Ro nanggi, Yesus fyasnai rari-rari ḇefasnai ima min ḇefararur ḇepyum. Rofyor Yesus isya ro supswan ya, fyasnai nyan ḇepyum isoine fyararur kayam kuker ḇesesya. Payamyum rosai na kosmai ro Yesus nyan ḇepyum ḇyena ine? Kofarkor nyan ḇepyum ḇyena ido, bisa kosmai farkankin ri kyor bisa ḇefnoḇek ko fa koḇe min fararur ḇepyum. Farkankin anna nari nafnoḇek ko fa koḇeoser kuker min bena kakyar oser kuker konsya.

Min fararur ḇepyum ima nya sne ḇerun. Ḇyesyowi snonggaku ḇefararur kayam kuker i sya ma syewar snonsnon faro manggundi ḇa. Yesus fyarkor sne ḇerun ro Kmari. Yahwe demir monda kor I ḇe Manḇedaw, rariryano imarisen insa snonggaku sya sfawi snar Roma Ḇyedi nya fararur ḇefandun ro braur na. Roi ani komam naro Allah wos Ḇyena ine: ”Rwama kufrur snonkaku ḇemnis kuker ku.” (Kej. 1:26) Fyor Yahwe ikofen roi ani, Yesus fyawi snar Kmari irun sne kaku.​—Mz. 18:35.

Fyor isya ro supswan ya, Yesus nya sne ḇerun kako. Fafisu snonggaku sya sisandik Yesus snar ifrur roi ḇeba na, Yesus fyasnaiḇair snar sanandik nakam iḇye kada sḇuk faro Allah I monda. (Mrk. 10:17, 18; Yoh. 7:15, 16) Osower ido, Yesus syewar kaku fa myamwarek  wis ḇepyum kuker manfamyan ḇyesya, ma myam si ḇe bati ḇyesya, ḇape myam si ḇe women ḇa. (Yoh. 15:15) Syadi wer fafisu oso ḇyan pyan siwesna fa ḇyukifarkor si ro sne ḇerun ya. (Yoh. 13:5, 12-14) Raris Yesus, fandun fa koḇesyowi snonggaku ḇefararur kayam kuker konsya ma komam fandun sena ḇardibur fandun koḇena ḇardi. Koḇesyowi yae ko ma kosewar sanandik ḇa ido, na kofrur roi nabor kayamyam.​—Rm. 12:10.

Snonggaku ḇerun sne kako nari fyawi snar ”fararur [nari] nambran pyum rofyor ḇekarana sibore”. (Ams. 15:22) Imbude koḇekir ma kona pengalaman nabor kwar rariryano, koswarepen snar snonggaku osoḇaḇeri ḇefawi roi nakame. Yesus imonda doḇe roi ono dakfawi ḇaime. (Mat. 24:36) Osower ido, Yesus imarisen ryower kako roi manfamyan ḇenapes ḇa ḇyesya sikofen na roḇaido karkara sena. (Mat. 16:13-16) Iso ḇefnai fa, snonggaku ḇefararur kayam kuker Yesus simarisen sfanam kukeri. Imnis rarirya, kuker sne ḇerun kokofenbos ḇaḇeraryarḇa koḇena ma imbe korower snonggaku ḇesesya kakara ḇaido roi sikofen na ido, wis koḇena kuker si nari nakain pyum ma rosai kofrur na ”[nari] nun bon”.

Fandun fa penatua sya siso sne ḇerun ro Yesus ḇyedine ro fararur kayam. Na siswarepen kaku snar rur ḇesren bisa nafnoḇek penatua sya kam fa sikofenḇair roi ḇeyun payamyum. Fafisu sifrur rapat ya, fandun fa sifrur suasana ya ipyum insa penatua oser-oser sḇaḇir napyan ḇe si fa sikofenḇair kakara sena. Rarirya, na sun snemuk ḇefainda faro sidang kam.

Min ḇefararur ḇepyum nari fyasnai kakara ḇepyum rofyor fyararur kayam kuker snonggaku ḇesesya. Imarisen ryower ma ḇyebati kuker ḇesesya. Yesus na myam ker Kmari fyasnai kakara ḇepyum. Contoh oser kakara ḇepyum Yahwe fyasnai iso rofyor iwan Roma Ḇyedi fa fyaspar snonggaku sya ro roi sismai kakuna isoine samamyai marmar ya.​—Yoh. 3:16.

Yesus imarisen ifrur fararwe ḇemnis kuker fafisu ḇaido namnis kuker fandun snonggaku sya. Imnis raris, siwan i fa ifnoḇek snonggaku Israel imboi rodine imarisen ifnoḇek bin Fenisia oso. (Mat. 15:22-28) Yesus i kako fyasnai kakara ḇepyum faro manfamyan ḇyesya. Bati oso ḇyedi, Petrus i, fyamyun iro fababa, Yesus imarisen byuk ampun ḇe i. Ḇarpurya, Yesus byuk ḇe Petrus kako fakamamar ḇefandun  ḇeḇeso. (Luk. 22:32; Yoh. 21:17; Kis. 2:14; 8:14-17; 10:44, 45) Ro Yesus contoh ḇyenane, kofarkor snar fandun fa kofasnai rari ḇepyum faro snonggaku sya kam ma kuker sne ḇesiper kofrur fararwe.​—Flp. 4:5.

Rofyor kofasnai kakara ḇepyum ido, bisa kofrur fararwe kuker snonggaku sya kam inja napyan fa kofararur kayam kuker si. Yesus ifrur pyum kaku snonggaku ḇero ris ḇyedi, ine faro snon ḇeyor som ma snonggaku ḇefrur sasar ḇemarisen ḇerower anun ḇyena. Iso ḇefnai fa Yesus mbroḇ ḇyesi skursof i ḇe ”bati ro snon ḇeyor som ma snonkaku ḇesasar”. (Mat. 11:19) Raris Yesus, bisa kofararur kayam kuker snonggaku ḇeḇese kuker ko ke? Mam fawar ro naek oso ḇenir Louis. Rofyor fyarmyan ḇe pengawas wilayah ma fyararur ro Betel, fyararur kayam kuker snonggaku sya kam. Doḇe, ”Kofararur kayam kuker snonggaku ḇenapes ḇa sya ima imnis ra kofrur tembok oso kuker karui ḇeḇeseyae ukuran ḇyena. Snar ukuran karui na naḇesisye, fandun fa sifrur penyesuaian insa tembok ani dores muryase. Fandun fa ifrur penyesuaian nabore insa bisa dakfrur tembok ani fa dores.” Inema rari ḇepyum kaku dirya!

Fafisu risai kofasnai kakara ḇepyum ro sidang? Bisa kofasnai na kuker kofararur kayam fnoḇek kelompok dinas koḇedi. Imbude kofararur kayam kuker manbaryas inbaryas ḇesinan kwar ḇaido fakamamar kina ḇyedi naḇese kuker ko. Insa sismai marisen ro fararmyan ya, bisa kofasnai kakara ḇepyum kuker kosewar fa kosawsaw awer ma komarisen kofrur fararwe ro nyan koḇaryas na?

Min ḇefararur ḇepyum ima imarisen ’ḇyuk ma irarwas’. (1 Tim. 6:18) Fafisu Yesus fyararur kayam kuker Kmari, na myam snar Yahwe ikram roi ifrur na ḇa. Rofyor Yahwe ”fyasos farsyos”, Yesus ”ryodiwa” ma fyarkor ro Yahwe I. (Ams. 8:27) Ḇarpurya, Yesus manggundi imarisen fyawar ḇe manfamyan ḇyesi ’roi ḇeḇor nakam imnaf kwar ro’ Kmari na. (Yoh. 15:15) Imnis rarirya, ko kako komarisen kobuk ma korwas fawawi ma pengalaman koḇena faro snonggaku ḇefararur kayam kuker konsya. Min ḇefararur ḇepyum oso nari syewar fa fyamyun roi ḇepyum faro si ḇa. Imboi na imarisen irwas roi fyarkor kwar faro snonggaku ḇesesya.

Ko kako bisa kobuk wos ḇesambraḇser faro ḇefararur kayam kuker konsya. Snonggaku oso myam fararur marḇak koḇena ma kuker sne ḇesiper ikofen kasumasa ḇe ko ido, nari komarisen kaku. Yesus myam roi ḇepyum ro snonggaku ḇefararur kayam kuker i sya ma myanen si ḇaido byuk wos sandik faro si. (Mam kako Matius 25:19-23; Lukas 10:17-20.) Ma ikofen ḇe si kako snar nari ’sifrur roi ḇeba syadi wer’ roi i. (Yoh. 14:12) Ro roḇ fyor imar ḇaim ya, Yesus isandik manwawan ḇyesi kuker ikofen radine, ”Mkoiso ḇekain fnoḇek aya ḇesya kwar ro fafrowes ḇeḇor yasma kwar.” (Luk. 22:28) Yesus wos ḇyena ine nsun ro sisnesna kaku ma nadif si fa sifrur roi ḇekaku. Fyor kakbuk wos sandik faro snonggaku ḇefararur kayam kuker ko ido, nari siryaḇ syadi ma sifrur fararur sena kuker payamyum.

Naek oso snori Kayode doḇe, ”Min ḇefararur ḇepyum ima fandun ḇa fa inapes. Ḇape, ifrur snonggaku ḇero ris ḇyedi simarisen ḇaido seaski ma napyan ḇe si fa sifrur fararur sena.” Auma min fararur ḇemnis rarirya ke? Infa wafawi kankarem ḇyena, bisa wor karkara ro min fararur ḇeḇeso sya. Simarisen sfararur kayam kuker Au, imnis raris Yesus manfamyan ḇyesya simarisen sfararur kayam kuker i, bisa wakofenḇair rosai Manwawan Paulus fyasepen nane: ”Yafararur fnoḇek mko monda insa mkomarisen syadi wer.”​—2 Kor. 1:24.