Yesu akega emitwarize eyatumire yaba ecokureberaho kirungi c’okuba omukozi murungi aha bakozi abu yabire nakora na bo omu nsi. Ni bata oku turi kugasirwa n’ecokureberaho ca Yesu? Twareba ecokureberaho ceye twetonzire, nitubasa kubona emisinge ishatu eri kubasa kutukwasa kuba abakozi barungi abari kukora n’abandi. Kandi eyo misinge neyija kutukwasa kugira obumwe n’okukwatanisa.

Omukozi murungi nayecureza, aha ekitinisa abakozi bagenzi beye, kandi nabikora atine entego y’okweyerekana. Ogo mutwarize murungi g’obucurezi, ni go ogu Yesu yayegire ahari Ishe. N’obu Yehova ari we owu turi kuha ekitinisa ahabw’ebyahangirwe byona, akata omutima aha murimo ogu Yesu yabire ayine omu kuhanga. Eco nitukirebera omu bigambo ebi Ruhanga yagambire ati: ‘Ka tuhange omuntu omu muringo gwitu.’ (Kut 1:26) Mazima Yesu nabasa kuba yasiimire Yehova ahabw’obucurezi bweye.—Zab 18:35.

Yesu obu yabire ari omu nsi akereka obucurezi nk’obwo. Abantu ku bamusiimire ahabw’ebi yabire akozire, akahimbisa Ishe owabire abishemerire. (Mak 10:17, 18; Yoh 7:15, 16) Yesu akaba nataho amani ngu areteho embera ndungi ahagati yeye n’abegi beye, kandi akaba nabareba nk’abanywani beye omu mwanya g’okubareba nk’abagaragwa. (Yoh 15:15) Akoza n’ebigere byabo kugira gu abegese ishomo ry’okuba abacurezi. (Yoh 13: 5, 12-14) N’itwe tushemerire kutamu amani kugira ngu turebe abakozi bagenzi bitu nk’ab’omuhendo omu mwanya g’okwekunda. Twaha abandi ekitinisa titurije kwebuza orije kusiimwa munonga kandi eco nikija kutuma twahika ahari byingi.—Rom 12:10.

Omuntu w’omucurezi naba ari kumanya ku ‘ahu abahi b’obwenge bari bingi, enama ziri kuhikirizibwa.’ (Enf 15:22) Obumanyi obu twakuba twine ninga obushoborozi obu twakuba twine bwona, tushemerire kumanya ku hatine muntu ori kumanya ebintu byona. Nangwa na Yesu akaba ari kumanya ku hine ebintu ebi yabire atari kumanya. (Mat 24:36) Akaba nayenda kumanya ebi abegi beye ababire batahikirire babire bari kumanya n’ebi babire bari kutekateka. (Mat 16:13-16) Tikiri kutangaza kuba abo bakozi bagenzi beye babire bari kuhurira bekikine baba bari na we! Ni co kimwe, twayecureza, tukikiriza ahu obushoborozi bwitu bugarukire kandi tukikiririza abandi kugira ebi bakora, nikituma twagira obusinge na bo kandi tuhike ahari byingi.

Na munonga ni ecomugasho abazehe kutoreza Yesu baba bari kukora n’abandi. Nibijuka ku omwika oguri kwera guri kubasa kukorera aha muzehe owu ari we wena omu kakiko k’abazehe. Baba bari omu nama y’abazehe nibagezaho kutaho embera ndungi kugira ngu buri omwe ori omuri eyo nama agire eki yagamba, kandi nikibakwasa kukora ensharamu ndungi eziri kugasira ekibina cona.

Omukozi murungi natwaza mpora yaba ari kukora n’abakozi bagenzi beye. Nagira ebi yahinduramu kandi areka n’abandi bagira eki bagamba. Yesu akaba ayine omugisha murungi g’okureba oku Ishe ari kutwaza mpora. Ecokureberaho: Yehova akamutuma ngu acungure abantu abihe omu rufu orwabire rushemerire abantu.—Yoh 3:16.

Yesu akoroba ahu cabire kiri kwetengesa. Yijuka oku yakwasize omukazi w’Omunyafoyinike, n’obu yatumirwe omu nju ya Isirayeli. (Mat 15:22-28) Nambwenu akaba natwaza mpora akuratize ebi abegi beye babire bari kubasa. Bwanyima Petero munywani weye owa hihi ku yamwehakine omu misho ga bingi, Yesu akamusaasira. Bwanyima, akaha Petero n’obundi bujunanizibwa bw’omutano. (Luk 22:32; Yoh 21:17; Byak 2:14; 8:14-17; 10:44, 45) Ecokureberaho ca Yesu nikitwegesa ku ‘okoroberana [kwitu kushemerire] kumanywa abantu bona,’ turi kuha abandi emirimo.—Fil 4:5.

 Nambwenu okutwaza mpora kwitu nikwija kutuma twabuganisa n’embera kugira ngu tukorengane n’abantu bona. Yesu akatwariza ge abantu ababire bari na we catuma abangi beye ababire bamwinire ihari bamurega ngu ni ‘munywani w’abahoza n’abasiisi’ ababire bari kwakira ge obutumwa bweye. (Mat 11:19) Mbehi n’itwe tituri kubasa kutoreza Yesu turi kukorengana n’abandi? Mwenetata Louis, owamazire emyaka myingi ari kutayayira ebibina kandi akakora n’ahari Beteli ari kukorana n’abantu abatari kushushana, akagira ati: ‘Nkagezaho kushushanisa buri mutwe ogu nabire ninkora na go n’amabare agatacogire. Wagira ebi wahinduramu omu ku ori kugereka ago mabare, nigarugamu ekisika ekitererire. Nambwenu nkagezaho kugira ebi nahindura omu kubaho kwange kugira ngu mbuganise n’embera ezi banywani bange barimu.” Eco ku ni ekintu kirungi!

Ni bata oku turi kubasa kukwatanisa n’abandi omu kibina kitu? Eco twine omugisha g’okukikora twaba turi n’omutwe gwitu g’okuburira. Nituba turi n’abegi abari kuba bine obujunanizibwa bw’amaka obutari kushushana n’obwitu, ninga shi tuburira hamwe n’abantu abatari kwinganisa n’itwe emyaka. Mbehi tituri kubasa kutwaza mpora turi kuhindura omu bwira obu turi kuba twine, kugira ngu tukwase abantu nk’abo kutunga okushemererwa n’okugira eki bahikaho omu murimo g’okuburira?

Omukozi murungi naba ayine ‘omutima g’okukwatanisa n’abandi.’ (1 Tim 6:18) Yesu ku yabire ari kukora n’Ishe Yehova, nabasa kuba yarebire ku atari kumushereka ebi yabire atari kumanya. Yehova ku yabire ari kuhanga iguru akaba ari na Yesu, kandi akaba ari kumwegeraho. (Enf 8:27) Bwanyima, Yesu na we akatunga omugisha g’okugambira abegi beye ebintu ebi yahurire ahari Ishe. (Yoh 15:15) Eco cokureberaho, nikituma n’itwe twagabira abakozi bagenzi bitu obwenge bwitu kandi tubagambira n’ebyatuhikireho. Hatariho okubanganisa, omukozi murungi tashemerire kushereka ebintu ebiri kwetengwa kugira ngu agume ari kwebembera. Nashemererwa yaba ari kugambira abandi ebirungi ebi yayegire.

Nambwenu obundi buryo obu turi kugabamu, ni okugambira abakozi bagenzi bitu ebigambo ebiri kubagumya. Mbwenu shi twamanya ngu omuntu yashemerewa ahabw’okumusiima tituri kushemererwa? Yesu akaba nakwata obwire bw’okusiima abakozi bagenzi beye, ahabw’ebirungi ebi yabire ari kubarebamu. (Geranisa na Matayo 25:19-23; Luk 10:17-20) Akabagambira ku babire barije kukora ebiri kukira ebyeye. (Yoh 14:12) Omu kiro eki yaferireho, akasiima abegi beye b’abesigwa ari kubagambira ati: ‘Ni imwe abagumisirize nanye omu bi nagezibwe.’ (Luka 22:28) Tekateka oku ebyo bigambo byeye byahumurize abegi beye, kandi bikabahiga kugira eki bakora! N’itwe twakwata obwire tukasiima abakozi bagenzi bitu, nibija kushemererwa kandi bakore n’ebintu byingi.

Mwenetata ori kwetwa Kayode, akagamba ati: “Omukozi murungi tari kwetenga kuba omuntu ohikirire, konka natuma abari kukora na we batunga okushemererwa kandi atuma omurimo gwaborobera.” Mbehi n’iwe ori omukozi mugenzi w’abandi nk’ogo? Mbehi tori kubasa kubuza bamwe omuri benetata na banyanyazi bakakugambira yaba ori omukozi murungi? Ku barashemerererwe kukora n’iwe nk’oku abegi ba Yesu bashemerirwe bari kukora na we, n’iwe nobasa kugamba nk’entumwa Pawulo oti: ‘Nitukorera hamwe n’imwe ahabw’okubaretera okushemererwa.’—2 Kor 1:24.