Ler Zezi ti dan lesyel, i ti devlop bann kalite ki ti ed li pour travay byen avek lezot. Apre ler i ti lo later, i ti en bon legzanp en dimoun ki ti travay byen avek lezot. Ki byenfe nou kapab gannyen avek legzanp Zezi? Ler nou etidye son legzanp, nou kapab vwar trwa prensip ki kapab ed nou pour travay byen avek lezot. Sa bann prensip pou osi ed nou vin pli ini avek nou bann frer ek ser.

En dimoun ki travay byen avek lezot i annan limilite. I apresye son bann koleg travay e i pa esey fer li paret pli enportan ki zot. Zezi ti aprann ki mannyer pour demontre limilite avek son Papa. Menm si zis Zeova ki merite annan sa tit Kreater, i ti anvi ki lezot i konn konsernan sa travay enportan ki son Garson in fer. Nou konn sa atraver sa ki Bondye ti dir: “Annou fer zonm parey nou.” (Zen. 1:26, NWT) Ler Zeova ti dir sa bann parol, Zezi ti konnen ki Zeova i annan limilite.​—Ps. 18:35, NWT.

Ler Zezi ti lo later, li osi i ti demontre limilite. Ler dimoun ti koz lo sa ki i ti fer, i ti glorifye Bondye. (Mark 10:17, 18; Zan 7:15, 16) Zezi ti fer bokou zefor pour ki i annan lape parmi son bann disip. I pa ti tret zot parey bann lesklav me i ti tret zot parey bann zanmi. (Zan 15:15) I ti menm lav zot lipye pour montre zot ki zot devret annan limilite. (Zan 13:5, 12-14) Parey Zezi, nou devret onor  nou bann frer ek ser dan plas met nou lentere avan sa ki pour zot. Ler nou “onor lezot” e nou pa enkyet konsernan lekel ki pou ganny felisite, nou pou kapab fer bokou keksoz ansanm.​—Rom. 12:10.

En dimoun ki annan limilite i rekonnet ki “letan i annan en kantite konseye, bann proze i reisi.” (Prov. 15:22, NWT) Nenport ki kantite leksperyans oubyen abilite ki nou annan, nou devret gard antet ki napa personn ki konn tou keksoz. Menm Zezi ti rekonnet ki i annan keksoz ki i pa konnen. (Mat. 24:36) I ti osi anvi konnen ki son bann disip ti konnen ouswa ki zot ti krwar. (Mat. 16:13-16) I pour sa rezon ki son bann disip ti kontan pour pas letan avek li! Pareyman, ler nou annan limilite e nou gard antet ki nou pa konn tou keksoz e nou ekout lopinyon lezot, nou pou fer ki i kontinyen annan lape parmi nou e nou bann ‘proze pou reisi.’

I vreman enportan pour bann ansyen swiv legzanp Zezi ler zot pe travay ansanm. Zot bezwen rapel ki lespri sen i kapab azir lo nenport ansyen lo konsey ansyen. Si bann ansyen i fer sir ki tou dimoun i lib pour partaz zot pwennvi ler zot dan zot renyon, zot pou kapab fer bann bon desizyon ki pou anmenn byenfe pour kongregasyon.

En dimoun ki travay byen avek lezot i rezonnab, i fasilman adapte avek lezot e i pare pour sede. Nou asire ki Zezi ti annan en kantite loportinite pour vwar son Papa montre ki i rezonnab. Par egzanp, Zeova ti anvoy Zezi pour sov limanite dan sa santans lanmor ki zot ti merite.​—Zan 3:16.

Zezi ti sede ler i ti neseser oubyen apropriye. Rapel ki menm si Zezi ti ganny anvoye kot pep Izrael, i ti ed en madanm Fenisyen. (Mat. 15:22-28) I ti osi rezonnab dan sa ki i ti ekspekte avek son bann disip. Apre ki son bon zanmi, Pyer, ti dir ki i pa konn li, Zezi ti pare pour pardonn li. Pli tar, i ti donn Pyer bann responsabilite vreman enportan. (Lik 22:32; Zan 21:17; Akt 2:14; 8:14-17; 10:44, 45) Legzanp Zezi i montre nou ki nou devret “rezonnab avek tou dimoun” e pare pour sede.​—Fili. 4:5.

Ler nou rezonnab, sa pou osi motiv nou pour adapte pour nou kapab travay dan lape avek tou sort kalite dimoun. Zezi ti tret  dimoun sitan byen ki son bann lennmi ti akiz li konmkwa i ti “en zanmi bann kolekter taks ek dimoun ki annan en move lavi.” (Mat. 11:19) Parey Zezi, eski nou kapab travay byen avek lezot ki diferan avek nou? En frer ki apel Louis ki’n travay avek diferan dimoun ler i ti sirveyan rezyonal e ler i ti dan Betel, i dir: “Travay ansanm avek dimoun enparfe i parey ler ou pe konstri en miray avek bann ros ki diferan groser. Vi ki sa bann ros i diferan, i demann bokou zefor pour konstri sa miray me sa miray i kapab vin drwat. Mon esey adapte pour mwan kapab travay avek lezot dan lape pour ki nou kapab fer nou travay.” Sa i en bon leta lespri!

Kan ki nou kapab montre ki nou rezonnab anver bann frer ek ser dan nou kongregasyon? Nou kapab fer sa ler nou dan nou group predikasyon. I kapab ki nou travay avek bann proklanmater ki pa menm laz avek nou oubyen ki zot responsabilite dan zot fanmir i diferan avek sa ki pour nou. Petet nou kapab adapte avek sa dimoun ouswa pare pour fer sa form predikasyon ki sa dimoun i kontan, pour li kapab annan plis lazwa dan predikasyon.

En dimoun ki travay byen avek lezot i “pare pour partaze.” (1 Tim. 6:18) Ler Zezi ti pe travay ansanm avek son Papa, i bezwen ki Zezi ti vwar ki Zeova pa kasyet nanryen. Ler Zeova “ti prepar lesyel,” Zezi “ti la” e i ti kapab aprann avek Zeova. (Prov. 8:27, NWT) Pli tar, Zezi ti dir son bann disip bann “keksoz ki [i ti’n] tande” avek son Papa. (Zan 15:15) Nou kapab swiv legzanp Zeova par partaz nou konnesans ek leksperyans avek nou bann frer ek ser. En dimoun ki travay byen avek lezot pa pou gard lenformasyon ki lezot i bezwen oubyen ki pou ed lezot, zis pour li esey kontrol zot. I pou kontan pour partaz avek lezot bann bon keksoz ki i’n aprann.

Nou kapab osi ankouraz nou bann frer ek ser. Ler en dimoun i remark nou bann zefor e i eksprim son lapresyasyon, pa sa i fer nou kontan? Zezi ti pran letan pour dir son bann disip bann bon keksoz ki i ti vwar dan zot. (Konpar Matye 25:19-23; Lik 10:17-20.) I ti menm dir zot ki zot ti “pou fer plis ki” sa ki i ti fer. (Zan 14:12) Sa zour swar avan i ti mor, i ti felisit zot e dir: “Zot sa bann ki’n toultan la avek mwan dan mon bann leprev.” (Lik 22:28) Zis mazinen ki kantite son bann parol ti’n ankouraz zot e motiv zot pour azir! Si nou pran letan pour felisit nou bann frer ek ser, zot pou pli zwaye e i tre probab ki zot pou fer plis.

En frer ki apel Kayode i dir: “En dimoun ki travay byen avek lezot pa parfe me i fer lezot zwaye e i fer li fasil pour lezot travay avek li.” Eski ou en dimoun koumsa? Petet ou kapab demann serten frer ek ser ki ou travay avek ki zot panse lo ou. Si zot kontan travay avek ou parey bann disip Zezi ti kontan travay avek Zezi, ou kapab dir sa ki zapot Pol ti dir: “Nou travay ansanm avek zot pour ki zot dan lazwa.”​—2 Kor. 1:24.