛ e kɛ nihi peeɔ kake kɛ tsuɔ ní ɔ buɔ nihi nɛ e kɛ mɛ tsuɔ ní ɔ nɛ e pee we nɔ́ ko kɛ tsɔɔ kaa e he hia pe mɛ. Yesu kase he si bami su nɛ ɔ kɛ je e Tsɛ ɔ ngɔ. E ngɛ mi kaa Yehowa pɛ nɛ a ma nyɛ ma tsɛ lɛ ke Bɔlɔ mohu lɛɛ, se e suɔ nɛ ni kpahi nɛ a le ní tsumi nɛ e he hia nɛ e Bi ɔ tsu ɔ. Wa na enɛ ɔ ngɛ munyu nɛ Mawu tu ɔ mi. E de ke: “Nyɛ ha nɛ waa pee nɔmlɔ adesa; a maa hi kaa bɔ nɛ wa ngɛ ɔ.” (1 Mose 1:26) Jamɛ a munyu ɔ nɛ Yehowa tu ɔ ha nɛ Yesu na kaa Yehowa baa e he si wawɛɛ.—La 18:35.

Benɛ Yesu ba zugba a nɔ ɔ, lɛ hu e ba e he si jã nɔuu. Benɛ nihi je e yi ngɛ níhi nɛ e tsu ɔ he ɔ, e ngɔ yi jemi ɔ kɛ ha Mawu. (Maak. 10:17, 18; Yoh. 7:15, 16) Yesu ha nɛ tue mi jɔmi hi e kɛ e kaseli ɔmɛ a kpɛti, nɛ e kɛ mɛ hi si kaa e huɛmɛ se pi e nyɔguɛhi. (Yoh. 15:15) E fɔ a nane he konɛ e kɛ tsɔɔ mɛ bɔ nɛ he si bami he hia ha. (Yoh. 13:5, 12-14) E sa nɛ waa kase lɛ nɛ wɔ hu waa bu nihi nɛ waa kɛ mɛ tsuɔ ní ɔ, nɛ wa ko fo wɔ pɛ wa nɔ́ mi. Ke  ‘wa buɔ wa sibi’ ɔ, lɔ ɔ ma ha nɛ wa tsu babauu nɛ wa be blɔ hyɛe kaa be fɛɛ be ɔ, a je wa yi.—Rom. 12:10.

Nɔ nɛ baa e he si ɔ le kaa “he nɛ ga woli hiɛ ngɛ ɔ, níhi yaa nɔ pɛpɛɛpɛ.” (Abɛ 15:22) Ke wa ngɛ níhi a si kpamihi kɛ nyɛmihi fuu po ɔ, e sa nɛ waa le kaa nɔ ko be nɛ e le nɔ́ fɛɛ nɔ́. Yesu po kplɛɛ nɔ kaa tsa pi nɔ́ fɛɛ nɔ́ nɛ e le. (Mat. 24:36) Jehanɛ hu ɔ, Yesu suɔ kaa e maa le e kaseli nɛ a yi mluku ɔ a susumihi loo níhi nɛ a le ɔ. (Mat. 16:13-16) Enɛ ɔ he je nɛ nihi nɛ e kɛ mɛ tsuɔ ní ɔ a bua jɔɔ kaa a maa hi e kasa mi ɔ nɛ! Ke wa ba wa he si nɛ wa kai kaa tsa pi nɔ́ fɛɛ nɔ́ nɛ wa le, nɛ wa buɔ ni kpahi a susumi tue ɔ, lɔ ɔ ma ha nɛ tue mi jɔmi maa hi waa kɛ wa nyɛmimɛ wa kpɛti nɛ ‘níhi maa ya nɔ pɛpɛɛpɛ.’

E he hia nɛ asafo mi nikɔtɔmahi nɛ a kase Yesu he si bami ɔ ke a kɛ asafo mi nikɔtɔma kpahi pee kake kɛ ngɛ ní tsue. E sa nɛ a kai kaa mumi klɔuklɔu ɔ ma nyɛ maa ye bua asafo mi nɔkɔtɔma amɛ a ti nɔ fɛɛ nɔ nɛ e de nɔ́ ko nɛ ma nyɛ maa ye bua mɛ kɛ mwɔ yi mi kpɔ nɛ da. Ke asafo mi nikɔtɔma amɛ kpe nɛ mɛ tsuo a nyɛ nɛ a je a juɛmi kpo faa a, lɔ ɔ ma nyɛ maa ye bua konɛ a mwɔ yi mi kpɔ nɛ asafo ɔ ma ná he se.

Nɔ nɛ e kɛ nihi peeɔ kake kɛ tsuɔ ní ɔ susuɔ nihi nɛ e kɛ mɛ tsuɔ ní ɔ a he. E pee we kpɛii, nɛ e nuɔ e nyɛmimɛ ɔmɛ sisi. E ngɛ heii kaa Yesu ná he blɔ kɛ na bɔ nɛ e Tsɛ ɔ susuɔ nihi a he ha a. Kaa nɔ hyɛmi nɔ́ ɔ, jinɛ adesahi tsuo sa gbenɔ, se Yehowa tsɔ e Bi ɔ kɛ ba konɛ e ba kpɔ̃ adesahi kɛ je jamɛ a gbenɔ fɔ bumi ɔ sisi.—Yoh. 3:16.

Ke e he hia nɛ Yesu nɛ kplɛɛ nɔ́ ko nɔ ngɛ si fɔfɔɛ ko mi ɔ, e peeɔ jã. Mo kai kaa Israel bi ɔmɛ a ngɔ nɛ a tsɔ Yesu kɛ ba mohu lɛɛ, se e ye bua Foinike yo ko. (Mat. 15:22-28) E hyɛ we níhi fuu blɔ kɛ ji e kaseli ɔmɛ a ngɔ. Benɛ e huɛ Petro kua lɛ ngɛ nihi a hɛ mi ɔ, Yesu pee klaalo kaa e kɛ e tɔmi ɔ maa ke lɛ. Pee se ɔ, Yesu ngɔ blɔ nya ní tsumi nguahi kɛ wo Petro dɛ. (Luka 22:32; Yoh. 21:17; Níts. 2:14; 8:14-17; 10:44, 45) Yesu nɔ hyɛmi nɔ́ ɔ ha nɛ wa na kaa ke wa pee we kpɛii nɛ wa nuɔ wa nyɛmimɛ ɔmɛ a sisi ɔ, lɔ ɔ ma ha nɛ ‘nihi tsuo maa le kaa wa susuɔ nɔ he.’—Filip. 4:5.

Jehanɛ hu ɔ, ke wa susuɔ nihi a he ɔ, lɔ ɔ maa ye bua wɔ konɛ waa ngɔ wa he kɛ wo si fɔfɔɛ slɔɔtohi a mi, nɛ waa kɛ nɔ fɛɛ nɔ ma nyɛ ma tsu ní ngɛ tue mi jɔmi mi. Yesu  kɛ nihi nɛ a bɔle lɛ ɔ hi si saminya, enɛ ɔ ha nɛ e he nyɛli nɛ a hɛ kɔ̃ɔ e nɔ ɔ po de ke e ji “tó tsuli kɛ yayami peeli a huɛ,” nɛ mɛ ji nihi nɛ́ a buɔ lɛ tue. (Mat. 11:19) Anɛ wɔ hu wa ma nyɛ maa kase Yesu nɛ waa kɛ ni kpahi nɛ pee kake kɛ tsu ní lo? Louis nɛ e kɛ nihi slɔɔtoslɔɔtohi tsu ní benɛ e ji kpɔ mi nɔ hyɛlɔ kɛ benɛ e ngɛ Betel ɔ de ke; “Ke o kɛ nihi slɔɔtohi nɛ a yi mluku ngɛ ní tsue ɔ, e ngɛ kaa nɔ́ nɛ o ngɔ tɛ slɔɔtoslɔɔtohi nɛ e slo eko fɛɛ eko klemi kɛ ngɛ gbogbo fiae. Se akɛnɛ e slo tɛ ɔmɛ eko fɛɛ eko klemi he je ɔ, e biɔ mɔde bɔmi loko o ma nyɛ maa fia gbogbo ɔ. Se o ma nyɛ maa fia gbogbo ɔ nɛ e maa da saminya. I bɔ mɔde kaa ma pee tsakemihi konɛ i kɛ nihi nɛ tsu ní ngɛ tue mi jɔmi mi bɔ nɛ pee nɛ ní tsumi ɔ nɛ ya nɔ.” Enɛ ɔ ji su kpakpa!

Mɛni blɔ nɔ wa ma nyɛ maa gu kɛ tsɔɔ kaa wa susuɔ nihi nɛ waa kɛ mɛ ngɛ asafo ɔ mi ɔ a he? Wa ma nyɛ maa pee jã ke wa kpe ngɛ wa fiɛɛmi yami kuu ɔmɛ a mi. Waa kɛ fiɛɛli nɛ a tsuɔ blɔ nya ní tsumi slɔɔtohi a he ní ngɛ a weku ɔmɛ a mi aloo fiɛɛli nɛ e slo jehahi nɛ a ye ma nyɛ maa ya fiɛɛmi pe bɔ nɛ wa peeɔ ɔ. Anɛ wa ma nyɛ maa to wa tsui si konɛ waa kɛ mɛ nɛ tsu fiɛɛmi ní tsumi ɔ fã nɛ a ma nyɛ maa ngɔ a he kɛ wo mi ɔ konɛ a ná bua jɔmi babauu ngɛ fiɛɛmi ní tsumi ɔ mi lo?

E sa nɛ nɔ nɛ e kɛ nihi peeɔ kake kɛ tsuɔ ní ɔ ‘nɛ e pee klaalo kaa e ma ha nihi níhi nɛ e ngɛ ɔ eko.’ (1 Tim. 6:18) Benɛ Yesu kɛ Yehowa ngɛ ní tsue ɔ, e ngɛ heii kaa Yesu yɔse kaa e Tsɛ ɔ ngɔɛ nɔ́ ko kɛ laa we lɛ. Benɛ Yehowa “ngɔ hiɔwe kɛ to e blɔ he” ɔ, Yesu “ngɛ lejɛ ɔ,” nɛ e kase nɔ́ ko kɛ je Yehowa ngɔ. (Abɛ 8:27) Pee se ɔ, Yesu kɛ bua jɔmi de e kaseli ɔmɛ “níhi tsuo nɛ [e] nu” kɛ je e Tsɛ ɔ ngɔ ɔ. (Yoh. 15:15) Wa ma nyɛ maa kase nɔ hyɛmi nɔ́ nɛ ɔ konɛ wa de nihi nɛ waa kɛ mɛ peeɔ kake kɛ tsuɔ ní ɔ níhi nɛ wa le kɛ wa níhi a si kpamihi. Ngɛ anɔkuale mi ɔ, nɔ nɛ e kɛ nihi peeɔ kake kɛ tsuɔ ní ɔ be níhi nɛ e sa kaa a le aloo níhi nɛ maa ye bua mɛ ɔ ngɔe kɛ laa mɛ konɛ e kɛ ye a nɔ. Mohu ɔ, e bua maa jɔ he kaa e ma de nihi ní kpakpahi nɛ e kase ɔ.

Jehanɛ hu ɔ, wa ma nyɛ maa wo nihi nɛ waa kɛ mɛ peeɔ kake kɛ tsuɔ ní ɔ he wami. Ke nɔ ko yɔse kaa wa ngɛ mɔde bɔe nɛ e je wa yi ɔ, anɛ wa bua jɔɛ lo? Yesu de nihi nɛ e kɛ mɛ pee kake kɛ tsu ní ɔ su kpakpahi nɛ e na ngɛ a he. (Kɛ to Mat. 25:19-23; Luka 10:17-20 ɔ he.) E de mɛ ke a “ma tsu ní tsumihi nɛ a kle pe” nɔ́ nɛ e tsu ɔ po. (Yoh. 14:12) Gbɔkuɛ nɛ e nɔ jena e ma gbo ɔ, e je e bɔfo anɔkualetsɛmɛ ɔmɛ a yi nɛ e de ke: “Nyɛ ji nihi nɛ nyɛ mɛtɛ ye he ngɛ ye ka amɛ a mi.” (Luka 22:28) Hyɛ bɔ nɛ Yesu munyu ɔ maa wo mɛ he wami konɛ a tsu babauu ha! Ke wɔ hu wa jeɔ nihi nɛ waa kɛ mɛ tsuɔ ní ɔ a yi ɔ, e ngɛ heii kaa a bua maa jɔ wawɛɛ nɛ a ma tsu babauu.

Nyɛminyumu ko nɛ a tsɛɛ lɛ Kayode ɔ de ke: “Ke a ke nɔ ko nyɛɔ nɛ e kɛ nihi tsuɔ ní saminya a, lɔ ɔ tsɔɔ we kaa e ye mluku, se mohu e haa nɛ nihi nɛ e kɛ mɛ tsuɔ ní ɔ a bua jɔɔ nɛ e haa nɛ ní tsumi ɔ peeɔ gbɔjɔɔ ha mɛ.” Anɛ o ji nɔ ko nɛ o nyɛɔ nɛ o kɛ nihi peeɔ kake kɛ tsuɔ ní saminya lo? Eko ɔ, o ma nyɛ ma bi o nyɛmimɛ Kristofohi nɛ o kɛ mɛ tsuɔ ní ɔ konɛ a de mo bɔ nɛ o kɛ ní tsumi ngɛ ha. Ke a bua jɔɔ ke a kɛ mo ngɛ ní tsue kaa bɔ nɛ Yesu kaseli ɔmɛ a bua jɔɔ ke a kɛ lɛ ngɛ ní tsue ɔ, lɛɛ mo hu o ma nyɛ ma de kaa bɔ nɛ bɔfo Paulo de ɔ. E de ke: “Wa ji nihi nɛ a piɛɛ nyɛ he kɛ ngɛ ní tsue ngɛ nyɛ bua jɔmi nami he je.”—2 Kor. 1:24.