Maayo Ka ba nga Isigkamagbubuhat?
“DIDTO ko tapad niya ingong batid nga magbubuhat. . . . Nalipay ko diha sa iyang atubangan sa tanang panahon.” (Prov. 8:30) Mao ni giingon sa Bibliya bahin sa Anak sa Diyos kinsa nagbuhat uban sa iyang Amahan sulod sa daghang katuigan sa wala pa siya moanhi sa yuta. Matikdi nga gipakita sab niining bersikuloha kon unsay gibati ni Jesus ingong isigkamagbubuhat sa Diyos; siya “nalipay” diha sa Iyang atubangan.
Nakat-onan ni Jesus ang mga hiyas nga sa ulahi nakapahimo niyang maayo kaayong ehemplo sa usa ka isigkamagbubuhat niadtong dinhi pa siya sa yuta. Sa unsang paagi makabenepisyo ta sa ehemplo ni Jesus? Pinaagi sa pagtuon sa iyang ehemplo, makakat-on tag tulo ka prinsipyo nga makatabang nato nga mahimong maayong mga isigkamagbubuhat. Kini nga mga prinsipyo makatabang nato nga mas mahiusa sa atong mga igsoon ug makigkooperar kanila.
Atong masundog si Jehova ug Jesus kon isulti nato sa mga igsoon ang atong nahibaloan ug naeksperyensiyahan
UNANG PRINSIPYO: ‘MAGPASIDUNGOG SA USAG USA’
Ang maayong isigkamagbubuhat mapainubsanon. Pabilhan niya ang uban ug dili siya magpabilib kanila. Nakat-onan ni Jesus ang maong pagkamapainubsanon sa iyang Amahan. Bisag si Jehova lang ang takos tawgong Maglalalang, gusto niyang mahibaloan sa uban ang importanteng papel sa iyang Anak ingong isigkamagbubuhat. Makita nato kana sa giingon sa Diyos: “Magbuhat tag tawo sumala sa atong larawan.” (Gen. 1:26) Seguradong gipabilhan ni Jesus ang pagkamapainubsanon ni Jehova dihang gisulti Niya kini.—Sal. 18:35.
Samtang dinhi si Jesus sa yuta, gipakita sab niya ang pagkamapainubsanon. Dihang gidayeg si Jesus tungod sa iyang mga nahimo, iyang gihatag ang pasidungog ngadto sa Usa nga takos modawat niana. (Mar. 10:17, 18; Juan 7:15, 16) Naningkamot si Jesus nga mamentinar ang malinawong relasyon uban sa iyang mga tinun-an ug giisip sila ingong mga higala imbes mga ulipon. (Juan 15:15) Gihugasan pa gani niya ang ilang mga tiil aron tudloan sila nga magmapainubsanon. (Juan 13:5, 12-14) Sama kang Jesus, angay sab natong pabilhan ang atong mga isigkamagbubuhat imbes unahon ang atong personal nga kaayohan. Kon atong ‘pasidunggan ang usag usa’ ug dili ta mabalaka kon kinsay makadawat sa pagdayeg, mas daghan ang mapalampos.—Roma 12:10.
Ang mapainubsanong tawo nahibalo sab nga “naay kalamposan kon daghan ang magtatambag.” (Prov. 15:22) Bisag unsa pay atong katakos o eksperyensiya, angay natong hinumdoman nga walay tawo nga nahibalo sa tanan. Bisan si Jesus miingon nga dihay mga butang nga wala niya mahibaloi. (Mat. 24:36) Interesado sab siya kon unsay nahibaloan o gihunahuna sa iyang dili hingpit nga mga tinun-an. (Mat. 16:13-16) Kanay hinungdan nga ang iyang mga isigkamagbubuhat ganahang makig-uban niya! Sa susama, kon mapainubsanon natong hinumdoman ang atong mga limitasyon ug tugotan ang uban sa pagpahayag sa ilang opinyon, mapalambo nato ang kalinaw, ug uban kanila ‘molampos’ ang buluhaton.
Ilabinang importante nga sundogon sa mga ansiyano ang pagkamapainubsanon ni Jesus dihang magtinabangay sila sa paghimo sa buluhaton. Angay nilang hinumdoman nga ang balaang espiritu puwedeng magpalihok kang bisan kinsang ansiyano sa paghatag ug sugyot nga makatabang nila sa paghimog maayong desisyon. Kon diha sa ilang mga miting, tugotan sa mga ansiyano ang tanan sa paghatag sa ilang opinyon, sila makahimog mga desisyon nga makahatag ug kaayohan sa tibuok kongregasyon.
IKADUHANG PRINSIPYO: ‘IPAKITA ANG INYONG PAGKAMAKATARONGANON’
Ang maayong isigkamagbubuhat makataronganon diha sa iyang pagpakiglabot sa uban. Siya mapailin-ilinon ug andam mopahiuyon. Si Jesus daghag kahigayonan nga maobserbahan ang pagkamakataronganon sa iyang Amahan. Pananglitan, gipadala siya ni Jehova aron tubson ang katawhan gikan sa sentensiya nga kamatayon nga takos kanila.—Juan 3:16.
Si Jesus andam mopahiuyon kon haom o gikinahanglan. Hinumdomi kon giunsa niya pagtabang ang babayeng Fenicianhon bisag gipadala siya ngadto sa nasod sa Israel. (Mat. 15:22-28) Makataronganon sab siya sa iyang gidahom sa iyang mga tinun-an. Human siya ilimod sa iyang suod nga higalang si Pedro, si Jesus andam mopasaylo kaniya. Sa ulahi, iyang gihatagan si Pedro ug bug-at nga mga responsibilidad. (Luc. 22:32; Juan 21:17; Buh. 2:14; 8:14-17; 10:44, 45) Ang ehemplo ni Jesus nagpasiugda nga angay natong “ipakita sa tanan ang [atong] pagkamakataronganon” pinaagi sa pagkaandam nga mopahiuyon.—Filip. 4:5.
Kon makataronganon ta, andam sab tang mopailin-ilin aron makabatog malinawong relasyon sa tanang matang sa tawo. Maayo kaayo ang pagtratar ni Jesus sa iyang mga kauban. Gani, ang iyang mga kaaway nasina ug nag-akusar kaniya nga “higala [siya niadtong] mga maniningil ug buhis ug . . . makasasala” nga midawat sa iyang mensahe. (Mat. 11:19) Sama kang Jesus, posible ba pod tang mahimong maayong isigkamagbubuhat sa uban? Si Louis, brader nga nakaalagad sa nagapanawng buluhaton ug sa Bethel ug nakapakig-uban sa lainlaing matang sa tawo, miingon: “Ang pagpakig-uban sa lainlaing matang sa mga tawo samag pagtukod ug paril gamit ang mga bato nga lainlaig porma. Pinaagi sa pag-adjust sa posisyon sa pipila ka bato, makahimo kag tul-id nga paril. Busa, naningkamot ko nga mo-adjust aron makabatog malinawong relasyon sa uban ug molampos ang buluhaton.” Maayo gyod nâ nga panghunahuna!
Dili gyod itago sa usa ka maayong isigkamagbubuhat ang gikinahanglang impormasyon aron lang ipakita nga labaw siya sa uban
Kanus-a kaha nato mapakita ang atong pagkamakataronganon diha sa kongregasyon? Puwede nato nang mapakita dihang makig-uban ta sa atong grupo sa pagsangyaw. Tingali makauban nato ang mga magmamantala nga lahi natog edad o mga responsibilidad sa pamilya. Puwede ba natong ipakita ang pagkamakataronganon pinaagi sa pagpahiuyon sa ilang kahimtang o pamaagi sa pagsangyaw? Kon buhaton nato nâ, matabangan nato sila nga magmalipayon ug magmabungahon sa ilang ministeryo.
IKATULONG PRINSIPYO: ‘MAGMAANDAM SA PAGPAAMBIT’
Ang maayong isigkamagbubuhat “andam sa pagpaambit.” (1 Tim. 6:18) Samtang nagbuhat tapad sa iyang Amahan, seguradong namatikdan ni Jesus nga si Jehova walay gitago kaniya. Dihang “giandam [ni Jehova] ang langit,” si Jesus kauban niya ug puwedeng mokat-on kaniya. (Prov. 8:27) Sa ulahi, malipayong gisulti ni Jesus sa iyang mga tinun-an “ang tanan nga [iyang] nadungog” sa iyang Amahan. (Juan 15:15) Atong masundog si Jehova kon isulti nato sa mga igsoon ang atong nahibaloan ug naeksperyensiyahan. Dili gyod itago sa usa ka maayong isigkamagbubuhat ang gikinahanglan o makatabang nga impormasyon aron lang ipakita nga labaw siya sa uban. Malipay siyang isulti sa uban ang maayong mga butang nga iyang nakat-onan.
Puwede sab natong dasigon ang mga igsoon. Kon dunay makamatikod sa atong mga paningkamot ug kinasingkasing nga magpasalamat kanato, dili ba madasig ta? Si Jesus migahin ug panahon sa pagsulti sa iyang mga tinun-an sa maayong mga hiyas nga iyang nakita kanila. (Itandi ang Mateo 25:19-23; Lucas 10:17-20.) Giingnan pa gani niya sila nga “himoon [nila] ang mga buhat nga labaw pa” sa iyang nahimo. (Juan 14:12) Sa gabii una siya mamatay, gikomendahan niya ang iyang matinumanong mga apostoles: “Kamo ang miunong nako sa akong mga pagsulay.” (Luc. 22:28) Seguradong nadasig sila sa iyang gisulti ug napalihok sa pagtuman sa iyang mga sugo! Kon mogahin sab tag panahon sa paghatag ug komendasyon sa mga igsoon, segurado nga mahimo silang mas malipayon ug mas mabungahon.
PUWEDE KANG MAHIMONG MAAYONG ISIGKAMAGBUBUHAT
“Ang usa ka maayong isigkamagbubuhat dili kinahanglang hingpit,” miingon ang brader nga si Kayode, “pero makapalipay siya sa iyang mga kauban ug makapagaan sa trabaho.” Ingon ana ka ba nga matang sa isigkamagbubuhat? Puwede nimong pangutan-on ang pipila ka igsoon kon unsay ilang hunahuna nimo ingong isigkamagbubuhat. Kon malipay silang mobuhat uban nimo, sama nga ang mga tinun-an ni Jesus nalipayng mobuhat uban niya, masulti nimo ang giingon ni apostol Pablo: “Mga isigkamagbubuhat mi alang sa inyong kalipay.”—2 Cor. 1:24.
