Sielu lafurendeirei Hesusu lubuidun igaburi lun lawadigimaridun hama amu. Dan le ya lubéi Ubouagu, ígirati aban buiti hénpulu houn ha íderagubalin. Ida liña líderaguniwa lani hénpulu? Danme wakutihani, warihiba ǘrüwa adundehani méiniti le gayaraabei líderaguniwa lun aban wamá paaná ha buítiña ha adügübaña lun ñein lan ídehani luma úarani.

Gürigia le gídehadibei ǘnabuguti, ani buiti larihiniña ha nadagimeinbaña luma, ani manaagunti lungua. Ariha lumuti Hesusu lubuidun igaburi ǘnabuguti le luagu Lúguchi. Lau sun lun lan Heowá yu lan iri Le adügübalin sun katei, arufuda lumuti nadagimein lan Liráü úara luma. Furanguti larihiniwa katei le lidan dimurei le tídanbei Lererun le ariñagubei: “Adüga waméi wügüri. Wenegebei” (Agu. 1:26). Dan le lariñagunbalin Heowá dimurei le, aba líchugun Hesusu fe ǘnabugu lan Heowá (Sal. 18:35).

Dan le ya lubéi Hesusu Ubouagu, ǘnabuguti meha giñe. Dan le híchugunbei gürigia uéiriguni lun luagu le ladügübei, súnwandan lun lan Heowá líchigei uéiriguni (Mar. 10:17, 18; Huan 7:15, 16). Áfaaguati giñe Hesusu lun buidu lan lanaagun lungua hama lani disipulugu ani óusera lumutiña keisi lumadagu, mama kei idamuni (Huan 15:15). Chibá lumuti giñe hagudi lani apostolugu lun larufudahan houn lunti lan ǘnabugu hamá (Huan 13:5, 12-14). Ítara kei Hesusu, mosu gebegi hamá  wamadagu woun, áluaha wameime le buídubei houn lubaragiñe wáluahani le buídutimabei wóuniwagua. Dan le inebegua wamá wámagua ani meberesenga kaba lan un lichugúa uéiriguni, gayaraabei wadügün saragu katei (Rom. 12:10).

Gürigia le ǘnabugubei gunfuranda lumuti giñe dimurei le, “según hiibe eweridihatiña labuidura aransehani” (Ari. 15:22). Meberesenga iyaraani le wawagubei o subudi le wámabei, haritagua waméi ua lan ni aban gürigia le subuditi saragu. Íbini Hesusu subudi lumuti meha anihein lan katei le ibidiñeti lun (Mat. 24:36). Hínsiñeti meha lun lasubudiruni ka lan hasaminarubei lani disipulugu (Mat. 16:13-16). Ligíati buiti meha hasandiragun lánigu disipulugu houngua luma. Ligiaméme asuseredubei lidan wakesin, dan le ǘnabugu wamá ani gabaroun waméi le siñá wabéi adüga ani aranseñu wagía lun waganbuni le hasaminarubei amu, adügati lira lun ñein lan darangilaü wadan “ani ibihatiwa saragu buiti lídangiñe”.

Súdiniti lun gabaroun hamani wéiyaaña lidan afiñeni lǘnabugun Hesusu dan le hawadigimaridun úara. Lunti haritaguni wéiyaaña lidan afiñeni gayara lan líchuguni Heowá lani sífiri sandu lun aban hádangiñe lun lariñagun somu katei le gayaraabei lídehan lun hanúadirun buidu. Ánhaña áfaagua wéiyaaña lidan afiñeni lun hasandiragun súngubei houngua buidu lun hariñaguni hasaminan, hasagaruba sun lílana damuriguaü buiti lídangiñe le hanúadirubei.

Aban paaná le areidati gunfuranda lumutiña amu. Ligía aranseñu liña lubéi lun lasansiruni le lasaminarubei ladügün lun lígiruniña amu lun hadügüni le hasaminarubei hadügün. Ariha lumuti Hesusu saragu wéiyaasu gunfuranda lániña Lúguchi amu. Kei hénpulu, ligía lóunahanbalin Heowá Liráü lun gayara lan lasalbaruniña sun gürigia lídangiñe óunweni (Huan 3:16).

Ígirati Hesusu lun hadügüni amu le hasaminarubei hadügün dan le larihin mégeiwa lan o buidu lan. Haritagua waméi ida liña lan líderagunu aban würi to fenisiana íbini houn lan ísüraelina lounahóua (Mat. 15:22-28). Buiti giñe lóuseruniña lani disipulugu lau magurabahan lan lun hadügün lóugiñe le hayaraabei adüga. Dan le lariñagunbalin Féduru le lumada ibidiñe lan lun, aranseñu liña meha Hesusu lun feruduna lani, dan lárigiñe aba líchugun aban dasi súdiniti lun (Luk. 22:32; Huan 21:17; Adü. 2:14; 8:14-17; 10:44, 45). Furanguti larufuduni lani Hesusu hénpulu woun mosu lan wabulieiduni hachara amu lun gayara lan harihini súngubei buidu lan wóuserun (Fili. 4:5).

 Ánhaña gunfuranda wamá gürigia, aranseñu waba lun wídehan lau sun wagundan hama sun hawuyeri gürigia. Buiti meha lanaagun Hesusu lungua hama gürigia darí lun híchugun láganigu lidurun gamadagua lan hama aguburahatiña liseinsuna gumadi luma hama gafigountiña ha ánharubaña lun luganute (Mat. 11:19). Gayaraati san wáyeihani lani Hesusu hénpulu lau wawadigimaridun hama amu lau sun amu lan hagaburi wawéi? Abahüdahati aban íbiri gíriti Louis, le meha eseriwidubei kei óunigiruti sirkuitu ani seriwiti meha giñe tidan Beteli ani nadagimeinhaali hama ámuñegueinarügü hawuyeri íbirigu, ariñagati: “Ariha numutiña kada sétanu íbirigu kei aban baríeiru lauti dübü le ámuñegueinarügüti lesetirun luma liseisin. Anhein wafidiha dübü ligía buidu, gayaraabei suru lan baríeiru. Áfaaguaadina giñe lun nadügün asansiruni lidan nigaburi lun nawadigimaridun lau darangilaü hama amu lun buidu lan lerederun wadagimanu”. Ma lubuidun igaburi!

Ida luba gayara lan warufudun gunfuranda wamaniña lílana damuriguaü? Kei hénpulu, gayaraati añahein lan íbirigu lidan sétanu le ñein lubéi wapurichiha ámuñegueinarügüti harumudiri luma hani buligasion wawéi. Danme le wapurichihan hama, gayaraati san wíderaguniña lun hapurichihan lidan igaburi le hínsiñetimabei houn lúntima gunda hamá lidan hani ministeriu?

Paaná ha buítiña aranseñu haña “lun hafanreinhani le hámabei” (1 Tim. 6:18). Dan le líderagunbalin Hesusu lúguchi, chóuruti aba lan larihin maramudahan lan Heowá ni kata. “Danbei lederebudagüdünbalin” Heowá sielu, ariñagati Hesusu “ñéinñadina meha” ani gayaraati meha lafurendeirun lúmagiñe Lúguchi (Ari. 8:27). Dan lárigiñe, ariñaga lumuti Hesusu houn lani disipulugu dimurei burí le lasubudirágüdübei Lúguchi lun (Huan 15:15). Lau wáyeihani lani Heowá hénpulu, lunti aranseñu wamá lun warufudahani le wasubudirubei luma le furendei wamaalibei lidan wabagari houn amu. Furanguti aban lan paaná le buiti, mareidahanti ariñahani le mégeiwabei o le huuti lúnrügü gabafu lan hawagu amu. Lubaragiñe lira, gúndaarügüti lau labahüdahani houn amu le furendei laalibei.

Ámuya igaburi le arufudubalin gíchigadi wamá dan le wariñaguni houn wíbirigu buidu lan hadüga. Ma inarüni buidu lan wasandiragun woungua dan le larihini aban gürigia áfaaguni le wadügübei ani teinki lawa tídangiñe sun hanigi luagu? Díreiti meha Hesusu dan lun lariñagun houn ha íderagubalin katei buiti le larihubei hawagu (Ariha huméi giñe Matéu 25:19-23; Luk. 10:17-20). Ariñagati giñe houn hadügüba lan “katei wéinamuti” sügǘ luéi le ladügübei (Huan 14:12). Guñoun lubaragiñe lounwen ariñagati houn lani apostolugu ha úaragubaña gunda lan hau. Lariñaga houn: “Huguya meha úarabaña numa lidan nóuchawagun” (Luk. 22:28). Chóuruti buidu lan hasandiragun houngua lau dimurei le lariñagubei houn ani ínchaha lumutiña lun hadügüni le buídubei. Ánhawa giñe asagara dan lun wariñaguni houn wíbirigu buidu lan hadüga gúndaabaña ani hadügübei sun katei keisi lubudubu, lun hídehan hama amu.

Ariñagati aban íbiri gíriti Kayode: “Aba paaná buiti memegeirunti lun macharabei lan, gama lumoun gayaraati lagundaragüdüniña amu luma lun ladügün lun ménrengun lan wadagimanu houn”. Gayaraati san lariñawagúniwa katei le huagu? Ka uagu málügüdün hubaliña amu íbirigu anhein ariha habaadün keisi aban paaná buiti? Buiti san hasandiragun gürigia houngua huma kei meha buidun lan hasandiragun lani Hesusu disipulugu luma? Anhein ítara liña lubéi, gayaraabei hariñaguni ligiaméme dimurei le lariñagubei apostolu Pábulu: “Busenrügütiwa wíderagunün lúntima laganwoundun hugundan” (2 Ko. 1:24).