Ngéda Yésu a bé sal ni Isañ, a bi nigle bilem gwé; jon a bé loñge so ngwelnson inyu banigil bé. Lelaa ndémbél yé i nla hôla bés? Ibale di nyoñ ngéda i ôt pék mu ndémbél yé, di nla léba mam maa ma ma nla hôla bés i sal loñge ni lôk kéé yés. Ma ga hôla bés i kônde sal ikété adna.

I mut a yé loñge so ngwelnson a suhus nyemede isi bana bape a tinak bo lipém, a nyéñ bé nene. Ngéda Yésu a bé sal ni Isañ, ha nyen a bi nigil i boñ hala. Tolakii Yéhôva nyen a bi hek mam momasôna, a bi éba le yak Yésu a bi sal ni nye. Hala a nene munu bibañga bi Yéhôva bini le: “Di hek mut ôñgba yés.” (Bibôdle 1:26) Yésu a bi lama kon maséé kiki Yéhôva a bi éba suhulnyuu hala.—Tjémbi 18:36.

Yak Yésu a bi éba suhulnyuu i ngéda a bi lo hana ’isi. I ngéda ba bé bégés nye inyu mam a bé boñ, a bé ti Yéhôva lipém. (Markô 10:17, 18; Yôhanes 7:15, 16) Yésu a bi boñ kii yosôna i bé béda inyu nôgla ni banigil bé, a bé tehe ki bo kiki mawanda mé ha kiki minkol bé. (Yôhanes 15:15) A bi jôwa yak bo makôô inyu niiga bo suhulnyuu. (Yôhanes 13:5, 12-14) Yak bés di nlama ti lôk kéé i i nsal ni bés lipém iloole di yéñ ndigi yéñe yés. I ngéda di ‘ntina lipém bés ni bés’ ni i ngéda di nyéñ bé ndik le bésbotama  bon ba tehe, di nla boñ ngandak mam.—Rôma 12:10.

Mut suhulnyuu a nyi le “mam ma nyon i ngéda bati maéba ba yé ngandak.” (Bingéngén 15:22, MN.) To ibale hala a yé ngandak ngéda le di nsal ngim bôlô tole di gwé ngandak makeñge, di nlama bé hôya le di nla bé yi mam momasôna. Yak Yésu a bi kal le a bé yi bé ngim mam. (Matéô 24:36) Ni ki le, tolakii banigil bé ba bé bikwéha bi bôt, a bé bat bo mahoñol map. (Matéô 16:13-16) Inyu hala nyen banigil bé ba bé maséé i sal ni nye. Hala nyen yak bés, ibale di ñunda suhulnyuu di yik le di ta bé le di yi mam momasôna, di nwahak ki le lôk kéé i ti map mahoñol, di nsal ni bo ikété nsañ, “mam ma nyon” ki.

I yé loñge le mimañ mi noñ ndémbél i Yésu inyu jam li suhulnyuu i ngéda ba nsal ntôñ. Ba nlama yi le mbuu mpubi u nla tinde to umbe mañ i ti mahoñol ma ma yé malam i ngéda ba yé i boma mimañ. Ibale mimañ mi nwas le hiki mut a ti mahoñol mé, hala a ga boñ le ba yoñ makidik ma ma ga hôla likoda jolisôna.

I mut a yé loñge so ngwelnson a nai ndik bé le nyen ba emble i ngéda a nsal ni bôt bape. A neebe mahoñol ma bôt bape. Yésu a bi yimbe le Isañ a ntôñ bôt bape i ngéda a bé sal ni nye. Kiki hihéga, a bi ep nye le a loo a tohol bôt ba binam ki le ba bé ba kôli ni nyemb.—Yôhanes 3:16.

Ngim mangéda Yésu a bé emble bôt bape. Kiki hihéga, tolakii Yéhôva a bi ep Yésu inyu hôla Lôk Israel, a bi hôla muda Fénikia. (Matéô 15:22-28) A bé bat bé to banigil bé le ba boñ jam ba nla bé boñ. Liwanda jé Pétrô li bi tañba nye bisu bi bôt, ndi to hala Yésu a bi nwéhél nye. I mbus, a bééga Pétrô ngandak minson. (Lukas 22:32; Yôhanes 21:17; Minson mi baôma 2:14; 8:14-17; 10:44, 45) Ndémbél i Yésu i niiga bés le ‘di nlama bé nai ni litehge jés li mam,’ ndi di nlama emble yak bôt bape.—Filipi 4:5.

Ngéda di nai bé ni litehge jés li mam, hala a mboñ le di sal ikété nsañ ni mintén mi bôt nwominsôna. Yésu a bé  nôgla loñge ni bôt kayéle i bet ba bé kil nye njôñ ba kahal kal le a yé “liwanda li bakottas ni li baboñbéba” ba ba bé emble nye. (Matéô 11:19) Baa yak bés di nla nôgla ni bôt bape kiki Yésu? Mankéé Louis nu a bi sal ni ngandak mintén mi bôt i ngéda a bé ngwélél makiiña ni i ngéda a bé sal i Bétel a nkal le: “Me bi léba le hiki ngéda di nsal ni lôk kéé, a yé ndik wee di mbédés libap li ndap ni ngok i i ta bé nlélém. Ibale di ntibil gwélél i ngok i, di nla bédés libap li téé. Me bi noode héñha ngim mam i niñ yem inyu boñ le me nôgla loñge ni lôk kéé.” Kinje mahoñol malam!

Imbe ngéda di yé le di éba le di nôgla toi ni lôk kéé yés? Di nla boñ hala ngéda di yé i juu jés li likalô. Di nla sal ni lôk kéé i i gwé bé nlélém mbegee ni bés tole i i ta bé bisega gwés. Di nla kena bo mbeñee, di sal ki minson mi mi yé le ba nla sal ngéda di yé likalô ni bo, inyu boñ le likalô li lémél bo.

Loñge so ngwelnson i nlama ba ‘bebee i kap.’ (1 Timôtéô 6:18) Ngéda Yésu a bé sal ni Yéhôva, a bi yimbe le Yéhôva a nsôô bé to yom. Ngéda Yéhôva a bi “kôôba ngii,” Yésu a “ba nyoo” a tehge. (Bingéngén 8:27) I mbus ngéda, yak Yésu a bi kal banigil bé “mam [a bi] nok” yak Isañ. (Yôhanes 15:15) Kiki Yésu, yak bés di nlama unda i bôt ba nsal ni bés mam di nyi. I mut a yé loñge so ngwelnson a nsôô bé makeñge ma bôlô ma ma yé le ma hôla i bôt ba nsal ni nye ndik inyule a nsômbôl le nyen ba tehe. A nlama ba maséé i unda i bôt ba nsal ni nye mam a nyi.

Di nla yak bégés i bôt ba nsal ni bés. Baa di ta di ba bé maséé ngéda mut a ntehe bôlô yés a bégés ki bés? Yésu a bé yoñ ngéda i bégés banigil bé. (Hégha ni Matéô 25:19-23; Lukas 10:17-20.) A bi kal yak bo le ba ga “boñ ki minson mi nloo” nwé. (Yôhanes 14:12) U wé u nsôk hana ’isi ilole a nwo, a bi bégés baôma bé ba ba bi téñbe ni nye a kal bo le: “Bé bon ni ntéñbe ni me ikété manoodana mem.” (Lukas 22:28) Bibañga bi, bi bi lama tihba bo, bi ti ki bo makénd! Yak bés ibale di mbéna bégés i bôt ba nsal ni bés ba ga kônde ba maséé, ba nla yak kônde bana makénd.

Mankéé wada le Kayode a nkal le: “Tolakii di ta bé peles, di nla ba loñge so ngwelnson ibale di nkônha lôk kéé i i nsal ni bés maséé di boñok le bôlô i yidil bañ bo.” Baa u yé loñge so ngwelnson? U nla bat lôk kéé i nsal ni we lelaa ba ntehe we. Ibale ba yé maséé i sal ni we kiki banigil ba Yésu ba bé maséé i sal ni nye, wee u yé le u kal kiki ñôma Paul le: “Di yé baso bagwelnson inyu maséé manan.”—2 Korintô 1:24.