Sanggah Jesus i surga bahat do na iparlajari ia ase boi dear marhorja pakon Bapani. Sonai homa sanggah i tanoh on, gabe sitiruon do homa ia bani halak na legan. Hita pe bahat do gunani anggo hita marlajar humbani Jesus. Humbani sitiruon na ibahen ia, dong tolu prinsip na boi mangurupi hita ase dear hita marhorja pakon sanina botou na legan. Anggo ibahen hita sonai, gabe lambin marsada ma kuria.

Ase hita boi dear marhorja pakon sanina botou na legan, maningon martoruh ni uhur do hita. Ai do homa na iparlajari Jesus humbani Bapani. Age pe pitah Jahowa dassa na igoran Sitompa, tapi sihol do Ia ase ipardiateihon na legan homa aha na ihorjahon Anak-Ni. Halani ai ma ihatahon Naibata sonon, “Tompa Hita ma jolma songon rupan-Ta.” (1 Mus. 1:26) Hunjai tangkas ma taridah martoruh ni uhur do Jahowa janah megah ma uhur ni Jesus halani ai.​—Ps. 18:36.

Martoruh ni uhur do homa Jesus sanggah ia i tanoh on. Umpamani, sanggah dong na mamuji Jesus, ibere ia do pujian ai bani Naibata. (Mrk. 10:17, 18; Joh. 7:15, 16) Marusaha do homa ia ase susianni totap mardamei anjaha ianggap ia do susianni ai hasoman sedo songon jabolon. (Joh. 15:15) Ra do homa ia mamurihi nahei ni susianni ase sidea martoruh ni uhur homa. (Joh. 13:5, 12-14) Halani ai hita pe, rimangi hita ma homa haporluan ni hasoman na legan sedo pitah  haporluanta sandiri. Marusaha ma hita ‘marsipasangapan’ anjaha hassi pe lang dong na mamuji pambahenanta, ulang ma maretek ni uhur halani ai.​—Rom 12:10.

Ibotoh halak na martoruh ni uhur do “saud do [ranggian] anggo buei sipamodahi”. (Pod. 15:22) Age pe bahat keterampilan ampa pangalamanta, tapi dong do homa na lang ibotoh hita. Jesus pe iakui ia do dong homa na lang ibotoh ia. (Mat. 24:36) Marosuh do ia manangar na ibagas uhur ni susianni. (Mat. 16:13-16) Halani ai ma tongtong do malas uhur ni susianni marhorja pakonsi. Sonai ma homa hita. Marusaha ma hita totap martoruh ni uhur. Dingat hita ma dong do homa na lang boi ibahen hita. Halani ai, ra ma hita manangihon pandapot ni hasomanta. Anggo ibahen hita sonai, gabe dear ma salosei horjanta anjaha damei ma pangahapta.

Ponting tumang do homa sintua maniru siusihan na ibahen Jesus. Umpamani, sanggah rapat porlu do idingat sidea, ise pe sidea boi do iurupi tonduy na pansing laho mambere usul na dear. Anjaha maningon ipastihon sidea do homa anggo hasoman na legan boi bebas mambere pandapotni. Anggo ibahen sidea sonai, gabe boi ma sidea mambahen keputusan na marguna bani ganup halak i kuria.

Leganni ai, ase boi hita dear marhorja pakon sanina botou na legan, maningon basar ma hita janah lang kaku. Ai do homa na iparlajari Jesus humbani Bapani. Umpamani, age pe ganup jolma maningon matei halani domma mardousa sidea, tapi ibahen Jahowa do dalan ase boi maluah sidea humbani hamatean.​—Joh. 3:16.

Jesus pe basar do ia janah lang kaku bani halak na legan. Umpamani, age pe ia isuruh hu tanoh on laho mangurupi bangsa Israel, tapi ra do homa ia mangurupi sada naboru Kanaan. (Mat. 15:22-28) Anjaha lang ongga ipindo Jesus lobih humbani na boi ibahen susianni. Age pe ongga ihatahon si Petrus lang itanda ia Jesus, tapi isalpuhon Jesus do salahni ai. Ibere Jesus do homa tanggung jawab na lambin banggal hu bani. (Luk. 22:32; Joh. 21:17; Lah. 2:14; 8:14-17; 10:44, 45) Halani ai, tiru hita ma Jesus. Dalankon hita ma podah ni Bibel na mangkatahon, “Habasaron nasiam ai, sihol ma talar ai bani haganup halak.”​—Pil. 4:5.

Anggo basar hita janah lang kaku, gabe lambin urah ma hita mambahen penyesuaian pakon sanina botou na legan. Ai do homa na ibahen Jesus. Halani bujur janah basar Jesus bani ganup  halak, ihatahon munsuhni do ia “huan-huan ni sijalo sohei ampa pardousa” halani ra sidea manangihon baritani. (Mat. 11:19) Halani ai, sonaha hita boi maniru Jesus? Pardiateihon hita ma pangalaman ni si Louis na ongga gabe sintua kaliling ampa mangidangi i Betel. Gati do ia pajumpah pakon sanina botou humbani marmasam suku. Ia mangkatahon, “Hudingat ma songon sada tembok na ibahen humbani batu padas. Somalni marmasam-masam do banggalni batu ai. Tapi anggo dear isusun, boi do ai jadi sada tembok. Sonai ma homa age pe gati ahu pajumpah pakon sanina botou humbani marmasam suku ampa hasomalanni, tapi marusaha do ahu mambahen penyesuaian pakon sidea. Ai do na mangurupi hita totap marsada.” Tontu sitiruon na dear do na ibahen sanina ai.

Sonaha cara na legan hita patuduhkon anggo hita ra mambahen penyesuaian pakon sanina botou i kurianta? Ai ma sanggah hita roh hu partumpuan dinas. Ra do hita ipatnerhon pakon sanina atap botou na lang sarupa tanggung jawabni atap pe umurni pakon hita. Anggo sonai, tontu ra do hita mangihutkon cara marbarita na sosok pakon situasi ni sidea. Atap sanggah marbarita hita pakon hasoman na matua, ulang podas-podas hita mardalan. Hasilni, gabe lambin malas ma uhurta ibagas pangidangion.

Porlu do homa hita “ringgas marsilayak-layak”. (1 Tim. 6:18) Sanggah Jesus rap marhorja pakon Bapani, ididah ia do ganup na ihorjahon Bapani ai. Umpamani, sanggah Jahowa “pajongjongkon langit ai, ijai do [Jesus]”. Jadi boi ma ia marlajar hunjai. (Pod. 8:27) Malas do homa uhurni mangajarhon bani susianni aha ‘na itangar ia humbani Bapani’. (Joh. 15:15) Jadi tiru hita ma homa Jesus. Tontu malas do uhurta mansaritahon na dob iparlajari hita atap pe pangalamanta hubani sanina botou na legan. Ulang ma itahan-tahan hita hatorangan na ihaporluhon hasomanta. Halani hatorangan sisonai boi mangurupi sidea lambin dear mandalankon tugasni.

Hita pe boi do patoguhkon sanina botou na legan. Tontu malas tumang do uhurta anggo dong na mampardiateihon horjanta na dear janah ipuji homa hita. Jesus pe ipardiateihon ia do na dear na dob ihorjahon susianni. (Bandingkon Mateus 25:19-23; Lukas 10:17-20.) Ihatahon ia do homa lobih humbani aha na ibahen ia do holi na laho ihorjahon susianni. (Joh. 14:12) Bani borngin paima hamateanni ipuji Jesus do susianni. Nini do sonon, “Hanima do na tahan i lambungku ibagas haganup sitarononku.” (Luk. 22:28) Halani ipuji Jesus sidea, gabe megah ma uhur ni sidea janah gabe tarojur ma sidea mandalankon parentahni. Anggo ipuji hita hasoman na legan, sidea pe lambin megah ma uhurni janah lambin dear mandalankon tugasni.

Sada sanina na margoran si Kayode mangkatahon, “Hasoman sahorja na dear lang maningon sempurna. Tapi marusaha do ia mambahen hasomanni na legan marmalas ni uhur sanggah marhorja pakon sidea. Anjaha ra do homa ia mangurupi hasomanni.” Ai hasoman na sisonai do homa nasiam? Boi do isungkun nasiam sanina botou na legan sonaha pangahap ni sidea sanggah mangidangi pakon nasiam. Anggo malas uhur ni sidea mangidangi pakon nasiam sarupa ma ai songon susian ni Jesus na marmalas ni uhur mangidangi rap pakon Jesus. Jadi boi ma ihatahon nasiam songon na ihatahon si Paulus, “Hasoman parhorja do hanami bani malas ni uhur nasiam.”​—2 Kor. 1:24.