Mu malilu, Yesu kalilongesele kupwa ni yitanga yize mutu atamba kusolola mba akalakale kanawa ni akwo. Muze ejile hano hashi, iye yalongesa yitanga yacho yipema kuli tumbaji twenyi. Ni yetu mutuhasa kulilongesa yuma yinji ha chilweza cha Yesu. Mutuhanjika ha shimbi jitatu ja yuma yize twakulilongesa kupalikila mu chilweza cha Yesu. Shimbi jacho, mujitukwasa kukalakala kanawa ni akwetu ni kulinunga ni mandumbu jetu.

Mba tukalakale hamuwika ni akwetu, twakufupiwa kupwa akwa-kulikehesa. Mutu wa mutapu au, kakulemesa akwo waze akalakala no ku mulimo nawa keshi kufupa kusoloka chinji hanga akwo amumone. Yesu kapwile mukwa-kulikehesa nawa kalilongesele kupwa mutu wa mutapu au ni Tato, Yehova. Kwamba pundu, Yehova wika mwe watela kuvuluka ngwo Sakatanga. Chipwe chocho, iye katwalile akwo hanga anyingike ngwo, Mwanenyi kamukwashile. Chino chinasoloka zwalala ha yize Yehova ambile ha Uputukilo 1:26. Yamba ngwenyi: “Tulingenu mutu mu chano chetu.” Maliji wano kanasolola kuli Yesu ngwo, Yehova kali mukwa-kulikehesa.—Samu 18:35.

Muze Yesu apwile hano hashi, neye kapwile mukwa-kulikehesa. Chakutalilaho, muze te akumuchichimieka, iye nihindu kapwile ni kulemesa Yehova. (Marku 10:17, 18; Yoa. 7:15, 16) Yesu nawa kapwile ni kusa tachi jinji hanga apwe ni sambukila ni tumbaji twenyi. Kuli Yesu, ayo kapwile masepa hi ndungo ko. (Yoa. 15:15) Yesu nawa kakosele molu ja tumbaji twenyi hanga aalongese  chikuma chilemu cha kulikehesa. (Yoa. 13:5, 12-14) Ni yetu tunafupiwa kwimbulula chilweza cha Yesu, ni kusa upale wa mandumbu jetu ha chihela chitangu. Mutuhasa kukalakala kanawa nyi ‘twalemesa akwetu’ ni kwehuka kulihulumba nyi matuchichimieka nyi ka ha mulimo uze twalinga.—Roma 12:10.

Mutu yoze wakulikehesa kananyingika ngwo, “ku wunji wa akwa chiyulo kakuchikolesa.” (Yishi. 15:22) Twatamba kwiwuluka ngwetu, niumwe mutu unanyingika yuma yeswe wakuhi, chipwe ngwe kali ni yinyingi hanji utotombo unji. Chipwe Yesu mwene kambile ngwenyi, te kanyingikine yuma yeswe. (Mateu 24:36) Chikwo nawa, iye kafupile kunyingika manyonga ja tumbaji twenyi chipwe ngwe ayo te yihenge. (Mateu 16:13-16) Kashika tumbaji apwile ni kulivwa kanawa muze te akupwa nenyi hamuwika! Ni yetu tunafupiwa kupwa akwa-kulikehesa mu mutapu au. Nyi twatayiza ngwetu, kutwanyingikine yuma yeswe ni kupanjika yiyulo ya akwetu, ‘mutukolesa’ yiyulo yacho ni kufunga sambukila.’

Chipi-chipi makulwana a mu chikungulwila kanafupiwa kwimbulula kulikehesa cha Yesu muze akukalakala hamuwika. Ayo katamba kunyingika ngwo, spiritu yisandu muyihasa kukwasa mukulwana mweswawo kwamba chuma chize muchikwasa makulwana eswe kukwata chiyulo cha mana. Nyi ha chimwe kukunguluka cha makulwana, eswe malivwa kanawa ha kuhana yiyulo yo, muchipwa chashi kukwata yiyulo yipema yize muyiyukisa mandumbu eswe mu chikungulwila.

Mba tukalakale kanawa ni akwetu, tunafupiwa kupwa atu ashi ni kwehuka kunyonga ngwo, yuma yatamba kupwa ngwe chize tunazange. Ha yisuho yinji, Yesu kamwene chize Yehova apwa mwashi nawa akwete nyonga lialita. Chakutalilaho, iye kamwene chize Yehova asolwele keke kuli atu. Hamukunda wa shili, atu te kanatela kufwa. Alioze, Yehova yapwa mwashi nawa yahana ukuule hanga aalamwine.—Yoa. 3:16.

Ha mashimbu amwe, Yesu neye te kakupwa mutu mwashi nyi muchifupiwa. Chilweza chimwe chili muze akwashile umwe pwo Ka-Kanana. Yesu kamutumine hanga akwase tuvumbi twa Yehova, hi akwa-mavungu ko. Chipwe chocho, iye kapwile mutu mwashi, yakwasa pwo wacho. (Mateu 15:22-28) Yesu nawa kapwile mutu mwashi, mumu te keshi kushimbwila ungunu hali tumbaji twenyi. Tunachinyingika, mumu kakonekenene sepa lienyi Petulu, chipwe hanyima lia kulituna ngwo kamunyingikine. Nawa kulutwe, Yesu yahana yiteli  yinene kuli Petulu. (Luka 22:32; Yoa. 21:17; Yili. 2:14; 8:14-17; 10:44, 45) Chilweza cha Yesu chinatulongesa ngwo, tunafupiwa kupwa atu ashi ni kwecha hanga ‘umbovu wetu umoneke kuli atu eswe.’—Fwili. 4:5.

Kupwa atu ashi, muchitukwasa nawa kukalakala ni sambukila ni atu a mutapu weswe. Yesu kapwile ni kutwama kanawa ni atu eswe. Chino chatwalile akwa-kole jenyi kumulamikiza ngwo, kali “kasendo ka akwa kufwetesa lijimu ni yivulumunyi” waze te akutayiza sango jenyi. (Mateu 11:19) Kuchi mutuhasa kwimbulula chilweza cha Yesu ha kutwama kanawa ni akwetu? Louis, umwe ndumbu yoze wakalakalile miaka yinji ni atu alisa ngwe kalayi wa mbonge ni ku Mbetele, yamba ngwenyi: “Kuli yami, kukalakala ni atu akwo, chili ngwe kutunga chikalakala ni mawe alisa. Chili mulimo unene kutunga chikalakala chize muchimana ki ni mawe a mu mutapu au. Alioze chili chashi kuchilinga, nyi twasa hita liwe ha chihela chalita. Nakufupa kusa tachi hanga ngwijilile ni kuneha sambukila ha kukalakala kanawa ni akwetu.” Ni yetu tunazange kupwa atu a mu mutapu au!

Ha mashimbu aka mutuhasa kupwa atu ashi kuli mandumbu jetu mu chikungulwila? Mutuhasa kuchilinga muze tunakalakala mu chizavu chetu cha kuya mu munda. Mutuhasa kweseka kukalakala ni mandumbu alisa nawa a miaka yalisa. Mutuhasa kupwa atu ashi ni kwijilila ni mutapu uze ndumbu yoze twatuhuka nenyi mu munda anambujola, hanji kwambujola mu majila akwo waze iye anazange.

Mutu yoze wakukalakala kanawa ni akwo ‘kakulianyina’ no yuma. (1 Timo. 6:18) Ha mashimbu eswe waze Yesu akalakalile ni Tato mu malilu, iye kanyingikine ngwenyi, Yehova te keshi kumuswekela yuma. Muze Yehova “alulikile malilu” ni yuma yikwo yeswe, Yesu ‘kapwileho,’ chocho yalilongesa yuma yinji ha yize amwene. (Yishi. 8:27) Nawa muze apwile hano hashi, Yesu yalianyina ni tumbaji twenyi yuma yize ‘evwile’ kuli Tato. (Yoa. 15:15) Ni yetu mutuhasa kuchilinga ha kulianyina ni akwetu yinyingi ni utotombo wetu. Kutwatambile kwecha kulianyina yinyingi ni akwetu hanji kwecha kulongesa mutu mumu lia woma wa kutokesa mulimo wacho hanji kutusa kutenga. Shimbu tuchilinge, twakuwahilila ha kulianyina ni akwetu yuma yize twakulilongesa.

Mutuhasa nawa kulianyina maliji a utakamiso ni atu waze twakalakala no. Shina kushi kuwahilila muze umwe akukuchichimieka hanji kukusakwilila ni mbunge yeswe ha chuma chize walinga? Yesu kapwile ni kuchichimieka tumbaji twenyi. (Tala Mateu 25:19-23; Luka 10:17-20.) Yesu kalwezele tumbaji twenyi ngwenyi, ayo te malinga “yitanga yinene” kuhiana iye. (Yoa. 14:12) Ha ufuku muze te kanda achifwa, Yesu yachichimieka tumbaji twenyi ashishika ngwenyi: “Yenu nuli waze hananyongonona hamwe ni yami mu yeseko yami.” (Luka 22:28) Muhasa kuyonga chize maliji jacho akwachile ku mbunge yo? Chochene, maliji jacho, kaakolwezele chinji. Kwamba pundu, muze twakuchichimieka atu waze twakukalakala no, ayo kakuwahilila chinji nawa kakusa tachi hanga akalakale kanawa.

Ndumbu Kayode, yamba ngwenyi: “Kuwafupiwile kupwa mungunu mba ukalakale kanawa ni akwenu. Chuma chakufupiwa, chili kwecha atu waze wakalakala no alivwe kanawa ni kwashiwisa mulimo wo.” Shina wakukalakala kanawa ni akwenu? Kutala muhasa kuhula kuli amwe mandumbu akulweze yize ayo akunyonga hali yena ha chikuma chino? Nyi ayo kakuzanga kukalakala ni yena ngwe chize tumbaji te akuzanga kukalakala ni Yesu, acho muhasa kwamba ngwe chize ambile Paulu ngwenyi: “Tuli yikwashi ya uwahililo wenu.”—2 Kori. 1:24.