Jesu ʉ̃tʉ basidera iyi sode nebita kʼawuasi wuabemabawara sãwũã ãba trajaita. Maʉ̃ kʼarea nama egoroeda zesidera, maʉ̃ nebita wuabemara oũdubisi. ¿Sãwũã kʼarebabʉ Jesu yizabara dayirãra? Atia kʼawuadayi Daizeze Bedʼearadebemaba ũrãgʼa ũbea diabʉta dayirãʼa, naʉ̃ba kʼarebayi wuabemabawara ãba trajaita akʉza sobiapanaita.

Neũdukʼawua biabara edabʉta ũdubibʉ akʉza akʉbʉ ẽbẽra iyiʉ̃me trajabʉta. Jesubara maʉ̃ta ũdusi yi Zeze Jeowade. Abapai Jeowatrʉ jaraseabʉ, nekʼãrẽ jõmabʉ parãnata, mawũãsidu ũdusi yi warra trajora yibiabasita, iya jaraside: «Parãna ẽbẽrarã dayi kĩrãkʼabʉta» (Gén. 1:26). Naʉ̃ bedʼea ũrĩside ũdusi Jesubara Jeowara eda krĩchabʉta (Sal. 18:35).

Jesu nama egoroeda zesidera ũdubisi eda krĩchabʉta. Ẽbẽrata Jesu ʉ̃rʉ ibia bedʼeabasidera iyara Jeowa ʉ̃rʉ ibia bedʼeabibasi (Mar. 10:17, 18; Juan 7:15, 16). Maʉ̃ba Jesubara iyi kʼaidubemarara akʉ ẽ basi iyi nezokʼara kĩrãkʼa, awuarabʉrʉ akʉsi iyi neũdukʼawuara kĩrãkʼa (Juan 15:15). Adewara edabʉta krĩchabita iyi kʼaidubemara jĩrʉta sʉgʉsi (Juan 13:5, 12-14). Abarika Jesude  kĩrãkʼa kãgabʉta ũdubibara dayirã neũdukʼawuaraʼa akʉza nãã bʉeibara ãya nesidabʉta dayirãba nekʼãrẽ nesidabʉira. Adewara yiya wawiapanʉbʉrʉ akʉza biode krĩcha ẽ bʉrʉ kʼaiba ʉ̃ta kʼawuabʉta akʉza eda kʼawuabʉta mawũã jõma bia odayi (Rom. 12:10).

Yi ẽbẽra eda krĩchabʉbara kʼawuabʉ, «mejãchaʉba ũrãgʼabʉbʉrʉ nebiata ũduyi» (Prov. 15:22). Dayi buru biamina, kĩrãbeibara daya jõma kʼawua ẽãta, Jesubida mawũã kʼawuasi iya jõma kʼawuabʉ ẽãta (Mat. 24:36). Adewara kʼawuakĩrãbasi iyi kʼaidubemaraba sãwũã krĩchapanʉta ãyi nemitia omiabasimina (Mat. 16:13-16). Maʉ̃ kʼarea iyi kʼaidubemarara iyiʉ̃me bakĩrãbasi, idi ewaridebida dayirãba abarika oibara, edabʉta krĩchabʉrʉ kʼawuakĩrãñi wuabemaba krĩchabʉta akʉza aduʼa bayi wuabemabawara adewara sobia bayi.

Zõrãrãbara abarika odaibara Jesude kĩrãkʼa ãyi ãba trajabʉrʉdera. Kĩrãbedaibara Daizeze jaure zareabara zõrãrã aba jidaseabʉta bedʼea bia jaramarẽã, maʉ̃neba krĩcha bia jidadaita. Ãyi ãbapanʉne ũrĩpanʉbʉrʉ aba abakaʉba jarabʉta krĩcha biata jidayi akʉza maʉ̃ra yibia bayi kongregasionʼita.

Neũdukʼawua biabara ewari jõmaʉ̃nẽ jara ẽ iya krĩchabʉta, awuarabʉrʉ ũrĩkĩrãbʉ wuabemaba jarabʉta, maʉ̃ta ũdusi Jesubara yi Zezede. Bari jaraita, dayirãra beideba kʼaiba ẽdrʉbira neẽbasi, mawũãsidu Jeowabara yi warrata zokʼasi dayirãbari beimarẽã (Juan 3:16).

Jesubara ewari jõmaʉ̃nẽ iya krĩchabʉtrʉ yibiata ũdubi ẽ basi. Kĩrãbedadrʉ Jesura zokʼasidata Israel pʉwʉrʉtrʉ kʼarebamarẽã, mawũãsidu kʼarebasi ẽbẽra wẽrã fenisiadebemata (Mat. 15:22-28). Iyi neũdukʼawua Pedroba aña osidera, tẽã kĩrãduasi iyi nemitiara akʉza trajo audre diasi, adewara iyi kʼaidubemaraba obe ẽãsidu wẽta widi ẽ basi (Luc. 22:32; Juan 21:17; Hech. 2:14; 8:14-17;  10:44, 45). Dayirãba ũrĩpanʉbʉrʉ wuabemaba krĩchabʉta, ũdubida ẽ bayi daya krĩchabʉra audre yibiata, odaibara Jesuba oda kĩrãkʼa (Filip. 4:5).

Dayirãta ibiadepanʉbʉrʉ wuabemabawara akʉza ãyibʉde panʉbʉrʉ bia trajadayi. Jesura biabasi baera wuabemabawara, iyi nejʉrarabara jarasida Jesura ãbabʉta nemitia omiabawara (Mat. 11:19). Mawũẽra, ¿trajaseabʉka ẽbẽra dayirã kĩrãkʼabʉ ẽ mina Jesuba oda kĩrãkʼa? Mawũã oseabʉ. Mebẽã Louis, sirkuitode akʉza betelde trajadaba jarasi: «Mʉ̃ra mebẽrã awuarabʉbawara traja zebʉrʉ baera, ãyi aba abaka awuara krĩchapanʉ, maʉ̃ kʼarea mʉ̃ra ãyi kĩrãkʼa bakĩrãbʉ ãyibawara ibiade bʼaita. Adewara jʉrʉbʉ mʉ̃a kʼãrẽ mitia obʉta ara oita mawũã sobiade trajadaita».

¿Sãwũã dayi krĩchatrʉ audre yibiata ũdubi ẽ bai kongregasionera? Daizeze Bedʼea jaradia wãbʉrʉdera wãseabʉ zõrãrãbawara, warrara barabʉbawara akʉza warrarabawara. Maʉ̃nera dayirã aba abakaʉba jʉrʉibara ãyi kĩrãkʼa bʼaita.

Neũdukʼawua biabara iya erbʉta diakĩrãbʉ wuabemara (1 Tim. 6:18). Jesu yi Zezeʉ̃me trajabʉde ũdusi bʼaibara Jeowara nekʼãrẽ merabʉ ẽãta. Adewara Jeowabara nekʼãrẽ ʉ̃tʉbʉ jõma parãside Jesura mamabasi iyideba nekʼawuaita (Prov. 8:27). Maʉ̃ tẽã Jesu nama egoroeda zeside iyi kʼaidubemara jarasi yi Zezedeba kʼawuadata (Juan 15:15). Dayirãbida abarika odaibara Jeowade kĩrãkʼa, dayirãba kʼawuabʉra dayirã mebẽrã jaradiaibara. Neũdukʼawua biabara merabʉ ẽ iya kʼawuabʉta bari iyabʉrʉ zokʼa bʼaita, awuarabʉrʉ jaradiakĩrãbʉ nekʼãrẽ bia iya kʼawuadata.

Dayirãbara mebẽrã zowaĩnĩgʉa diaseabʉ, ¿bʉmabi dayirãra mejãcha sobiabʉ soiduba biga diabʉdadera kʼẽrẽpa bʼaita zarea obʉ kʼarea? Jesura ewari jʉrʉsi iyi kʼaidubemaraba nebia obʉ kʼarea biga diaita (akʉra Mateo 25:19-23; Luc. 10:17-20). Jesubara jarasi iyi kʼaidubemara, marabara mʉ̃ audre nekʼãrẽ zroma oita (Juan 14:12). Adewara diamasi Jesu bei nãã iyi kʼaidubemara jarasi: «Marã mʉ bawara bʼea mʉ bĩ ẽã o bʼeidʼu» (Luc. 22:28). Naʉ̃ bedʼeara Jesu kʼaidubemarara biode kʼarebasi zarea bʼaita. Dayirãbida idi ewari jʉrʉbʉrʉ mebẽrã zowaĩnĩgʉa diata, dayirãra sobiabayi akʉza kʼarebayi ãyi zarea bʼaita.

Mebẽã yi trʉ̃ Kayode, naʉ̃ta jarasi: «Bʉ neũdukʼawua bia bʼaira jõma daucha obaita nesida ẽ, mamina bʉa sobiabiseabʉ wuabemara biga diabʉde ãya nebia obʉ kʼarea». ¿Bʉ ʉ̃rʉra mawũã krĩchapanʉka? Widira mebẽã abaʉʼa, ¿mʉ̃ra neũdukʼawua biaka? ¿Ẽbẽrarã bʉbawara bakĩrãbʉka? Mawũãbʉbʉrʉ bʉa jaraseabʉ abarika Pablode kĩrãkʼa: «Daibara kʼarebabʉ marata sobia panamarẽã» (2 Cor. 1:24).