Di Yesesi be de a hemel, a leli fa fu wooko makandii anga taawan. Neen meke di a kon a goontapu, a be poi soi taawan fa fu du a sani ya. Sowtu wini wi e fende te wi e poti pakisei na a fasi fa Yesesi be e wooko anga taawan? Te u luku a fasi fa Yesesi be e wooko makandii anga taawan, da wi e si dii sani di o yeepi u fu toon wan bun wookoman. Te wi e du u wooko bun, wi o poi libi na a wan anga den baala anga sisa fu u.

Wan bun wookoman a wan sama di abi sakafasi. A nai fii enke neen wawan e wooko taanga, ma ai si tu taki den sama di e wooko makandaa anga en e wooko taanga tu. Di Yesesi be e wooko makandaa anga en Dda, a be man si kiin taki en Dda be abi sakafasi. Bika winsi fa a Yehofa meke ala sani, toku a gi Yesesi gaandi di a meke a wooko makandii anga en. Yehofa á be abi fu taigi u taki Yesesi yeepi en meke ala sani, ma toku a meke sama sikiifi a sani ya aini Beibel. A sani ya e soi taki a abi sakafasi. Di Yehofa be de fu meke libisama, a taigi Yesesi taki: ‘Kon u meke libisama di e gei wi’ (Gen. 1:26). A sani di Yehofa taki ya be soi Yesesi kiin taki en Dda abi sakafasi tuutuu.​—Ps. 18:35.

Di Yesesi be de a goontapu, a soi taki enseefi abi sakafasi. Te sama be e gafa en, a á be e fii enseefi, ma a be e soi den taki a Yehofa den mu gafa (Malik. 10:17, 18; Yoh. 7:15, 16). Yesesi be e libi bun anga den disipel  fi en. A á be e si den enke saafu, ma a be e si den enke en mati (Yoh. 15:15). Wan leisi a wasi ala den futu fu leli den taki den be mu abi sakafasi (Yoh. 13:5, 12-14). Leti enke Yesesi, te wi e wooko makandaa anga taawan u mu e soi taki wi e lesipeki den. Wi á mu e du enke wi e du sani moo den, ma u mu e gafa den fu di denseefi e wooko taanga. Te u nai suku balinen fu den sani di wi e du, wi o man wooko bun anga ala sama.​—Rom. 12:10.

Wan sama di abi sakafasi o fusutan taki ‘te omen sama e taki fu seeka wan toli, sani e waka bun’ (Odo 15:22). Winsi i sabi du son sani bun, toku i mu holi a pakisei taki nawan libisama á sabi ala sani. Di Yesesi be de a goontapu a be taigi den bakaman fi en taki sani de di enseefi á be sabi (Mat. 24:36). A be e wani sabi fa den disipel fi en e denki fu son toli, winsi fa den be abi sondu (Mat. 16:13-16). A den sani ya meke sama be e piisii fu wooko makandaa anga Yesesi. Efu wi abi sakafasi enke Yesesi, da wi o holi a pakisei taki wi á sabi ala sani. Wi o go e aliki taawan te den e taki fa den e pakisei fu wan toli. A so wi o man wooko makandaa anga den fu du tyaipi bun wooko.

Te owluman e wooko makandaa, den mu meke moiti fu du sani enke Yesesi. Te den e taki fu wan toli, den mu holi a pakisei taki a santa yeye sa meke iniiwan fu den owluman di de ape taki wan sani di o yeepi den fu du sani anga koni. Te owluman e soi taki den e lesipeki denseefi a den sowtu komakandaa ya, den taa owluman ná o feele fu taki fa den e si wan toli. A so den o man du sani di o tyai wini gi a hii kemeente.

Wan bun wookoman e fiti enseefi a taawan. A nai suku fini tumisi. Di Yesesi be de a hemel, a omen leisi a si fa en Dda be e fiti enseefi a taawan. Winsi fa a ná Yehofa meke u sondu, toku a sende Yesesi kon dede gi u fu fii u fu sondu.​—Yoh. 3:16.

Son leisi Yesesi seefi be e fiti enseefi a den sama di a be e miti. Winsi fa a den Islayelisama Yehofa be sende en kon, toku a be yeepi a uman fu Finisiya di be soi taki en biibi be taanga (Mat. 15:22-28). Yesesi á be e suku fini a den disipel fi en tumisi. Di Peitilisi taigi sama taki a á be sabi Yesesi, Yesesi gi en paadon fu a sani ya. Bakaten a gi Peitilisi gaan faantiwowtu di e soi taki a be e  fitoow en ete (Luk. 22:32; Yoh. 21:17; Toli 2:14; 8:14-17; 10:44, 45). A fasi fa Yesesi be e du sani e soi u kiin taki ‘a fasi fa wi e tyai useefi mu e soi taki wi e fiti useefi a taawan’.​—Filip. 4:5.

Te wi e fiti useefi a taawan, wi o man wooko anga ala sowtu sama. Yesesi be e libi bun anga ala sama. Den feyanti fi en be e dyalusu di den be si a sani ya, neen meke den be e kuutu en taki ‘ai paa anga sama di e piki lantimoni anga sondu sama’ (Mat. 11:19). I si enke i sa wooko makandaa anga taawan winsi den e du sani taa fasi enke i? Luku a toli fu wan baala den e kai Louis. A wan hii pisiten a baala ya du a kelen-wooko. Baka dati a go wooko a Betel. Na ala sowtu sama a baala ya miti di a be e du den tu wooko ya. A taki: ‘Te yu e wooko makandaa anga taa sama di abi sondu enke iseefi, da a de leti enke i wani meke wan sikotu anga siton di á bigi aseefi. A o moo teke ten fu poti ibiiwan fu den siton ya a pe a mu de, ma toku i sa meke wan sikotu di taampu tollo anga den. Mi be e puubei tu fu kengi a fasi fa mi be gwenti du son sani fu man wooko makandii anga taawan.’ Ala u sa waka na a baala ya baka.

On ten u sa soi taki wi e fiti useefi a taawan aini a kemeente? U sa du a sani ya te u de aini a peleikiwooko. Kande wi e wooko anga wan sama di abi taa faantiwowtu a osu, efuso kande a wan sama di gaandi efuso yonkuu moo u. Efu a so, da i mu pasensi anga en. Meke moiti fi yu á du sani gawgaw te yu e wooko anga moo gaandiwan efuso sama di yonkuu moo yu. Efi yu e meke moiti fu yeepi den a wan fasi di bun gi den, na ala u tu man o piisii fu wooko makandaa.

Wan sama di e du en wooko bun, lobi ‘paati sani anga taawan’ (1 Tim. 6:18). Di Yesesi be e wooko anga en Dda, a be si taki a á be e kibii sani gi en. Beibel taki di Yehofa be e meke hemel, Yesesi be de ape e luku fa ai du sani (Odo 8:27). Bakaten di Yesesi kon a goontapu, a be e du sani enke en Dda. A be e ‘taigi den disipel fi en ala den sani di en Dda be taigi en’ (Yoh. 15:15). U sa waka a Yehofa anga Yesesi baka te wi e leli taawan san u sabi. Wan bun wookoman nai kibii sani gi taawan fu di a wan tyai nen taki a sabi sani moo den. Ma ai piisii fu paati den bun sani di a leli anga den baala anga sisa fi en.

Wan taa fasi fa u sa gi sama sani, a te wi e taki sani di e gi den taanga-sikin. I nai fii bun te sama gafa i fu a taanga wooko di yu e du noh? Yesesi be lobi gafa den disipel fu den sani di den be e du. (Luku Mateyesi 25:19-23; Lukasi 10:17-20 tu). Wan leisi a be taigi den taki den be o du gaan sani moo en seefi (Yoh. 14:12). A neti fosi sama kii en a taigi den disipel fi en taki: ‘A wi be e holibaka gi mi di tesi be e miti mi’ (Luk. 22:28). A sani di a taki ya be musu gi den taanga-sikin fu du moo san den be e du kaba. Efu useefi e teke ten fu gafa u baala anga sisa, a sani ya o gi den taanga-sikin. Den o moo du den wooko anga piisii tu.

Wan baala den e kai Kayode taki: ‘Te wan sama a wan bun wookoman, dati á wani taki a nai meke fowtu. Ma a fasi fa ai du sani e meke taawan piisii fu wooko makandii anga en.’ I si enke yu a wan bun wookoman? I sa akisi wantu baala anga sisa fa den e denki fu a toli ya. Efu den e piisii fu wooko makandii anga yu enke fa den disipel fu Yesesi be e piisii fu wooko anga en, da leti enke apostel Pawlesi iseefi sa taki: ‘Wi e wooko makandii anga u fu u sa piisii.’​—2 Kor. 1:24.