Иисус Адазыла иштеп турала, јакшы кылык-јаҥдарга ӱренип алган. Ого бу кылык-јаҥдар јерге келерде улусла иштеерге болушкан. Бис Иисустаҥ кандый тем аларыс? Оныҥ теминеҥ улуска бисле иштеерге јеҥил болзын деп болужатан ӱч принцип кӧрӧрис. Бу принциптерди тузаланзаас, ака-эјелерле эптӱ-јӧптӱ иштеерис.

Јобош кижи кожо иштеп турган улузын баалап јат. Ол бойын улустаҥ бийик тутпай јат ла бойына ӧйинеҥ ӧткӱре ајару этпей јат. Иисус мындый кылык-јаҥга Адазынаҥ ӱренип алган. «Јайаачы» деп јӱк ле Иегова адалар јаҥду да болзо, ол бойыныҥ уулыныҥ ижин баалаган, оныҥ учун кижи јайап јадарда мындый сӧстӧр айткан: «Биске кеберлеш, бис ошкош кижи јайайлы» (Баш. 1:26). Иисуска мындый сӧстӧрди угарга сӱреен јараган болор (Сар. 18:35).

Иисус јерге келерде Адазы ла чылап јобош болгон. Темдектезе, улус оны мактап турза, ол бастыра макты Адазына јетиретен (Марк 10:17, 18; Иоанн 7:15, 16). Ол ӱренчиктерине бир де бийиркенбеен, олорды кулдар да деп кӧрбӧгӧн, карын најыларына чылап баштанатан (Иоанн 15:15). Керек дезе бир катап олордыҥ буттарын да јунган (Иоанн 13:5, 12—14). Бис Иисустаҥ неге ӱренерис? Бис ака-эјелерисле кожо иштенип турзаас, бойысты олордоҥ бийик тургуспазыс, бойыстыҥ кӧрӱмисти јылдырарга албаданбазыс.  Карын олордыҥ кӧрӱмин тооп, олорды баалап турарыс (Рим. 12:10). Бу алтамдарды ундыбай турзаас, бистиҥ ижис јакшы барар.

Јобош кижи оҥдоп јат, «јӧптӧжип тургузылган амаду бӱдӱп калат» деп (Укаа 15:22). Бис кандый да јайалталу, ченемелдӱ болзоос, та нени де тӱҥей ле билбей јадыс. Иисус та кезик немени билбес болгон (Матф. 24:36). Оныҥ учун ол ӱренчиктериниҥ кӧрӱм-санаазын сурап угуп туратан (Матф. 16:13—16). Мынаҥ улам ӱренчиктерине оныла кожо иштенерге јеҥил болгон. Бис кезик немени билбей јадыс деп оҥдоп турзаас, ака-эјелердиҥ кӧрӱм-санаазын сурап угуп турарыс. Анайып, олорго бисле иштенерге јеҥил болор. Ол тушта, тургузылган амаду бӱдӱп калар.

Мындый кылык-јаҥ анчада ла аксагалдарга керектӱ. Темдектезе, олор кандый бир суракты шӱӱжип јатса, агару тын јӱк ле бир аксагал ажыра айдып турган эмес деп ундыбас керек. Аксагалдар Иисустаҥ тем алып, бой-бойына тоомјылу баштанып турза, кажы ла аксагалга бойыныҥ кӧрӱм-санаазын айдарга јеҥил болор. Мындый айалгада јӧптӧшкӧни јуунга тузазын јетирер.

Јобош кижи кожо иштеп турган улузыныҥ кӧрӱм-санаазыла јӧпсинерге белен болот. Иисус Адазыла иштеп турала, оныҥ мындый кылык-јаҥын кӧп кӧргӧн. Темдектезе, улус ӧлӧр учурлу болгон до болзо, Иегова олорды ӧлӱмнеҥ јайымдаарга, бойыныҥ Уулын берген (Иоанн 3:16).

Иисуста мындый кылык-јаҥ база бар болгон. Темдектезе, Иисус «јӱк ле Израильдиҥ азып јӱрген койлорына» ийилген де болзо, финикий ӱй кижиге болужып јат (Матф. 15:22—28). Ол бойыныҥ ӱренчиктеринеҥ де кӧп неме сакыбаган. Бир катап оны јуук најызы, Пётр, садып ийерде, Иисус ого ачынбай, јаманын таштап салган. Керек дезе ого јаан јакылталар берген (Лука 22:32; Иоанн 21:17; Ап. ижи 2:14; 8:14—17; 10:44, 45). Айдарда, Филиппыдагыларга 4:5-те бичилген: «Кӱӱнзек [«јобош», ЈТ] болгоныгарды ончо улус кӧрзин» — деген сӧстӧрди Иисус бӱдӱрип јӱрген. Бис оноҥ тем алар аргалу.

Јобош кижиге башка-башка улусла иштеерге јеҥил болуп јат. Иисус дезе улусла јеҥил куучындажа берип турар болгон. Оныҥ учун кезик улус ого кӱйӱнип, оны  «каланчылардыҥ ла кинчектӱлердиҥ најызы» дейтен (Матф. 11:19). А улуска бисле иштеерге јеҥил болзын деп нени эдерге јараар? Луис ака бойы керегинде мынайып куучындаган: «Мен Бет-Элде иштеп турарымда, јорыкчы ишчи болуп турарымда, башка-башка ака-эјелерле иштегем. Мениҥ кӧрӱмим мындый: бис башка-башка таштар, је андый да болзо, бистеҥ тӱс стене эдип ийерге јараар. Стене тӱс болзын деп, мен нени эдер аргалу? Башка-башка таштардыҥ болчок-калчак јерлерин тӱзедердиҥ ордына олорды эптӱ, бой-бойлорына келиштире эдип салар керек. Оныҥ учун кажы ла кижини тӱзеткенче, бойымды тӱзедерге албаданып јадым. Мынайып эдип турзаҥ, иш качан да турбас, карын јакшы, тӱрген барар». Бу ака бистерге тем болуп јат.

Бис јуунда канайып јобош болорыс? Јуунда бистер кандый ла ака-эјелерле јарлап јадыс. Темдектезе, јажы јаан ака-эјелерле, билелӱ ол эмезе јаҥыскан ака-эјелерле јарлайдыс. Олорды бисле кожо јарлаганынаҥ сӱӱнчи алзын деп турган болзоос, ака-эјелердиҥ айалгаларын, кӧрӱмин ајаруга алып турзаас јакшы болор.

Јобош ишчи билер немезин бир де јажырбай јат (1 Тим. 6:18). Иисус дезе Адазына «теҥерини јайаарга» болужып турарда, оныҥ кысканбазын ла немени бир де јажырбай турганын кӧргӧн (Укаа 8:27). Кийнинде ол бойы да мындый кылык-јаҥду болгон. Темдектезе, ол јерде болордо ӱренчиктерине Адазынаҥ ончо уккан немезин куучындап туратан (Иоанн 15:15). Бис мынаҥ неге ӱренедис? Ака-эјелерле билгирлерисле, ченемелисле ӱлежип јадыс. Нениҥ учун дезе јобош кижи јаҥы немени јӱк ле мен билейин, улус јаҥыс мени мактазын деп сананбай јат.

Анайда ок кысканбас кижи кожо иштеп турган улузын мактап јат. Слерди кем-кем мактап ийзе, слерге јакшы дезеер. Иисус та бойыныҥ ӱренчиктерин мактап туратан (Матф. 25:19—23; Лука 10:17—20). Керек дезе ол ӱренчиктери керегинде: «Олор оноҥ до артыкты эдер» — деп айткан (Иоанн 14:12). Божоор алдында Иисус ӱренчиктерин мактаарга, мындый сӧстӧр айткан: «Мениле кожо ончо ченелтелерди ӧттигер» (Лука 22:28). Иисустыҥ мындый сӧстӧрин угуп, ӱренчиктердиҥ кӱӱни сӱреен тыҥ кӧдӱрилген. Бистер де анайып ла кожо иштеп турган улузысты акту јӱрегистеҥ мактап, олорго јылу сӧстӧр айдып турзаас, олордыҥ кӱӱни де кӧдӱрилер, этпести де эдип салар.

Толо кеминде эмес те кижи улусла амыр-энчӱ иштеер аргалу. Бир аканыҥ темин кӧрӱп ийектер. Оныҥ ады Кайоде. Ол айдат: «Мен ака-эјелердиҥ кӱӱнин кӧдӱрерге, олорды мактап јадым. Анайда ок иш тӱрген, јеҥил, јакшы барзын деп албаданып јадым». Слер андый кижи бе? Бу сурактыҥ каруузын билерге, ака-эјелердеҥ сурап ийерге јараар. Канайып апостолдорго Иисусла иштеерге јеҥил болгон, анайып ла ака-эјелерге слерле иштеерге јарап турган болзо, слерди апостол Павелдеҥ тем алып турганаар учун мактаарга јараар! (2 Кор. 1:24).