Huenu mu, Jesús quimürpui fentren dungu tañi Chau mu, fei pengelpai mülepalu Mapu mu. Femngechi tati pu che cüdaulu quiñentrür Jesús engu, tañi ca femngechi femal. Famülque mu, ¿chumngechi quelluqueiñmu Jesús ñi femün? Hune, peaiñ cüla dungu taiñ quimal. Tüfa quelluaiñmu taiñ cüme compañyehual ca taiñ quiñeucüdaucüleal caquelu che iñchiñ.

Quiñe cüme compañ ñom piuquengequei ca falintuquei tañi pu compañ ñi cüdau. Cafei “iñche, iñche” piquelai, checahun-ngelai. Jesús mülelu huenu, quimürpui ñi Chau ñom piuquengen. ¿Chumngechi quimürpui? Jehová müten quiñelei itrocom dungu deumaquelu. Femfui rume, huelu falintufi tañi Fotüm ñi quellu. Femngechi mu, Jehová pengeli ñi falintuñmafiel tañi Fotüm ñi quellu. Feipifi: ‘Feula deumafiyu ta huentru. Iñchiu meu adentuleai’ (Gén. 1:26). Jehová feipilu tüfa, Jesús quimürpui ñi rume ñom piuquengen (Sal. 18:35).

Mapu mu mülepalu Jesús, ca ñom piuquengefui. ¿Chumngechi pengeli ñi ñom piuquengen? Tati pu che saquielumu, Jesús feipiquefui Chau Dios müten tañi saquingeal (Mar. 10:17, 18; Juan 7:15, 16). Cafei Jesús ayülequefui ñi cüme yeucüleal tañi pu discipulo engün. Fei engün tañi cona troquinielafi, doi mai, tañi hueni troquiniefi engün (Juan 15:15). Ca cüchanamunfi tañi pu discipulo,  femngechi ñi ñom piuquengeal engün (Juan 13:5, 12-14). Iñchiñ mülei taiñ inayentuafiel ta Jesús. ¿Chem chumaiñ? Mülei taiñ falintuafiel ñi femqueel taiñ pu compañ. Mülelai taiñ doyümuhual iñchiñ, doi mai, doyümafiyiñ fei engün tañi duamnieel. Checahun-ngenoliyiñ ca huelucontu yamuhuaiñ, femngechi fentren cümeque dungu femürpuafuiñ (Rom. 12:10).

Cafei ñom piuquengechi che, cüme llouquei ngülamtungelu. Feitachi che quimniei tañi pepicacünuel cüme tripayafui “mülen mu fentren ngülamtufe” (Prov. 15:22). Tunten adümuhun rume nieafuiñ, loncontucuaiñ inei no rume com quimnielai. Jesús cütu feipi ca quiñeque dungu ñi com quimnon (Mat. 24:36). Jesús ca ayüquefui ñi quimal ñi chem pin tañi pu discipulo, tunte culpafengefui rume engün (Mat. 16:13-16). Feimu peno tañi pu discipulo ayüucülequefuingün ñi mülen mu Jesús engün. Iñchiñ, ¿chem quimeltueiñmu tüfa? Ñom chengeliyiñ, quimliyiñ com dungu taiñ quimquenon ca eluucüleliyiñ taiñ allcütuafiel ta caquelu, cüme yeucüleaiñ taiñ pu compañ iñchiñ. Fei quiñentrür cüme tripayai taiñ cüdau.

Pu loncolelu quiñentrür cüdahuiyüm engün, mülei ñi ñom piuquengeal Jesús reque. Trahuluule pu loncolelu, fei engün mülei ñi quimnieal Jehová tañi nehuen quelluafui tuchi anciano rume ñi cüme feipial, femngechi ti troquiñ loncolelu cüme dulliafuingün tañi chumal. Ñi trahun mu engün, caque quiñeque loncolelu cüme duamquechi eluhuaingün tañi allcütual chem pial caquelu loncolelu.

Quiñe cüme compañ ngünefali, adcafali pingequei. Jesús mülelu huenu mu, quimi tañi Chau ñi adcafalngen. Raquiduamnge tüfa, culpalu ta Adán engu Eva, tati pu che condenalefui tañi layal engün. Huelu Jehová huercüfi tañi Fotüm ñi layal com pu che ñi duam mu (Juan 3:16).

Jesús ca femngechi adcafalngequefui. Jesús huercüngei ñi quelluafiel pu israelche müten, huelu pefilu quiñe domo Fenicia tuhun-ngelu ca quellufi (Mat. 15:22-28). Cafei Jesús üngümquelafui tañi pu discipulo ñi turpu culpanoal engün. Ca quiñe rupa, Pedro rangiñ pu che mu feipi ñi quimnofiel ta Jesús, huelu Jesús perdonaeyu ca  doi falinque cüdau elueyu Jesús (Luc. 22:32; Juan 21:17; Hech. 2:14; 8:14-17; 10:44, 45). Ñi femün mu Jesús, com pu cristiano mülei ñi adcafalngeal (Filip. 4:5).

Adcafalchengeliyiñ, eluucüleaiñ ñi cüdahual caquerume raquiduamniechi pu che iñchiñ. Por ejemplo, Jesús rume cüme yeucülequefui caquelu che engün. Feimu tañi pu caiñe ütrirqueyu. Fei hueniyequefi pu cofraquelu impuesto ca pu culpafe pingequefui Jesús (Mat. 11:19). ¿Caquerume raquiduamniechi pu che engün cüdahuafuiñ iñchiñ, Jesús reque? Quiñe peñi Luis pingelu, huitrancontuquefui trahunche ca cüdauquefui Betel mu. Taiñ peñi cüdauquefui caquerume che engün. Ti peñi feipi: “Cüdahuiyüm culpafe che iñchiñ, trürümquefuiñ caquerume cura mu ñi deumangeal quiñe cura malal. Mülei ñi cüme adcünungeal chi cura cheu ñi tucungeal, femngechi ñi cüme adcüleal chi cura malal. Chumngechi adelcaquefiñ chi cura, ca femngechi cüme adcünuquen ñi mongen ñi cüme yeucüleal caquelu che iñchiñ, femngechi ñi cüme tripayal ti cüdau”. ¡Müna cüme femquei chi peñi! ¿Feingelai?

Trahunche mu, ¿chumngechi pengelafuiñ taiñ ngünefalchengen? Amuldungun meu. Amuldunguafuiñ fillque peñi cam lamngen engün, ca caquerume tripantu niefule engün rume. Compañafuiñ engün ñi amuldungual carta mu, telefono, carrito mu chi, müte ayünofuliyiñ rume femngechi amuldungun. Femngechi quisu engün ayüucüleai.

Quiñe cüme compañ eluucülequei tañi quellucheal (1 Tim. 6:18). Jesús mülelu huenu mu, pefi ñi Chau Jehová ñi rücüquenoel chem no rume. Jehová deumafilu tati huenu, Jesús mülequefui ñi Chau engu, femngechi fentren dungu quimürpui (Prov. 8:27). Alün tripantu rupalu, Jesús mülepai Mapu mu, fei com tañi feipieteu tañi Chau feipifi tañi pu discipulo (Juan 15:15). Feimu cüdauliyiñ taiñ pu peñi ca pu lamngen iñchiñ, inahuentuafuiñ ta Jehová. Fei feipiafiyiñ taiñ pu peñi ca pu lamngen chem taiñ adümel. Quiñe cüme compañ llumumuuquelai tañi quimürpuqueel. Doi mai, nütramcaquei femngechi tañi quelluafiel tañi pu compañ. Quisu rume ayüquei ñi feipial tañi quimürpuel femngechi tañi quellucheal.

Cangelu dungu taiñ femal iñchiñ, yafültucuafiel taiñ pu compañ. Iñchiñ yafültucungeliyiñ ca feipingeliyiñ: “Müna cüme cüdau deumaimi”, ayüucülequeiñ ¿felei? Feichi dungu femi ta Jesús, yafültucufi ca feipifi tañi pu discipulo ñi cümelcan engün tañi cüdau mu (ca inaduamafuimi Mateo 25:19-23; Luc. 10:17-20). Jesús ca feipifi tañi pu discipulo ñi femürpuafel engün doi fütraque dungu tañi femqueel ta quisu (Juan 14:12). Jesús epe puulu ñi layal, yafültucufi tañi pu apostol. Feipifi: “Eimün ta compañquiyahulmuquen ta iñche tamün yafülmuafiel ñi cutrancahun meu” (Luc. 22:28). Pu apostol allcülu tüfa, müna ayüucülepelafuingün. Iñchiñ ca mülei taiñ yafültucuafiel taiñ pu compañ, femngechi doi ayüucüleaingün, ca doi cüme entuai ñi cüdau engün.

Quiñe peñi Kayode pingelu, feipi: “Culpanchengeliyiñ rume, cüme compañngerpuafuiñ”. Taiñ femün mu, ayühulcheafuiñ ca ayühunquechi cüdahuaingün. ¿Femngechi che am ta eimi? Cümeafui tami cüme ngüneduamuhual. Ramtuafuimi quiñeque peñi, lamngen, hueni chumngechi chengeimi ta eimi. “Iñche rume ayüquen tañi cüdahual eimi engu” pingelmi, cüme compañngeimi. Fei ti apostol Pablo reque feipiafuimi: “Ayüquen tamün quelluhuafiel ta eimün, fei femngechi tamün doi nieal ayühun” (2 Cor. 1:24).