Yezu bali wirimu ohisunza mikalelo dhapama mudhidhi walabihe na Mulugu. Vadhiliye velaboni ya vati ohoniha okala yotagiha ya muttu olabile pama na attu ena. Ninapurelemo dhavi yotagiha ya Yezu? Nigapepesa yotagiha yaye, ninele osunza magano mararu ananikamihedhe wiwanana pama nigalabaga na attu ena. Vina magano aba anele onikamihedha okala owiwanana na abali ehu.

NIGANO 1: ‘WAVAHA TTIMA ATTU ENA’

Muttu onlaba na attu ena novyeviha, onowawonana ttima akwaye anlabihena kankosa elobo-txilobo wi avigwarulena. Yezu ohisunza ekalelo ya ovyeviha na Babe. Yehova onofwanyela wittaniwa Muttanddi wa dhilobo dhotene iyene vina onfuna wi attu aziwe mabasa amakamaka akosile Mwanaye. Iyo ninziwa ejiwene sabwa ya ejile elogile Mulugu: “Nimpaddutxe muthu woladdana na iyo.” (Wita 1:26) Venevo valogile Yehova mazu aba Yezu wahona wi Yehova Mulugu wovyeviha.—Masal. 18:35.

Yezu bali velaboni ya vati, wahilagiha ovyeviya. Motagiha, agatamaleliwa nttittimiyona wanvaha Yehova. (Mk. 10:17, 18; Jo. 7:15, 16) Iyene vina ohivilibehedha okala owiwanana na anamafwara aye. Ottiya wawonaga ninga adhari Yezu wawona ninga amarho aye. (Jo. 15:15) Yezu wahifiyedha osuwa manyalo a anamafwara aye wila asunzihe ttima ya ovyeviha. (Jo. 13:5, 12-14) Ninofwanyela omutagiha Yezu nike dhifunelo dha abali ehu vasogorho wa dhehu. Iyo ninalabe  pama na attu ena ‘modhela wattittimiha’ nihijedhelaga wi anitamalelege sabwa ya mabasa attiddile iyo.—Rom. 12:10.

Muttu wovyeviya onoziwa wi ovuza zelu ‘onodhowiya mabasa vasogorho.’ (Gano 15:22) Japama wubuwela wi kawo muttu onziwa dhotene masiki akala mabasaya onda alabaga mwa mudhidhi mwinjene iyene kana eziwelo ya dhotene. Yezu wannonelamo wi kaziwa dhilobo dhotene. (Mt. 24:36) Iyene vina wantamela oziwa monelo wa anamafwara aye masiki akalaga attu ohiligana. (Mt. 16:13-16) Sabwa ya ejiwene anamafwara aye ankala ofiyedheya na iyene! Iyo ninofwanyela okosa yakakene. Niganonela wi kaninziwa dhotene ninele otamela nikamihedho na attu ena, venevo ninele okana wiwanana mmabasani vina ninele okana ‘dhopurelamo dhapama.’

Makamaka anddimuwa a mmulogoni anofwanyela otagiha ovyeviya wa Yezu agalabaga mumodhani. Awene kadduwale wi muya wokoddela onowodha omukamihedha munddimuwa-munddimuwavi wi aloge elobo enakamihedhe okosa dhosakula dha malago. Akala va matugumanoni a anddimuwa a mmulogoni otene anokana ofuru wovaha monelo, anele okosa dhosakula dhinakamihedhe mulogo wotene.

Akala ninofuna olaba pama na attu ena, ninofwanyela ovilibihedha mbwenye kanididelege wi dhilobodha dhikosiwege ninga munfunelihu. Dila dhinjene Yezu wahona ofewa murima wa Yehova vina ovipimelela waye. Motagiya, iyene ohimona Yehova eddelaga ttagaraga nlogo na attu. Sabwa ya ottega attu anfwanyela okwa mbwenye ofewa murima wa Yehova ohimuttukulela ovuna nlogo na attu modhela mukutto wa yobolo.—Jo. 3:16.

Yezu vina ohoniha ovipimelela na ovilibihedha, yotagiha modha jiji emukamihedhiliye muyana wa elabo yo Fenísia. Yezu warumeliwe nlogo na Yehova ottiya attu a malogo mena. Sabwa ya ofewa waye murima wahimukamihedha muya ole. (Mt. 15:22-28) Yezu wali muttu wovipimelela katamela wi anamafwara aye akosege dhilobo dholigana. Yezu woniyile ejiwene vamuleveleliye marho waye Pedro mudhidhi omukoddiliye ddila ttaru wi kamuziwa. Vasogorhova iyene wahimuttomela mabasa manddimuwa Pedro. (Lk. 22:32; Jo. 21:17; Mer. 2:14; 8:14-17; 10:44, 45) Yotagiha ya Yezu enonisunziha wi ninofwanyela okala attu ovilibihedha wi ‘ofewa wehu murima woniwe na attu otene.’—Fil. 4:5.

 Ofewa wehu murima onele onikamihedha olaba na murenddele na muttu-muttuvi. Yezu wanaweddiha noderetu attu etene ewelela mazu aye, sabwa ya ejiwene Ayuda amukanela nrima ahimmagedha alogaga dhahi: “Akwaye anamapitxiya musoko na attegi.” (Mt. 11:19) Iyo ninasaze dhavi yotagiha ya Yezu negeddaga na attu ena? Mbali Louis, onda alabaga vyaka dhinjene na attu ottiyana-ttiyana ninga nameddelela milogo vina o Beteli ohiloga: “Olaba na attu ottiyana-ttiyana enkala ninga wimetxa ngome na malugu a munuwelo ottiyana-ttiyana. Olaba na malugu ninga aba enovaha mabasa wi ngomeya ekale pama mbwenye enowodheya nigeka nlugu-nlugu vamburoni vanfwanyelelani. Miyo ddinotamela okala muttu wofewa murima wila ddiwodhe olaba na attu otene ninga nikuru.” Iyo vina nikale dhahene!

Mudhidhi gani onfwanyela iyo okala attu ofewa murima vina ovilibihedha na abalihu a mmulogoni? Iyo nihikana gari yotonyihedha mikalelo esi nigalabaga na nikuru nehu na mabasa olaleya. Enowodheya iyo olaba na anamalaleya ottiyana vina a vyaka dhottiyana-ttiyana. Nivilebihedhe wi nilabe na namalaleyaya mowiwanana na guru dhaye vina na mulaleyelo onwodhiye.

Muttu onlaba na akwaye ninga nikuru ‘onowasunziha dhinziwiye.’ (1 Tim. 6:18) Mudhidhi olabile Yezu na Babe, iyene wahinonelamo wi Yehova kanvitela dhilobo dhaziwiye. Venevo vattandda Yehova ‘erimu’ na dhilobo dhotene Yezu ‘wali na iyene’ vina ohisunza dhilobo dhinjene na dhoniye. (Gano 8:27) Valiye velaboni ya vati Yezu wahasunziha anamafwara aye ‘dhilobo dhisunzihiwiye’ na Babe. (Jo. 15:15) Iyo vina ninofwanyela okosa yakene, nasunzihe attu ena asile dhinziwihu vina dhisunzilihu. Kaninattiye wasunziha attu ena esile dhinziwihu nubuwelaga wi nigakosa dhawene kaninafuniwe nanda kaninalabihedhiwe vina. Ottiya ejo ninele wagalala sabwa ya wasunziha attu ena esile dhinziwihu.

Vina nigakana mazu olibiha nawaddele attu anlaba vamodha na iyo. Weyo kunagalala muttu agawusiba vina agotamalela na murima wotene sabwa ya mabasa akosiliwe? Yezu wanasiba anamafwara aye. (Kaladdaniha na Mateu 25:19-23; Luka 10:17-20.) Yezu wahiloga wi anamafwara aye agahikosa ‘mabasa manddimuwa’ opitta abale akosiliye. (Jo. 14:12) Omattiyu womariha Yezu ahinakwa iyene wahiloga dhahi na anamafwara aye: ‘Nyuwo muhikala na miyo mmasosoni onilemi.’ (Lk. 22:28) Mazu aba ahalibiha venjene anamafwara a Yezu! Nigatamalelaga abale anlabihuna anele wagalala vina anele okana efunelo yolaba pama.

Mbali Kayode ohiloga: “Kili yofuneya okala woligana wi olabe pama na attu ena. Eli yofuneya ku wattiya ofwaseyene abale anlaba na weyo vina wavevutxela mabasa awa.” Koddi weyo onolaba mowiwanana na attu ena? Ononamo dhavi wavuza abali na arogora akala weyo onolaba pama na awene? Akala awene anoziveliwa olaba na weyo, dhawene ninga anamafwara a Yezu aziveliwa olaba na iyene, weyo onele ologa yakene elogile murumiwi Paulo: ‘Iyo ninlaba vamodha nowagalala.’—2 Kor. 1:24.