I nun mɔ Zezi nin i Si bé dí junman’n, ɔ suannin ninnge wie’m be yolɛ yɛ ɔ yili nzuɛn kpakpa wie’m be nglo. Ɔ maan kɛ ɔ bali asiɛ’n su wa’n, ɔ nin sran’m be dili junman klanman. Wafa nga Zezi nin sran’m be dili junman’n, ɔ kle e ninnge cinnjin nsan. Ninnge sɔ’m be kwla uka e naan e nin e wiengu mun e bo w’a yo kun naan y’a di junman kpa likawlɛ.

Sɛ a kunndɛ kɛ a nin ɔ wiengu’m bé dí junman klanman’n, ɔ fata kɛ a yo wun ase kanfuɛ yɛ a bu ɔ wiengu’m be sran. I nun mɔ Zezi nin i Si bé dí junman’n, ɔ sieli i nzɔliɛ kɛ i Si ti wun ase kanfuɛ. I wie yɛle kɛ kannzɛ bɔbɔ Zoova yɛ ɔ yili like kwlaa’n, sanngɛ ɔ kunndɛli kɛ sran’m be si kɛ i Wa’n ukɛli i wie. I sɔ liɛ’n i ɲin fite ndɛ ng’ɔ kannin’n nun. Ɔ seli kɛ: “E yi sran kɛ e bɔbɔ sa cɛ.” (Bob. 1:26) Ndɛ nga Zoova kannin’n kle weiin kɛ ɔ ti wun ase kanfuɛ. E si kɛ i sɔ liɛ’n yoli Zezi i fɛ dan.​—Jue. 18:36.

I nun mɔ Zezi o asiɛ’n su wa’n, ɔ yoli wun ase kanfuɛ kɛ i Si sa. I wie yɛle kɛ, kɛ ɔ yoli ninnge mun mɔ sran’m be mɛnmɛnnin i’n, ɔ fali manmanlɛ’n mannin Zoova. (Mar. 10:17, 18; Zan 7:15, 16) Asa’n, ɔ nin i sɔnnzɔnfuɛ’m be trannin fɛfɛ. Ɔ nin be trannin kɛ sran kun nin i janvuɛ sa. (Zan 15:15) I kpa bɔbɔ’n, ɔ wunnzinnin be ja wun. I lɛ nun’n i waan ɔ́ klé be kɛ ɔ fata kɛ be yo wun ase kanfuɛ. (Zan 13:5, 12-14) E kusu, ɔ fata kɛ  e bu e wiengu nga e nin be di junman’n be sran. Yɛ nán e bu e ngunmin e ninnge liɛ’m be akunndan. Sɛ e bu e wiengu’m be sran’n, e su kunndɛman dunman. Ɔ maan e nin be dí junman klanman yɛ e junman’n bá nvlɛ.​—Rɔm. 12:10.

Sran ng’ɔ ti wun ase kanfuɛ’n, ɔ wun i wlɛ kɛ like “nga bé yó-ɔ, afɔtuɛ manfuɛ’m be ti yiɛ i wun kpanngban’n, ɔ yo ye.” (Nya. 15:22) Kannzɛ e si like kaka yo’n, sanngɛ e siman ninnge ngba. Zezi bɔbɔ dili i nanwlɛ kɛ nán ninnge ngba yɛ ɔ si i-ɔ. (Mat. 24:36) Asa’n, kannzɛ fɔ o i sɔnnzɔnfuɛ’m be nun’n, sanngɛ ɔ kunndɛli kɛ ɔ́ sí akunndan nga be bu i sa wie’m be su’n. (Mat. 16:13-16) I sɔ mɔ Zezi yoli’n ti’n, kɛ ɔ nin i be wo’n be wun fa be feke. E kusu, maan e yo wun ase kanfuɛ yɛ nán e wla fi su kɛ e siman ninnge ngba. Asa ekun’n, kɛ e nin e wiengu mun é dí junman’n, maan e tie be ndɛ liɛ nga be kan’n. Sɛ e yo sɔ’n, e nin be trán klanman yɛ junman nga é dí’n “ɔ́ yó ye.”

Asɔnun kpɛnngbɛn mun yɛ ɔ fata kɛ be nian Zezi i ajalɛ sɔ’n su kpa’n niɔn. Kɛ bé yó be aɲia’n, ɔ fataman kɛ be wla fi su kɛ Ɲanmiɛn kwla fɛ i wawɛ’n man be kwlakwla naan b’a fa ajalɛ kpa. Blɛ sɔ nun’n, maan be man sran kun i atin naan ɔ kɛn i klun ndɛ. Sɛ be yo sɔ’n, ajalɛ nga bé fá’n ɔ́ yó aniaan’m be kwlaa be ye.

Sɛ a kunndɛ kɛ a nin ɔ wiengu’m bé dí junman klanman’n, ɔ fataman kɛ ɔ like yolɛ yo ya. Kpɛkun nán se kɛ saan fii ɔ ndɛ liɛ nga a kan’n i su yɛ ɔ ka-ɔ. Sa sunman nun’n, Zezi sieli i nzɔliɛ kɛ i Si i like yolɛ yoman ya. I wie yɛle kɛ ɔ sunmɛnnin i asiɛ’n su wa kɛ ɔ wa kpɔ klɔ sran’m be ti. Kusu nn e nin i sɔ’n fataman.​—Zan 3:16.

Zezi kusu kleli kɛ i like yolɛ yoman ya. I wie yɛle kɛ cɛn kun’n, Fenisi bla kun seli i kɛ ɔ yo like kun mɛn i. Kannzɛ bɔbɔ Izraɛlifuɛ’m be ti yɛ ɔ bali’n, sanngɛ ɔ kplinnin su. (Mat. 15:22-28) Asa ekun’n, wafa ng’ɔ nin i sɔnnzɔnfuɛ’m be nantili’n kle kɛ i like yolɛ yoman ya wie. Cɛn kun’n Piɛli m’ɔ ti i janvuɛ kpa’n, ɔ kɛnnin i sran’m be ɲrun kɛ ɔ simɛn i. Sanngɛ Zezi yacili i wun sa’n cɛli i. I kpa bɔbɔ’n, ɔ kleli i kɛ ɔ te lafi i su. Afin ɔ mɛnnin i junman cinnjin wie mun. (Lik. 22:32; Zan 21:17; Yol. 2:14; 8:14-17; 10:44, 45) I lɛ nun’n, Zezi kleli kɛ ɔ fata kɛ ‘e yo sran mɔ i like yolɛ yoman ya-ɔ.’​—Fp. 4:5.

 Sɛ e nin sran fanunfanun e di junman klanman’n, é klé kɛ e like yolɛ yoman ya wie. Zezi nin sran wafawafa kwlaa be nantili klanman. I sɔ’n ti’n, i kpɔfuɛ’m be waan “ɔ ti lapo defuɛ nin sa tɛtɛ yofuɛ’m be janvuɛ.” (Mat. 11:19) ?Kɛ Zezi sa’n, é yó sɛ naan e nin sran wafawafa kwlaa y’a di junman klanman? Be flɛ aniaan bian kun kɛ Lui. Ɔ yoli akpasua sunianfuɛ yɛ ɔ dili junman Betɛli lɔ laa. I sɔ’n ti’n, ɔ nin aniaan fanunfanun be dili junman likawlɛ. Ɔ seli kɛ: “Kɛ mɔ fɔ o e kwlakwla e nun’n ti’n, kɛ ɔ ko yo naan e nin e wiengu mun y’a di junman likawlɛ’n, ɔ kwla yo kekle blɛ wie nun. Ɔ ti kɛ e waan e su fa yɔbuɛ mɔ be ngba be sɛman’n e fa kplan talɛ sa. Kɛ mɔ yɔbuɛ’m be ngba be sɛman’n ti’n, junman sɔ’n i dilɛ kwla yo kekle. Sanngɛ sɛ e mian e ɲin’n, é kwlá kplán talɛ sɔ’n. I sɔ’n ti’n, n yoli like kwlaa nga n kwla yo naan min nin aniaan’m be ngba y’a kwla di junman klanman.” Ajalɛ kpa yɛ aniaan bian’n kle e lɛ-ɔ.

?Asɔnun’n nun’n, wafa sɛ yɛ e kwla kle kɛ e like yolɛ yoman ya-ɔ? E kwla yi i sɔ liɛ’n i nglo wafa nga e nin aniaan nga be o e jasin fɛ bolɛ akpasua’n nun’n e nanti’n, i nun. Atrɛkpa’n, be nun wie’m be le bian annzɛ bla annzɛ be ngunmin yɛ be ta be mma mun-ɔn. Wie’m be kusu be te yo bakan yɛ wie’m b’a yo kpɛnngbɛn. Kɛ e nin be bó jasin fɛ’n maan e bu be akunndan.

Sɛ a kunndɛ kɛ a nin ɔ wiengu’m bé dí junman klanman’n, ɔ fataman kɛ ‘ɔ sa yo tankaan.’ (1 Tim. 6:18) I nun mɔ Zezi nin i Si bé dí junman’n, i Si w’a faman ninnge wie mun w’a fiɛmɛn i wun. Kɛ Zoova ‘síe ɲanmiɛn m’ɔ la nglo lɔ plaii’n,’ Zezi wunnin nun. Blɛ sɔ’n nun’n, Zoova kleli i ninnge wie’m be yolɛ. (Nya. 8:27) I sin’n, kɛ Zezi bali asiɛ’n su’n, like kwlaa nga i Si kleli i’n, ɔ fa kleli i sɔnnzɔnfuɛ mun. (Zan 15:15) Maan e nian Zoova i ajalɛ’n su. Yɛle kɛ ninnge nga e si be yo’n, maan e fa kle aniaan mun. Sran ng’ɔ nin i wiengu’m be di junman klanman’n, ɔ seman kɛ sɛ ɔ kle be like’n bé wá sí like trɛ́ i ti’n, ɔ kleman be like. Sanngɛ like kwlaa ng’ɔ si i’n ɔ fa kle be yɛ ɔ yo sɔ klun ufue su.

Asa ekun’n, maan e wla e wiengu nga e nin be di junman’n be fanngan. Kɛ e di junman mɔ sran’m be yo e mo’n, ɔ yo e fɛ. I sɔ’n ti’n, maan e yo e wiengu’m be mo wie. Kɛ Zezi i sɔnnzɔnfuɛ’m be di junman’n, ɔ fɛ i ɲin sie su kpɛkun ɔ yo be mo. (An nian Matie 25:19-23; Liki 10:17-20 be nun.) kpa bɔbɔ’n, ɔ seli be kɛ ‘ninnge nga bé wá yó’n, bé yó dan trɛ́’ i liɛ’n. (Zan 14:12) Asa’n, kɔnguɛ kasiɛn ka naan wa wu’n, ɔ yoli i akoto’m be mo. Ɔ seli be kɛ: “Amun liɛ’n, amun a wanndiman min blɛ kekle’n nun.” (Lik. 22:28) E si kɛ ndɛ sɔ’n wlali be fanngan kpa yɛ ɔ mannin be wunmiɛn naan b’a kwla di junman kpa. E kusu sɛ e yo be nga e nin be di junman’n be mo’n, bé dí aklunjɔɛ kpɛkun bé dí junman kpa ekun.

Be flɛ aniaan bian kun kɛ Kayode. Ɔ seli kɛ: “Sran ng’ɔ nin i wiengu mun di junman klanman’n, nán blɛ kwlaa nun yɛ ɔ yo ninnge mun sɛsɛsɛ-ɔ. Sanngɛ kɛ ɔ nin i wiengu’m bé dí junman’n, ɔ yo maan junman dilɛ’n yo pɔpɔ yɛ be wun kpaja be.” ?Kɛ a niɛn i sa’n, a ti i sɔfuɛ? I lɛ nun’n, a kwla usa aniaan nga a nin be di junman’n. Sɛ be se wɔ kɛ, kɛ be nin wɔ be di junman’n be wun kpaja be’n, á kwlá kán ndɛ kunngba nga akoto Pɔlu kannin’n wie. Ɔ seli kɛ: “Kɛ ɔ ko yo naan amun klun w’a jɔ’n, i ti yɛ e nin amun e di junman’n niɔn.”​—2 Kor. 1:24.