Itiniho i kakarayan ci Yis adihayay ko mananamay a makapahay capeling, mansa tayni cingra i fafekang no sera ngaˈayay patireng to taˈarawan no itihiay a tamdaw, pasifanaˈ cangranan sasamaan malo ngaˈayay a cafay matayal. Songilaˈen ita mihapinang ko taˈarawan ni Yis, mamananam ko tolo safalod, padama kitaanan malo ngaˈayay a cafay matayal, matongal ko kakelec a mararihaday to salikaka.

O cecay ngaˈayay a cafay matayal o misapoeneray, caay pahiyo to niyah, misaaretengay minengneng to kalacafayay cingranan matayal a tamdaw. Ci Yis mikitiniay i Wama ningra minanam tonini misapoeneray a waywayan. Soˈlin edengan ci Yihofa ko citodongay to ‘Misangaˈay Tatapangan’ a ngangan, kawra makalimay Cingra mafanaˈ ko tamdaw mirienangay ci Yis tonini kalimlaan a tayal. Sanay Cingra: ‘Tooren ita ko milecaday kitaanan a misangaˈ to tamdaw.’ (Satapangan 1:26) Mikitini tonini a sowal maedeng mahapinangay ni Yis tada misapoeneray ko kakarayan a Wama.—ˈOlic 18:35.

Itiniho i fafekang no sera ci Yis misapoeneray. Pakahemek ko tao cingranan i, panokayan ningra ko ˈdil i Kawas. (Marko 10:17, 18; Yohani 7:15, 16) Malacafay cingra to nisawawaan i, pairaay to rihadayay a kacacawmaˈ. O widang sanay ko pinengneng ni Yis to nisawawaan, cowa ko koli. (Yohani 15:15) Patadoayho to nisawawaan misawsaw to waˈay, tano mahaenay a pakayraan pasifanaˈ cangranan paihkal to misapoeneray.  (Yohani 13:5, 12-14) O mamikangodo kita to kalacafayay kitaanan matayal a salikaka, aka misaareteng to niyah a minengneng. Ano ‘masasingodo’ kita, eca ka calemcem maˈafas no tao ko kalikoan no niyah, o ngangaˈayto adihay ko midemakan saki Yihofaan.—Loma 12:10.

Mafanaˈay ko misapoeneray a tamdaw ‘ano milayap to ciepocay a sowal i, o mamalaheci ko demak.’ (Taneng 15:22) Ano hakowaayto ko kadofah no milifetan ita, hakowaay ko ˈicel, haratengen iraayho ko kafokilan. Mihayay ci Yis, iraay ko kafokilan ningra a demak. (Matay 24:36) Roma i, soˈlin cowa ko malefotay ko nisawawaan, kawra kamayan sakacipinangaw cingra to harateng nangra. (Matay 16:13-16) Mansa o kalacafayay cingranan matayal a tamdaw rihadayay ko falocoˈ! Malecaday, mitafo kita to misapoeneray, mihayi to citolasay ko ˈicel no niyah, makahi a mitengil to sapaini no tao, o mamicowat to rihadayay, malacafay to tao a milaheci to demak.

Ano malacafay ko malohemay malitengay matayal i, mamikiriwiˈ a mitodong ci Yisan, masasingodo. Haharatengen nangra, o fangcalay saocor ngaˈayay pakayni kahacecay a malohemay malitengay a dademak, pakayra cingranan a mihadak to matatodongay a sapaini, ho matatodong ko misaˈosian no kasacefang no malohemay malitengay. Ano masaˈopo ko malohemay malitengay i, ano rihaday malacafay, ngaˈay ko kahacecay tamdaw mihadak to hasowal, o papalemed to kasakopang ko misaˈosian nangra.

O cecay ngaˈayay cafay matayal a tamdaw ano kalacafay to tao matayal i, makahiay a micaˈi, makahiay a misalof. Maedeng adihayay ko toki ni Yis mihapinang to makahiay micaˈi ko kakarayan a Wama. Tinakoen, samanen iraay ko raraw no tamdaw, nao mamapatay, kawra miocoran ni Yihofa ci Yis a milidong to tamdaw miliyas to patay.—Yohani 3:16.

Ano kalimlaan anca matatodongay a tatokian, makahiay ci Yis a misalof, palecad to saali no tao. Tinakoen, soˈlin maocoray ci Yis padama to Israil tamdaw, kawra kinacecayay padamaan ningra ko cecay Foinikiya fafahiyan. (Matay 15:22-28) Matatodongay ko pilongoc ningra to nisawawaan. O ngaˈayay widang ningra ci Pitiro soˈlin cowa pihayi cingranan i kaˈayaw no ˈalomanay, cowa paifalocoˈen ningra konini a raraw, ikor pafeliay to kalimlaan a tayal ci Pitiroan. (Luka 22:32; Yohani 21:17; Dmak 2:14; 8:14-17; 10:44, 45) O taˈarawan ni Yis mitadtaday oha mamakahi kita a misalof, mifanaˈ to polong a tamdaw makahiay kita a pacaˈi.—Filipi 4:5.

 O makahiay micaˈi a capeling padamaay kitaanan makahi a misalof, ngaˈay malacafay to masakenakenaay tamdaw a matayal. Ngaˈayay ko kalacafay ni Yis to itihiay a tamdaw, o roma misafelitay cingranan a tamdaw tada maˈinapay, pakokot cingranan ‘malawidangay to milisataay ato mararaway tamdaw.’ (Matay 11:19) Wa ngaˈay kita malecad ci Yisan, minanam kalacafay to romaroma tamdaw a matayal han? Cecay faˈinayan salikaka ci Lois, itini pilisoˈ to kasakopang ato itini Pitil matayal na kalacafayay to masakenakenaay salikaka a matayal, sanay cingra: “Malacafay to cowa ka lefot a tamdaw matayal, malecaday tano cowa ka lecad a fakeloh patireng to ˈadipel. Cowa ka lecalecad ko fakeloh, o mamihadak to adihayay a ˈicel, kawra saikor moecelay ko ˈadipel. Mihaenay misaˈicelay kako a misalof, mihaen o ngangaˈay micowat to rihadayay, malacafay to ˈalomanay milaheci to tayal.” O waywayan nonini a salikaka tada ngaˈayay nanamen no mita.

Itini kasakopang no niyah ngaˈay kita samaan paihkal to makahiay pacaˈi a waywayan han? Ano malacafay kita to kapot no niyah a matayal i, iraay ko toki malacafay to cowa ka lecad ko mihecaan anca ˈinorong no lomaˈ a salikaka a matayal. Ngaˈay kita misarocod a palecad cangranan, misalof to rakat anca pakayraan no niyah mitosil, ho ngaˈay cangra lipahak a mitosil han?

O ngaˈayay cafay a matayal wa “makahi a paladaˈ.” (1 Timoti 6:18) Malacafay ci Yis ci Yihofaan a matayal i, maedeng mahapinangay to cowa pihimed ci Yihofa to maanan cingranan. Tiya ‘patireng to kakarayan’ ci Yihofa i, ‘itiraay’ ci Yis itiya, mansa ngaˈay pasayra ci Yihofaan a minanam. (Taneng 8:27) Taynito ci Yis i fafekang no sera i, makahiay pasowal to nisawawaan to polong a matengilay i Wamaan. (Yohani 15:15) Mikitini taˈarawan ni Yihofa aci Yis mananamay ita, makahi a paladaˈ to sifanaˈ ato nalifetan no mita i cafay matayal. O cecay ngaˈayay cafay matayal cowa ko sapimetmetaw to fadangalan, padeteng saan mihimed to kalimlaan anca ciepocay a lihaf, ao mamakahi a paladaˈ to mananamay no niyah a sifanaˈ.

Cowa ko paladaˈ aca to sifanaˈ ato nalifetan, ngaˈayho kita micerid a pakalalok to cafay matayal. Ano masinanot no tao ko mihadakan ita a ˈicel, mikifalocoˈ a miakoˈid kitaanan, coko mitemeray to falocoˈ ita han? Misinanotay ci Yis to ngaˈayay no nisawawaan, padetengay a pakahemek cangranan. (Nengnengen ko Matay 25:19-23; Luka 10:17-20) Pasowalanho ningra ko nisawawaan, o midemakan nangra aikaka ko taˈangay to midemakan no niyah. (Yohani 14:12) Tiya ˈayaw no kinafalah cingra a dadaya pakahemekay to madimadiay a tarokos, saan: ‘Micada kako to sapalifet i, cowa piliyas kamo takowanan.’ (Luka 22:28) Onini a sowal madeng taˈangayay ko pakalalok to tarokos. Wa ngaˈay kita mitodong ci Yisan, pakahemek to kalacafayay kitaanan matayal a salikaka. Mihaen, mamatongal ko lipahak nangra, mamatongal ko kangaˈay no demak.

Cecay faˈinayan salikaka ci Kayite sanay: “O cecay ngaˈayay cafay matayal cowa pisaali to malefotay, kawra o papakahemek cingra to itihiay a tamdaw, misaˈicelho milowan to ˈinorong nangra.” O mahaenay a cafay matayal kiso han? Ngaˈayay licayen iso ko cafay iso matayal a salikaka samanay ko harateng. Ano maolahay cangra kalacafay tisowanan a matayal, malecad o kaolah no nisawawaan malacafay ci Yisan a matayal, o ngangaˈayto kiso malecad ci Pawloan, saan: ‘O malacafayay kita a matayal, o papakahemek tamowanan.’—2 Korinto 1:24.