Ponda a tano̱ o mo̱ń, Yesu oko bede̱mo bena be boli ná a be̱ diko̱m l’ebolo la bwam. Nik’e boli ná ponda a po̱ino̱ o wase, a ta eyembilan a bwam ya moto nu mabole̱ ebolo na bane̱ o mbad’a bwam. Nje eyembilan a Yesu yeno̱ ná yokwe̱le̱ biso̱ e? Di no̱ngi te̱ ponda o jombwea eyembilan ao, je ná di maka bete̱sedi belalo be ná bongwane̱ biso̱ o be̱ mako̱m m’ebolo ma bwam. Be bete̱sedi be me̱nde̱ jongwane̱ ná jalatane̱ di be̱ oteten a biso̱ na bonasango na bonańango asu.

Diko̱m l’ebolo la bwam di malee̱le̱ sibise̱ la ńolo, di malee̱ ná mane̱ mako̱m mao m’ebolo me mweńa, di si malee̱le̱ pe̱ to̱ ńolo. Yesu oko nde sibise̱ la ńolo ombasanedi ma Sango. To̱ná Yehova mo̱me̱ne̱ mō̱ nde a dongame̱n belabe̱ ná Muwekedi, a puli ná ebol’a mweńa Mun’ao a bolino̱ pe̱ e biane̱. Di maso̱ṅtane̱ nika tongwea na ben byala ba Loba ná: “Ese̱le̱ biso̱ di weke moto kaponda bowan basu.” (Bbot. 1:26) Ponda Yehova a kwalino̱ be byala, Yesu a so̱ṅtane̱ ná Yehova e sibise̱ la ńolo jita.—Mye. 18:36.

Ponda a tano̱ o wase, Yesu a lee̱le̱ mulemlem ma sibise̱ la ńolo. Niponda bato ba tano̱ ba sesa mo̱ ońola mambo a tano̱ a bola, a ta nde a bola Loba esese. (Marko 10:17, 18; Yohane 7:15, 16) Yesu a we̱ ná a be̱ musango na bokwedi bao, ba ta pe̱ nde mo̱  mako̱m seto̱ bakom. (Yohane 15:15) Ou na mo̱me̱ne̱ myende ma bokwedi bao o jokwe̱le̱ babo̱ sibise̱ la ńolo. (Yohane 13:5, 12-14) Kapo̱ ka Yesu, biso̱ pe̱ jangame̱n bola mako̱m masu m‘ebolo edube, o mulopo ma se̱le̱ nde jombwea bwam ba biso̱me̱ne̱. Di ‘se̱le̱ te̱ bola bape̱pe̱ edube,’ esibe̱ wasa ná biso̱ nde di sesabe̱ ponda ye̱se̱, di me̱nde̱ we̱le̱ bola mambo jita.—Rom. 12:10.

Moto nu sibise̱ ńolo a memba pe̱ ná “malea me te̱ jita, [myano] mi matongwa.” (Min. 15:22) E be̱ ná di be̱n dibie̱ la longe̱, to̱ ná di bi bola mambo jita, di si dimbea ná mot’a benama to̱ mō̱ a si bi mambo me̱se̱. To̱ Yesu mo̱me̱ne̱ embi ná a si ta a bia mambo mō̱. (Mat. 24:36) A ta pe̱ e̱ne̱ beboledi na mo̱nge̱le̱ ma bokwedi bao mweńa, to̱ná ba si tano̱ ke̱nge̱nge̱. (Mat. 16:13-16) Ońola nika nde mako̱m mao ma tano̱ muńe̱nge̱ o be̱ mo̱ mbasan! Biso̱ pe̱ di lee̱le̱ te̱ sibise̱ la ńolo, jemba pe̱ ná di si bi mambo me̱se̱, nde di be̱ pe̱ be̱be̱ o senga mo̱nge̱le̱ ma bane̱, di me̱nde̱ bola ná musango mu be̱ oteten asu, di me̱nde̱ pe̱ ‘tongwe̱le̱’ mwemba.

Ye mweńa tobotobo ná batudu bembilane̱ sibise̱ la ńolo la Yesu ke̱ ba mabola ebolo mwemba. Ba s’angame̱n dimbea ná mudī musangi mwe ná mu tute̱le̱ to̱ njika mutudu nde o to̱po̱ lambo le ná longwane̱ dibe̱le̱ o no̱ngo̱ bedomsedi ba bwam. Yete̱na o ndongame̱n abu, batudu ba boli ná moto te̱ a be̱ wonja o bola jo̱nge̱le̱ lao, ba me̱nde̱ no̱ngo̱ bedomsedi be me̱nde̱ tombwane̱ mwemba mwe̱se̱.

Diko̱m l’ebolo la bwam di malee̱le̱ muyao ke̱ di mabola ebolo na bane̱. E be̱be̱ o tukwa mo̱nge̱le̱ mao, na jemea mo̱nge̱le̱ ma bane̱. Ye̱ke̱i te̱ Yesu e̱n ngedi jita ne̱ni Sango a lee̱le̱no̱ muyao. K’eyembilan, Yehova a lom mo̱ o sunga bato ba benama na mbako a kwedi ńena ńangame̱n babo̱.—Yohane 3:16.

Yesu pe̱ a ta be̱ a tukwa mo̱nge̱le̱ ke̱ nik’e mapula to̱so̱ ke̱ nik’e te̱nge̱n pe̱. O̱nge̱le̱ ne̱ni ongwane̱no̱ nu mut’a Kanaan, to̱ná a tano̱ nde a lomabe̱ ońola ndabo a Israel (Mat. 15:22-28) A si ta pe̱ to̱ engane̱ bokwedi bao buka nje beno̱ ná ba bola. Ponda diko̱m lao la batabata Petro a to̱bino̱ mo̱ o mpoma, Yesu a ta be̱be̱ o lakise̱ mo̱. Ombusa ponda, a bake̱ Petro m’bē̱ minde̱ne̱. (Lukas 22:32; Yohane 21:17; Bebolo 2:14; 8:14-17; 10:44, 45) Eyembilan a Yesu e malee̱  ná bwē ná jangame̱n “jese̱le̱ ná muyao [masu] mu biane̱ na bato be̱se̱,” nika ńe nde ná jangame̱n tukwa mo̱nge̱le̱ masu ponda iwo̱.—Fil. 4:5.

Be̱ la muyao di me̱nde̱ pe̱ tute̱le̱ biso̱ o tukwa mbad’asu ńa bola ebolo o bwam ná di we̱le̱ bola ebolo na bato be̱se̱ na musango. Yesu a ta ombwea ba ba ta na mo̱ bwam kańena basingedi bao bena ba ta ba ko̱no̱ne̱ mo̱, ba bake̱le̱ mo̱ ná e nde “diko̱m la bako̱tedi na babobe” bena ba ta ba senga mwe̱ndi mao. (Mat. 11:19) Mo̱ biso̱ pe̱ je ná di tongwe̱le̱ o bola ebolo na ba be diwengisan na biso̱ e? Louis, nu boli ebolo na jita la bato be diwengisan ke̱ e muboled’ebondo na ke̱ e o Bete̱l, mo̱ ná: “Bola ebolo mwemba na bane̱ bato ba titi ke̱nge̱nge̱, nika ńe nde ka longa edima na madale ma be̱n mame̱ne̱ me diwengisan. Kana madale meno̱ diwengisan, nika e mabaise̱ miwe̱n jita ná edima e te̱me̱ bwam. Na po̱ngi miwe̱n o wana mawengisan o mbad’am ńa bola, o bwam ba bola ebolo na musango mwemba na bane̱, ná ebolo yale oboso.” E se̱ edī a bwam e!

Njika ponda jeno̱ ná di lee̱le̱ bape̱pe̱ muyao o mwemba masu e? Je ná di bola nika ke̱ je na epep’asu ya dikalo. Je ná di bola ebolo na bate̱ dikalo bena ba be̱n m’bē̱ mena di si be̱nno̱ o mbia, to̱so̱ bena ba be̱n mimbu me diwengisan na masu. Je ná di sibise̱ bodu ba lo̱ndo̱, to̱so̱ di te̱ dikalo o mbadi ni do̱lisan babo̱ ná ba bate bwane̱ dikalo muńe̱nge̱.

Diko̱m l’ebolo la bwam le be̱be̱ o ‘jabane̱ nje di be̱nno̱.’ (1 Tim. 6:18) Ke̱ e o bola ebolo na Sango, Yesu a maki ná Yehova a si mawuta to̱ lambo. Ponda Yehova a ‘wekino̱ mo̱ń,’ Yesu “ukedi,” a we̱li pe̱ jokwa na mo̱. (Min. 8:27) Ombusa ponda, Yesu mo̱me̱ne̱ a ta muńe̱nge̱ o jabane̱ na bokwedi bao “me̱se̱ [a] senganno̱” Sango ao. (Yohane 15:15) Je ná jembilane̱ Yehova tongwea na langwea bane̱ bonasango na bonańango mambo mena jokono̱. Ye̱ke̱i te̱, diko̱m l’ebolo la bwam di si me̱nde̱ wutane̱ bane̱ mambo bangame̱nno̱ bia to̱ me ná mongwane̱ babo̱ buka te̱ ońolana a mapula be̱ne̱ ngińa omo̱ń abu. E muńe̱nge̱ o langwea bane̱ nje okono̱.

Je pe̱ ná di langwea mako̱m masu m’ebolo byala be membe̱ babo̱. Mo̱ moto a maki te̱ miwe̱n di mapo̱ngo̱no̱ na mo̱ a sesa biso̱, di si masenga bwam e? Yesu a ta be̱ a no̱ngo̱ ponda o sesa mako̱m mao m’ebolo. (Kobisane̱ Mateo 25:19-23; Lukas 10:17-20.) A langwedi na babo̱ ná ba me̱nde̱ “bola bebolo bende̱ne̱ be buki” bao. (Yohane 14:12) O bulu bo se̱le̱ na kwed’ao, a sesi bokwedi bao ba jemea na ben byala ná: “Bińo̱ nde le ba bena ba tingam na mba o pond’am ńa kekisabe̱.” (Lukas 22:28) Dutea te̱ ne̱ni be byala bembe̱no̱ babo̱, be tute̱le̱ pe̱ babo̱ o ebolo! Biso̱ pe̱ di no̱ngi te̱ ponda o sesa mako̱m masu m’ebolo, ye̱ke̱i te̱ ba me̱nde̱ be̱ muńe̱nge̱, yen ebe ba bata pe̱ bola ebolo bwam.

Munasango mō̱ nu belabe̱ ná Kayode mo̱ ná: “Diko̱m l’ebolo la bwam di s’angame̱n be̱ ke̱nge̱nge̱, nde a mabola nde ná ba ba mabole̱ ebolo na mo̱ ba be̱ muńe̱nge̱, a mabola pe̱ ná ebolo e wameye babo̱.” Mo̱ we nde diko̱m l’ebolo la bwam e? Yen ebe we ná o baise̱ bonasango na bonańango bō̱ ná ba langweye wa njika pat’a diko̱m l’ebolo weno̱. Yete̱na be muńe̱nge̱ o bola ebolo na wa, ka nje te̱ bokwedi ba Yesu pe̱ ba tano̱ muńe̱nge̱ o bola ebolo na mo̱, wa pe̱ we so̱ ná o kwala kapo̱ ka ńamuloloma Paulo ná: “Jongwan nde muńe̱nge̱ mańu.”—2 Kor. 1:24.