Hnei Iesu hna eënyine la itre thiina ka troa xatua nyidrë troa ce huliwa me itre xan e celë fen. Nge hnei nyidrëti hna amamai tulu koi angatr. Nemene la aqane tro sa kepe thangan qa ngöne la tulu i Iesu? Maine tro sa inine la tulu i Iesu, tro hë sa öhne la köni trepene meköt ka troa xatua së troa atreine ce huliwa me itre xan, me caas memine la itre trejin.

Ame la atr ka atreine ce huliwa me itre xan ke, ka hni ka ipië angeic. Angeic a wangatrune la itre ka ce huliwa me angeic, nge tha angeice kö a thele troa pi mama. Celë hi thiina hnei Iesu hna inine thene la Keme i nyidrë. Ngacama Iehova hmekuje hi la Atre Xup, ngo hnei Nyidrëti fe hna amamane la huliwa hna kuca hnene la Nekö i Nyidrë. Celë hi ka mama ngöne lo Akötresie a qaja ka hape: “Tro sha xupe la ate hnaiji shë.” (Gen. 1:26) Mama hnyawa hi koi Iesu laka, ka hetre hni ne ipië Iehova.—Sal. 18:35.

Ame e celë fen, hnei Iesu hna hetre hni ne ipië. Ame la kola atrunyi nyidrë me olene la itre hnei nyidrëti hna kuca ke, Iesu a atrunyi Akötresie. (Mar. 10:17, 18; Ioane 7:15, 16) Ketre, hnei Iesu palahi hna thele tingeting memine la itretre drei nyidrë. Ame koi nyidrë, itre sinee i nyidrëti angatr, ngo tha itre hlue kö angatr. (Ioane 15:15) Hnei nyidrëti lo hna wasine la itre waca i angatr matre ini  angatr la enyipiewekëne troa hetre hni ne ipië. (Ioane 13:5, 12-14) Ketre tu së fe, loi e tro sa wangatrune la itre ka ce huliwa me easë. Nge tha tro kö sa pane thele la loi koi së. Tru catr la huliwa hne së hna troa kuca e tro palahi sa ‘metrötrëne’ me wangatrune la itre xan.—Rom. 12:10.

Ketre, trotrohnine hi la atr ka hetre hni ne ipië laka, “kola acaten’ [la ite mekun] hnene la itete ithanata ka ala nyimu.” (Ite Edomë 15:22) Ngacama ka huliwa hnyawa së maine ekö hë së kuca la huliwa, ngo tha tro kö sa thëthëhmine laka, pëkö atr ka atrein hui ketre. Ame Iesu, trotrohnine hi nyidrë laka, hetre ewekë hnei nyidrëti hna thatrein. (Mat. 24:36) Ketre, nyidrëti a wangatrune la itre mekuna ne la itretre drei nyidrë. (Mat. 16:13-16) Celë hi matre, tha xou i angatre kö troa ce huliwa me nyidrë! Ketre tune fe, loi e tro sa dreng la itre xan me trotrohnine laka, hetre ewekë hne së hna thatre. E cili, tro hë sa mele tingeting me angatr, nge tro ha tro hnyawa la huliwa.

Nyipiewekë tro la itre qatre thup a nyitipu Iesu ngöne la angatr a ce huliwa. Tha tro kö angatr a thëthëhmine laka, ijije hi tro la uati hmitrötr a xatuane la nöjei qatre thup asë ngöne la lapa ne la itre qatre thup. Ame la angatr a icasikeu, tha tro kö ketre a xou troa hane qeje mekun. Tro hë angatre lai a axecië mekun hnyawa thatraqane la ekalesia.

Ame la atr ka atreine ce huliwa me itre xan ke, ka atreine waiewekë angeic. Ame Iesu, hnei nyidrë hna öhne la aqane waiewekë ne la Keme i nyidrë. Eje hi, hnei Iehova hna upi nyidrë troa meci pine la nöjei atr asë.—Ioane 3:16.

Ame itre xaa ijin, Iesu a nue la huliwa i nyidrë matre troa xatua itre xan. Celë hi lo hnei nyidrëti hna kuca kowe la föe ne Kanana, ngacama hna upi nyidrëti lo kowe la angetre Isaraela. (Mat. 15:22-28) Ketre, hnei nyidrëti hna atreine waiewekë göne la itre huliwa ne la itretre drei nyidrë. Thupene la Peteru a nuetriji Iesu, hnei Iesu hna nue la ngazo i angeic. Thupene lai, hnei nyidrëti hna hamë hnëqa ka tru koi Peteru. (Luka 22:32; Ioane 21:17; Itre hu. 2:14; 8:14-17; 10:44, 45) Eje hi, hnei Iesu hna amamane laka, “loi e mama cile kowe la nöjei atr ka hape, itre ka atreine tulu ewekë [së].”—Fil. 4:5.

 Ketre, troa mama laka, ka atreine tulu ewekë së, ngöne la easa atreine ce huliwa memine la nöjei pengöne atr. Hnei Iesu palahi hna nyihnyawane la itre ka lapa xötreithi nyidrë. Celë hi matre, hnene la itre ithupëjia hna upezö nyidrë ka hape, “sinee ne la itre ka hle mani me itre ka kuca la ngazo.” (Mat. 11:19) Hapeu, tro kö sa nyitipu Iesu me ce huliwa me itre xan? Hnei Louis hna xome la huliwa ne atre thupëne la sirkoskripsio me huliwa ngöne la Bethela. Alanyimu la itre trejin hnei nyidrëti hna ce huliwa memin. Öni nyidrë: “Ame la troa ce huliwa memine la itre atr ka tha pexeje kö ke, ceitune hi memine la troa xome la itre etë ka isapengön, matre acile la ketre ngöne uma. Maine tro sa saze la aqane amë la itre etë, tro ha meköti la ngöne uma. Ketre tune fe, hnenge hna eënyine la itre xaa thiina, matre troa atreine ce huliwa me itre xan ngöne la tingeting.” Drei la ketre aqane ujë ka lolo!

Eu la itre ijine tro sa amamane laka, ka atreine tulu ewekë së? Ijije hi tro sa amamane la thiina cili ngöne la easa icasikeu memine la gurup ne cainöj. Maine jë, tro sa ce cainöj memine la itre trejin ka hetre itre xaa hnëqa, maine ka tha ce xötre kö me easë. Hapeu, tro kö sa saze la aqane cainöje së matre thue madrine i angatr troa cainöj?

Ame la atr ka atreine ce huliwa me itre xan ke, angeic a “ce thawa me itre xan.” (1 Tim. 6:18) Ame lo Iesu a ce huliwa me Iehova, hnei nyidrëti hna öhne laka, pëkö hnei Akötresieti hna juetrën koi nyidrë. Ame lo Iehova a “acatene la hnengödrai,” ce Nyidrëti hi me Iesu. (Ite Edomë 8:27) Thupene lai, hnei Iesu hna ce thawa memine la itretre drei nyidrë “la nöjei ewekë [hnei nyidrëti hna] drenge” qaathene la Keme i nyidrë. (Ioane 15:15) Tui Iesu, loi e tro sa ce thawa kowe la itre ka ce huliwa me easë, la itre hne së hna atre. Tha tro kö sa juetrëne la itre xaa ithuemacany, göne hi matre troa musinë angatr me pi tru. Tro pe sa madrin troa ce thawa me angatr la itre hne së hna inin.

Ketre, loi e tro fe sa ithuecatre kowe la itre sine huliwa së. Hapeu, tha madrine kö së ngöne la kola qaja aloinyi së me aqane huliwa së? Hnei Iesu hna xomi ijine matre troa qaja aloine la itre ka ce huliwa me nyidrë. (Wange ju fe la Mataio 25:19-23; Luka 10:17-20.) Hnei nyidrëti fe hna qaja ka hape, ‘tru catre la itre huliwa i angatr’ hui nyidrë. (Ioane 14:12) Ketre, ame lo heji qëmekene tro nyidrëti a mec, hnei Iesu hna qaja aloine la itre aposetolo, ka hape: “Hnei nyipunieti pala hi hna ce me eni ngöne la itre akötreng.” (Luka 22:28) Eje hi, hnene la itre trengewekë cili hna ithuecatre kowe la itre aposetolo! Maine tro fe sa hane xomi ijin troa qaja aloine la itre ka ce huliwa me easë, tro hë angatre lai a madrin me catre huliwa.

Öni Kayode, ketre trejin: “Tha nyipiewekë kö troa pexej matre troa atreine ce huliwa me itre xan. Loi e tro pe sa ce xome la huliwa, matre tha tro kö a hace koi angatr.” Hapeu, celë kö la hne së hna kuca? Loi e tro sa hnyingëne kowe la itre trejin ka ce huliwa me easë. Maine angatr a madrin troa ce huliwa me easë, tune ka itretre drei Iesu me nyidrë, haawe, ijije hi tro sa qaja tui Paulo aposetolo, ka hape: “Eahuni pe la itre sine huliwa i nyipunie matre madrine jë nyipunie.”—2 Kor. 1:24.