Vancung a um lioin Jesuh nih rianṭuantu hawi ṭha a sitermi sining hna kha a rak cawn cang. Cucaah vawleicung a um lioah midang he rianṭuanṭinak ah zohchunhawk ṭha bik a rak si. Jesuh nunning in zeitindah ṭhathnemhnak kan hmuh khawh? A nunning kan hlathlainak thawngin midang he ṭha tein rianṭuanṭi awkah a kan bawm khomi phunglam pathum kha kan hmuh khawh. Mah phunglam nih kan unau pawl he lungrual tein um awkah a kan bawmh lai.

Rianṭuanṭi hawi ṭha pakhat cu aa toidormi a si. Cun a rianṭuanṭi hawi kha a biapimi in a hmuh i a cungah lungthin pekter awkah aa zuam lo. Jesuh nih a Pa sinin mah toidornak sining kha a cawn. Amah lawng hi Sertu in auh awkah aa tlakmi a si ko nain Jehovah nih a Fapa le a rianṭuanṭi hawi pawl kha biapi ah a chiah hna. Mah kha Pathian chimmi bia in kan hngalh khawh. Hitin a ti: “Atu cu minung kan ser cang hna lai; kanmah mui an keng lai.” (Gen. 1:26) Mah bia a chimnak thawngin Jesuh nih Jehovah cu aa toidor tukmi a si ti kha a hngalh.—Salm 18:35.

Vawlei a um lioah Jesuh zong aa rak i toidor tuk. Mi nih a tuahmi kong he aa tlaiin an thangṭhat tikah Pathian tu kha a rak thangṭhat. (Mar. 10:17, 18; Johan 7:15, 16) Jesuh nih a zultu pawl he an karah daihnak a um peng nakhnga annih kha sal bantuk si loin hawikom bantukin a pehtlaih  hna. (Johan 15:15) Toidornak kong cawnpiak awkah an ke hmanh a rak ṭawlpiak hna. (Johan 13:5, 12-14) Kannih zong Jesuh bantukin kanmah duhnak nakin kan rianṭuanṭi hawi pawl duhnak kha biapi ah kan chiah deuh ve awk a si. ‘Pakhat le pakhat kan i upat’ i kanmah thangṭhatnak kha kan kawl lo tikah thil tampi kan tuah khawh.—Rom 12:10.

Aa toidormi pakhat nih cun “ruahnak cheutu an tam ahcun a hlawh a tling tawn” ti zong kha a hngalh. (Ptb. 15:22) Kan hmuhtonnak le kan thilti khawhnak cu zei bantuk a si hmanhah zeizong vialte a hngal dihmi minung a hohmanh an um lo ti kha kan i cinken awk a si. Jesuh hmanh nih thil vialte ka hngal dih lo ti kha a cohlan. (Matt. 24:36) Cun mitlinglo a simi a zultu pawl hmuhnak le ruahnak kha hngalh a duh. (Matt. 16:13-16) Cucaah a zultu pawl cu a pawng an um tikah siarem tein an um kho. Cu bantukin kannih zong kan i toidor, thil vialte kha kan hngal dih lo ti kha kan i cinken i midang chimmi kha kan ngaihpiak hna ahcun kan karah daihnak a um lai i ‘hlawhtlinnak’ kan hmu lai.

A hleiin Khrihfa upa pawl nih rian an ṭuanṭi tikah Jesuh toidornak i zohchunh cu a biapi tukmi a si. Cun thiang thlarau cu zei bantuk Khrihfa upa cung paohah rian a ṭuan kho ti zong an i cinken a hau. Meeting an tuah tikah pakhat cio nih an ruahnak kha zalong tein an chim ahcun Khrihfabu dihlak caah a ṭha dingmi biakhiahnak kha an tuah khawh lai.

Rianṭuanṭi hawi ṭha pakhat cu a rianṭuanṭi hawi pawl a pehtlaih hna tikah a tlarimi a si. Annih cu thlennak tuah a duhmi le mi duhnak a zulmi zong an si. Jesuh cu a Pa i a tlarimi sinak kong zoh awkah caanṭha tampi a ngei. Tahchunhnak ah, Jehovah nih minung kha thihnak in khamh awkah Jesuh kha a thlah.—Johan 3:16.

Jesuh nih a herh tik le aa tlak tik paohah mi duhnak kha a zulh. Israel mi hna sinah thlah a si ko nain Foinisia minu a bawmh ning kong kha philhhlah. (Matt. 15:22-28) A zultu pawl sin zongin a tlari tein aa ruahchanh. A hawikom ṭha Peter nih zapi hmai i a hlawt hnu hmanhah ngaihthiam awkah timhcia a rak si. A hnuah zumhnak he Peter kha a biapimi rian a rak pek. (Luka 22:32; Johan 21:17; Lam. 2:14; 8:14-17; 10:44, 45) Jesuh nunning nih midang duhnak kan zulhnak thawngin “mi vialte sinah nemnak tein [kan] um” awk a si ti kha fiang tein a kan hmuhsak.—Fil. 4:5.

A tlarimi sinak nih mi kip he dai tein rianṭuanṭi  awkah a herhmi thlennak hna kha tuah dingin a kan forh lai. Jesuh nih a pawngkam ah a ummi hna kha ṭha tein a rak pehtlaih hna. Cucaah a ralchanhtu pawl nih a chimmi thawngṭha a lehrulhmi “ngunkhuai khawltu hna le misual hna hawikom a si” tiah sual an rak puh. (Matt. 11:19) Jesuh bantukin midang he rian kan ṭuanṭi tikah hlawhtlinnak kan hmu kho ve maw? Hnulei sining a phunphun a ngeimi hna he khualtlawngtu rian le Bethel ah rian a ṭuanmi unaupa Louis nih hitin a ti: “Rian kan ṭuanṭimi phu kip kha vanpang saknak caah hmanmi aa lo lomi lung he tahchunh hna awkah kaa zuam. Aa lo lomi lung kha ṭha tein na remhnak thawngin aa remmi vanpang ah na chuah khawh. Kei zong aa remmi vanpang a chuah khawh nakhnga pumpak thlennak hna kha tuah awkah kaa zuam.” Mah cu a ṭha tukmi lungput a si.

Kan Khrihfabu ah a tlarimi kan si ti langhter khawhnak zei bantuk caanṭha dah kan ngeih? Lohmun rianṭuannak phu he rian kan ṭuanṭi tikah cutin langhter khawhnak caanṭha kan hmu. Kanmah nakin chungkhar rian tam deuh a ngeimi asiloah kan kum aa khat lomi thawngthanhtu hna he rian kan ṭuanṭi men lai. Phungchim rianṭuannak ah an i nuamh deuh nakhnga kan sining asiloah kan umtu ning kan thlennak thawngin a tlarimi kan si kha kan langhter kho lai maw?

Rianṭuanṭi hawi ṭha pakhat cu midang cungah ‘nunsian le thil ṭhenh’ a siangmi a si. (1 Tim. 6:18) Jesuh nih a Pa pawng i rian a ṭuan lioah Jehovah nih zei thil hmanh a thup lo ti kha a hngalh. Jehovah nih ‘van a timhtuah’ lioah Jesuh cu a “rak um cang” caah a sinin a cawn khawh. (Ptb. 8:27, NW) A hnuah Jesuh theng zong nih a Pa sinin a “theihmi [a ngeihmi] vialte” kha a zultu pawl sinah lunglawm tein a rak chimh hna. (Johan 15:15) Kannih zong kan hngalhmi kong kha unau pawl sinah kan chimh hnanak thawngin Jehovah kha kan i zohchunh khawh. Rianṭuanṭi hawi ṭha nih cun midang uk awkah theih an herhmi kong chim lo asiloah bawmh loin a um lai lo ti cu a fiang ko. Cun a hngalhmi thil ṭha kong kha midang sinah lunglawm tein a chimh hna lai.

Rian kan ṭuanṭimi hna kha kan bia zongin thazaang kan pek khawh hna. Pakhatkhat nih kan i zuamnak kha a hngalh i aa lawmhnak kha lungtak tein a langhter tikah kan i nuam, a si ko lo maw? Jesuh nih a rianṭuanṭi hawi pawl i an ṭhatnak a hmuh tikah anmah thangṭhat dingin a caan a lak. (Matthai 25:19-23 he tahchunh; Luka 10:17-20.) Jesuh nih keimah nakin “a ngan deuhmi hmanh” an tuah khawh lai tiah a ti. (Johan 14:12) A thih lai zan ah zumhfekmi a zultu pawl kha hitin a rak thangṭhat hna: “Harnak ka in caan a dihlak in a ka umpitu cu nanmah nan si.” (Luka 22:28) Mah bia nih a zultu pawl lung zeitlukin dah a suk lai ti le mah nih an tuahsernak in langhter awkah a forh hna lai ti kha na mitthlam ah cuanter hmanh. Kannih zong nih kan rianṭuanṭi hawi pawl kha kan thangṭhat hna ahcun an i nuam deuh lai i thil ṭha a chuak deuh lai ti cu a fiang ko.

Unaupa Kayode nih hitin a ti: “Rianṭuanṭi hawi ṭha si awkah mitling si a hau lo. Asinain a pawngah a ummi hna an i nuamh nakhnga le rian an ṭuannak ah a fawi deuh nakhnga aa zuam tu cu a hau .” Nangtah mah bantuk cu na si maw? Unau cheukhat kha zei bantuk rianṭuanṭi hawi dah ka si tiin na hal khawh hna. A zultu pawl nih Jesuh he rianṭuanṭi an duh bantukin na rianṭuanṭi hawi pawl nih nangmah he rianṭuanṭi an duh ahcun lamkaltu Paul nih hitin a ti bantukin na ti khawh ve lai: “Kannih cu nanmah lunglawmhter a duhmi nan rianṭuanṭi hawi kan si.”—2 Kor. 1:24, NW.