Obọ Erhae ẹre Jesu na ruẹ vbene a ya gu emwa winna hẹ. Ẹi khabe ne ọ na sẹtin rhie igiemwi esi ye otọ vbe ọ rre agbọn na. De vbene ima khian ya ya egbe tae Jesu hẹ? Emwi eha rrọọ ne ima gha ruẹ vbe obọ e Jesu vbe nọ dekaẹn odẹ na ya gu emwa ọvbehe winna. Iruẹmwi eha na gha ru iyobọ ne ima, ne ima vbe etẹn gba gha rrọọ vbe uwu akugbe.

Ọmwa nọ mu egbe rrie otọ ghaa gu emwa ọvbehe winna, ẹi ya aro gbe iran re, ẹi vbe ru vbe na miẹn wẹẹ, ọ maan sẹ iran. Egbe imuegberriotọ vbenian ẹre Jesu ghaa mwẹ; obọ Erhae ẹre ọ na ruẹ ọre. Agharhemiẹn wẹẹ, e Jehova ọkpa ọre Ayi ne ọ yi emwi hia, ọ kegha hoo ne emwa ọvbehe rẹn vbene Ovbi ẹre ya deba irẹn winna hẹ. Vbe igiemwi, Osanobua khare wẹẹ: “Ma gha do ma emwa nagbọn, iran gha yevbe ima.” (Gẹn 1:26) Ẹi mwẹ ẹmwẹ ne Jehova tae na ma ya e Jesu rẹn wẹẹ, ọmwa ne ọ mu egbe rrie otọ ẹre Jehova khin.​—Psm 18:35.

Te Jesu wa vbe gha mu egbe rrie otọ vbe ọ rre agbọn na. Ẹghẹ ke ẹghẹ ne emwa ya tian rẹn ye emwi ne ọ ru, ọ ghi rhie uyi gie Erhae. (Mak 10:​17, 18; Jọn 7:​15, 16) E Jesu wa vbe gha ya obọ esi mu erhuanegbe ẹre, ọ ma gha ru iran vbe na miẹn wẹẹ ọviẹn ẹre iran khin, sokpan, ọ keghi ka iran ba ọsiọre. (Jọn 15:15) Ọ na kue kpe iran owẹ, ne ọ mieke na gi iran rẹn wẹẹ, ọ khẹke ne iran gha mu egbe rrie otọ. (Jọn 13:​5, 12-14) Erriọ ẹre ọ vbe khẹke ne ima gha ru ẹre; ma ghaa gu emwa ọvbehe winna, ọ khẹke ne ima gha mu uyi ye iran egbe, ọ ma khẹke ne ima wa rẹn ọghe enegbe ima ọkpa. Ma ghaa ‘rhie ọghọ ne egbe,’ ma na vbe gha winna, vbene ima i na si osi ye ẹmwẹ ọmwa na khian tian ye iwinna nii vbe  okiekie, ma ghi sẹtin fian emwi nibun gbua.​—Rom 12:10.

Ọmwa nọ mu egbe rrie otọ rẹn wẹẹ, irẹn ghaa ‘gualọ ude vbe obọ emwa ọvbehe, ọ gha dunna ne irẹn.’ (Itan 15:22) Ẹi mwẹ vbene ima khian rẹn emwi sẹ hẹ, ra vbene ima khian fuẹro sẹ hẹ, ọ khẹke ne ima yerre wẹẹ, orhunmwu ọkpa i rrọọ ne ọ rẹn emwi hia. E Jesu tobọ ẹre kue vbe kha wẹẹ, emwi eso rrọọ ne irẹn ma rẹn. (Mat 24:36) Agharhemiẹn wẹẹ, emwa ni ma gba ẹre erhuanegbe Jesu ghaa khin, te Jesu ye gha nọ iran ọta, ne ọ mieke na rẹn vbene iran ghee emwi eso hẹ. (Mat 16:​13-16) Ẹi khabe ne iran na gha hoo ne iran gha rre eke ne Jesu ye vbe ẹghẹ hia! Erriọ ẹre ọ vbe ye, ma ghaa mu egbe rrie otọ, ma na gha yerre wẹẹ, ima ma wa rẹn emwi hia, ma na vbe gha kie ẹkpotọ ne emwa ọvbehe ya ta ẹmwẹ nọ rre iran ekhọe, ọfunmwegbe ghi gha rrọọ, ma ghi vbe sẹtin koko fian emwi nibun gbua.

Ọ wa khẹke ne ediọn ya egbe taa e Jesu, zẹvbe ne iran ya koko winna. Iran ghaa do iko, ọ khẹke ne iran kọe ye ekhọe wẹẹ, orhiọn nọhuanrẹn sẹtin loo ọmwa ke ọmwa vbe uwu iran ya ta ẹmwẹ eso, nọ gha zuze ye ẹmwẹ nọ rre otọ. Adeghẹ ediọn na gha hia ne ọfunmwegbe gha rre uwu ẹkpo iran, iran na vbe gha kie ẹkpotọ ne ediọn ọvbehe ya ta ẹmwẹ nọ rre iran ekhọe, iran ghi sẹtin koko ru azẹ nọ gha maan ne etẹn vbe iko.

Ọ khẹke ne ima gha mwẹ amuroro daa emwa ne ima gba winna. Ọ ma khẹke ne ima gha mu emwi gogogo. E Jesu wa miẹn emwi nibun ruẹ vbe obọ Erhae vbe nọ dekaan na gha mwẹ amuroro daa emwa. Vbe igiemwi, e Jehova keghi gie Jesu gha die agbọn na, ne ọ do miẹn emwa nagbọn fan, agharhemiẹn wẹẹ, ọ te khẹke ne iran wu ye orukhọ ọghe iran.​—Jọn 3:16.

E Jesu ma gha mu emwi gogogo vbe ọ rre agbọn na, ọ gha bẹghe ẹre wẹẹ esa rrọọ ne irẹn ya fi ekhọe werriẹ, ọ ghi wa ru vberriọ. Vbe igiemwi, ọ keghi ru iyobọ ne okhuo ọkpa ne ovbi e Fonisia, agharhemiẹn wẹẹ, Ivbi Izrẹl ẹre ọ rre do ru iyobọ na. (Mat 15:​22-28) Ọ ghaa mwẹ amuroro daa erhuanegbe ẹre, ọ ma ya aro yọ wẹẹ, te iran khian wa gha ru emwi nọ gbae vbe ẹghẹ hia. Agharhemiẹn wẹẹ, ọsiọre ighẹ e Pita siẹn ọnrẹn vbe idagbo, e Jesu keghi yabọ ẹre. Ọ na kue vbe mu iwinna ne kpataki ne Pita. (Luk 22:32; Jọn 21:17; Iwinna 2:14; 8:​14-17; 10:​44, 45) Igiemwi ọghe Jesu ya ima rẹn wẹẹ, ọ khẹke ne ima “gha yin uyinmwẹ ọmẹhẹ da emwa hia.” Odẹ ne ima khian ya ru ọna, ọre ne ima mu egbe ne ima ya fi ekhọe werriẹ, deghẹ esa na gha rrọọ.​—Fil 4:5.

Ma ghaa mwẹ amuroro daa emwa ọvbehe, ma i mu emwi gogogo; ẹghẹ nii, ma ghi sẹtin gha gu  emwa ughughan winna vbe uwu ọfunmwegbe. Te Jesu wa gha ya obọ esi mu emwa ọvbehe sẹrriọ wẹẹ, avbe eghian rẹn na gha gbọvo ẹre, iran na gha kha wẹẹ, “irẹn vbe iran ni koko igho uhunmwu kevbe avbe ẹwobi emwa ẹre ọ gba mu obọ.” (Mat 11:19) Ma gha sẹtin gu emwa ọvbehe winna, ọ gha khọnrẹn ne iran lughaẹn ne ima, zẹvbe ne Jesu ru ẹre. Ọ mwẹ ọtẹn nokpia ọkpa na tie ẹre Louis nọ kpẹẹ re nẹ vbe iwinna ọgbaroghe ọghe otako, ọ vbe ga vbe Bẹtẹl; vbe uwu ẹghẹ na, ọ gu emwa ni ke ẹvbo ughughan rre winna. Ọtẹn na khare wẹẹ: “I keghi ghee emwa ughughan ne I he gu winna zẹvbe eblọk ughughan ni lughaẹn ne egbe; na do ya egbe avbe eblọk vbenian ru e fence i khian gha khuẹrhẹ, rhunmwuda, iran i rre umwọmwẹ. Sokpan, a gha mwamwa avbe eblọk na ẹse, e fence nii ghi dia. Erriọ vbe ye, ne I mieke na sẹtin gu emwa ughughan winna ẹse, ọ khẹke ne I ru afiwerriẹ eso vbe odẹ ne I ya ru emwi; ẹghẹ nii, emwi hia ghi do gha khian hẹnẹhẹnẹ.” Igiemwi esi ẹre ọna wa khin!

De odẹ eso ne ima gha ya rhie ẹre ma wẹẹ, emwa ni hoo ne ọfunmwegbe gha rre uwu iko ẹre ima khin? Ẹkpotọ kie re ne ima ya ru ọna, vbe ima gha deba etẹn ni rre ẹbu ọghe ima ladian vbe ikporhu. Ma sẹtin deba etẹn ughughan winna vbe ikporhu, ọ gha khọnrẹn ne iran gha re okhiọnkpa, emwa ni ru orọnmwẹ nẹ, ra emwa ni mwẹ emọ, ọ sẹtin vbe gha re emwa ni diẹn ima ra ne ima diẹn rẹn. Deghẹ ọmwa nọ khian zaizai ẹre ima khin, ma sẹtin hia ne ima fẹko gha khian vbe ima ghaa rre ikporhu; ma sẹtin vbe fi obẹlẹ ne ima ya kporhu werriẹ, ne emwa ne ima gba winna vbe ikporhu mieke na sọyẹnmwẹ ọnrẹn.

Ọ khẹke ne ima gha ‘ghae emwi ne ima mwẹ’ ne emwa ne ima gba winna. (1 Tim 6:18) Vbe ẹghẹ ne Jesu na gha gu Erhae winna vbe ẹrinmwi, ẹi mwẹ aro ẹre ma dae wẹẹ, Erhae i re ọmwa nọ mu emwi lẹre. Vbe ẹghẹ ne Jehova ya “mu iso ye ihe ẹre,” Jesu ghaa “rre evba,” ọ wa vbe ruẹ emwi nibun vbe obọ re. (Itan 8:27) Vbe Jesu ghi sẹ agbọn na, ọ keghi tama erhuanegbe ẹre, ‘emwi hia ne ọ họẹn vbe unu Erhae,’ vbene ọ ma na mu emwi rhọkpa lẹre ne iran. (Jọn 15:15) Erriọ ẹre ọ vbe nọ, ọ ghaa mwẹ emwi eso ne ima rẹnrẹn wẹẹ, ọ gha ru iyobọ ne emwa ne ima gba winna, ọ khẹke ne ima gi iran rẹn; ọ ma khẹke ne ima yae mwẹ akhaẹn, ne ima gha roro ẹre wẹẹ, ma gha maa iran re nẹ, ẹi ima ẹre ọ khian ghi gha ta ẹmwẹ nọ sẹ. Nọghayayerriọ, ọ khẹke ne ima gha tama emwa emwi ne ima rẹnrẹn.

Emwi ọvbehe ne ima gha sẹtin rhie ne emwa ne ima gba winna, ọre ẹmwẹ igiọdu. Ọmwa gha ya ekhọe hia tian ima ye emwi esi ne ima ru, vbọ ye ima hẹ? Ẹi mwẹ ọ ma gha ya ima ghọghọ. Te Jesu wa gha tian emwa ni ghaa deba ẹre winna, ye iwinna esiesi ne iran ru. (Yae taa ebe Matiu 25:​19-23; Luk 10:​17-20.) Ọ na kue gi iran rẹn wẹẹ, iran gha “winna iwinna ni sẹ” ọghe irẹn. (Jọn 14:12) Vbe asọn nọ gbe fi ẹdẹ nọ wu, ọ keghi tama avbe ukọ ọghẹe wẹẹ: “Wa ẹre ọ mudia ke mwẹ vbe ẹghẹ edanmwẹ hia.” (Luk 22:28) Muẹn roro, vbene ẹmwẹ ne Jesu tae na ghaa ye iran hẹ! Ẹi mwẹ ọ ma gua iran kpa ya ru sayọ! Adeghẹ ima na vbe gha tian emwa ne ima gba winna, iran ghi gha ghọghọ, iwinna ne iran ru ghi vbe gha kẹ; rhunmwuda, ọbevbaru ẹre ọ ya iwinna kẹ!

Ọtẹn ima nokpia ọkpa na tie ẹre Kayode khare wẹẹ, “Agharhemiẹn wẹẹ, ai miẹn nọ fo na, ma gha ye sẹtin gha ya obọ esi mu emwa ne ima gba winna. Ẹghẹ nii, iran ghi gha ghọghọ, vbe iran ghaa gu ima winna.” Egbe ọmwa vberriọ ẹre uwẹ khin ra? U sẹtin ya ẹwaẹn nọ emwa ne uwa gba winna ọta eso, ne u mieke na rẹn, aro ne iran ya ghee ruẹ. Adeghẹ iran na gha ghọghọ vbe iran ghaa gu ruẹ winna, zẹvbe ne erhuanegbe Jesu vbe gha ghọghọ vbe iran gu e Jesu winna, u ghi sẹtin si agbada vbe unu ta ẹmwẹ ne Pọl tama etẹn vbe ọ khare wẹẹ: “Te ima deba uwa winna, ne ọyẹnmwẹ uwa.”​—2 Kọr 1:24.