Aber a Jesus wɔ sor no, osũaa su pa ahorow a ɔboaa no ma ɔyɛɛ ɔboafo pa. Afei ber a ɔbaa asaase do no, ɔbɛyɛɛ obi a nna otum nye afofor bɔ mu yɛ edwuma yie. Yebesi dɛn esũasua Jesus no nhwɛdo no? Sɛ yesusu dza Jesus yɛe no ho yie a, yebohu ngyinadonsɛm ebiasa bi a ɔbɔboa hɛn ma yaayɛ aboafo pa. Dɛm ngyinadonsɛm yi bɔboa hɛn ma yeetum nye hɛn nuanom abɔ mu ayɛ adze.

Obi a ɔyɛ ɔboafo pa no, ofi ahobrɛadze mu bu ne mfɛfo edwumayɛfo dɛ wɔsom bo, na ɔnnyɛ biribiara a ɔkyerɛ dɛ ɔbɔ noho mbɔdzen kyɛn hɔn. Jesus sũaa ahobrɛadze su a ɔtse dɛm fii n’Egya hɔ. Yenyim dɛ Jehovah nkotsee na ɔfata dɛ wɔfrɛ no Ɔbɔadze, naaso ɔmaa yehun dwuma a ne Ba no dzii boaa no aber a nna ɔrobɔ adze no. Yehu iyi wɔ asɛm a Nyankopɔn kãe yi mu. Ɔkãa dɛ, ma “yɛnyɛ nyimpa wɔ hɛn su do.” (Gen. 1:26) Asɛm a Jehovah kãe yi maa Jesus hun dɛ ɔbrɛ noho adze.​—Ndw. 18:35.

Jesus baa asaase do no, noara so brɛɛ noho adze. Aber a afofor kamfoo no wɔ dza ɔyɛe ho no, ɔdze ayɛyi no maa Jehovah. (Mark 10:17, 18; John 7:15, 16) Jesus nye n’esuafo no tsenaa asomdwee mu, na obuu hɔn dɛ n’anyɛnkofo na mbom nnyɛ nkowaa. (John 15:15) Ɔhohoor hɔn anan ho mpo dze kyerɛɛ hɔn dɛ ɔwɔ dɛ wɔbrɛ hɔnho adze. (John 13:5, 12-14) Hɛn so, ɔnnsɛ dɛ yebu hɛnho dɛ yɛkyɛn hɛn mfɛfo edwumayɛfo, mbom ɔwɔ dɛ yedzi hɔn  nyi. Sɛ yɛdze enyidzi ma afofor, na yaammper annhwehwɛ enyimnyam a, yebotum ayɛ pii wɔ Jehovah no som mu.​—Rom. 12:10.

Obi a ɔbrɛ noho adze no san gye to mu dɛ “egyinatufo dodow” mu na wosi asɛm pi. (Mbɛ. 15:22) Ɔmmfa ho suahu a yɛwɔ, anaa dza yetum yɛ no, ɔwɔ dɛ yɛkaa dɛ nyansa nnyi ɔbaakofo ne tsirmu. Jesus mpo gyee too mu dɛ nna ndzɛmba bi wɔ hɔ a onnyim. (Matt. 24:36) Afei so, nna ɔpɛ dɛ ohu dza n’esuafo no nyim, ntsi nna ɔyɛ a ɔma hɔn kwan ma wɔkyerɛ hɔn adwen wɔ nsɛm bi ho. (Matt. 16:13-16) Iyi ntsi, nna hɔn a wɔnye no bɔ mu yɛ edwuma no enyi gye! Hɛn so sɛ yɛbrɛ hɛnho adze na yɛgye to mu dɛ nnyɛ biribiara na yebotum ayɛ a, yɛbɛgye afofor hɔn adwenkyerɛ ato mu. Iyi bɛma yɛnye hɔn atsena asomdwee mu, na yeetum nye hɔn ayɛ pii.

No ho hia papaapa dɛ asafo mu mpanyimfo sũasua Jesus n’ahobrɛadze no ber a wɔbɔ mu yɛ edwuma no. Ɔsɛ dɛ wɔma ɔtsena hɔn adwen mu dɛ, sɛ wohyia mu na wɔrobɔ pɔw a, sunsum krɔnkrɔn no botum ama asafo mu panyin biara aakã biribi a ɔbɔboa hɔn ma woeesi gyinae pa. Sɛ asafo mu mpanyimfo reyɛ nhyiamu na wɔma asomdwee tsena hɔn ntamu a, ɔbɛma obiara efi ne pɛ mu akyerɛ n’adwen. Iyi bɛma wɔabɔ mu esi gyinae a asafo no nyinara benya do mfaso.

Obi a ɔyɛ ɔboafo pa no, sɛ ɔnye afofor ridzi a, ɔda ntseasee edzi. Ɔnnyɛ katsee, mbom ɔgye afofor hɔn adwenkyerɛ to mu. Jesus nyaa ho kwan pii hun mbrɛ n’Egya daa ntseasee edzi. Dɛ nhwɛdo no, Jehovah somaa no ma ɔbɛgyee adasamba fii owu mu.​—John 3:16.

Sɛ nna ɔfata dɛ Jesus da ntseasee edzi a, ɔyɛ dɛm. Ɔwɔ mu dɛ nna ɔasoma no dɛ ɔnkɔ Israelfo nkyɛn dze, naaso sɛ yɛbɛkaa a, ber bi ɔboaa Canaannyi ɔbaa bi. (Matt. 15:22-28) Afei so, ɔdaa ntseasee edzi wɔ dza nna ɔhwɛ kwan dɛ n’esuafo no bɛyɛ no ho. Aber a Peter kãe wɔ bagua mu dɛ onnyim Jesus no, ɔdze no mfom kyɛɛ no. Ekyir yi, Jesus dze asodzi ahorow a no mu yɛ dur hyɛɛ Peter ne nsa. (Luke 22:32; John 21:17; Andw. 2:14; 8:14-17; 10:44, 45) Dza Jesus yɛe no ma yehu no pefee dɛ ɔwɔ dɛ yɛtse afofor ase. Sɛ yɛyɛ dɛm a nna ‘yɛrema nyimpa nyina ehu hɛn ntseasee.’​—Phil. 4:5.

Afei so sɛ yɛda ntseasee edzi a, ɔbɔboa hɛn ma yeetum nye nyimpa ahorow nyina ayɛ edwuma asomdwee mu. Jesus nye hɔn a nna wɔbɛn no no dzii no yie. Iyi ntsi n’atamfo no mpo kãa dɛ ɔyɛ “atowgyefo nye ndzebɔnyɛfo nyɛnko.” Dɛm atowgyefo nye ndzebɔnyɛfo yi na wotsiee  Jesus n’asɛm. (Matt. 11:19) Ana hɛn so yebotum esũasua Jesus, na yɛnye afofor aabɔ mu ayɛ edwuma? Louis yɛ onua a ɔdze mfe dodow bi ayɛ ahwɛfo akwantufo edwuma no na ɔasom wɔ Bethel so. Ɔnye nyimpa ahorow a ɔsor beebi a wofi abɔ mu ayɛ edwuma. Ɔkãa dɛ: “Enuanom a menye hɔn bɛyɛ edwuma biara, medze hɔn toto mbobaa a ɔsor mbrɛ no mu biara tse a wɔdze rotow ɔfasu ho. Sɛ ihu beebi a ɔwɔ dɛ edze bobaa no mu biara hyɛ a, ibotum atow fasu a ɔtsen. Mara so meyɛ m’afamu dze mbrɛ ɔbɛyɛ a yɛbɔbɔ mu ayɛ edwuma asomdwee mu.” Iyi yɛ suban pa!

Ebɛn aber na yebotum nye hɛn nuanom abɔ mu ayɛ adze? Yebotum ayɛ dɛm ber a yɛnye hɛn asɛnka kuw mufo abɔ mu reyɛ asɛnka edwuma no. Yebotum nye enuanom a ɔsor asodzi a wɔwɔ wɔ hɔn ebusua mu anaa ɔsor mfe a woedzi abɔ mu akɔ asɛnka. Ɔwɔ dɛ yɛda ntseasee edzi na yɛhwɛ mbrɛ hɔn ahoɔdzen tse na yɛnye hɔn nantsew dɛ mbrɛ ɔsɛ. Anaaso, yebotum ahwɛ asɛnka edwuma ne fã a hɔn enyi gye ho na yɛnye hɔn aabɔ mu ayɛ ama woeenya enyigye pii?

Obi a ɔyɛ ɔboafo pa no, ofi ne pɛ mu kyɛ adze. (1 Tim. 6:18) Jesus nye n’Egya bɔɔ mu yɛɛ edwuma no, ohun dɛ Jehovah ammfa biribiara eennsuma no. Aber a nna Jehovah ‘risiesie ɔsorsor no’ nna Jesus ‘wɔ hɔ’ na osũaa ndzɛmba pii fii no hɔ. (Mbɛ. 8:27) Ekyir yi Jesus nankasa dze enyigye kãa “ndzɛmba” a osũae fii n’Egya hɔ no bi ho asɛm kyerɛɛ n’esuafo no. (John 15:15) Yebotum esũasua Jehovah no nhwɛdo no na yɛnye hɛn nuanom akyɛ nyimdzee na suahu a yɛwɔ no. Ampaara, ɔboafo pa mmfa biribi a no nuanom behia anaa ɔbɔboa hɔn no nnkam hɔn. Ɔnnyɛ dɛm mmfa nnkyerɛ dɛ ɔno na odzi hɔn do anaadɛ wɔhyɛ n’ase. Mbom, n’enyi bɛgye ho dɛ ɔnye afofor bɛkyɛ ndzɛmba pa a oesũa anaa onyim no.

Afei so, yebotum ahyɛ hɛn nuanom nkuran. Sɛ onua bi hu mbɔdzen a yɛbɔ na ofi n’akoma mu kamfo hɛn a, ana ɔnnka hɛn akoma anaa? Jesus kamfoo n’esuafo no wɔ mbɔdzen a nna wɔbɔ no ho. (Fa toto Matthew 25:19-23; Luke 10:17-20 ho.) Ɔkãa kyerɛɛ n’esuafo no mpo dɛ wɔbɛyɛ ndwuma akɛse ‘akyɛn’ dza ɔyɛe no. (John 14:12) Anafua a adze rebɛkye ma Jesus ewu no, ɔkãa kyerɛɛ n’asomafo anokwafo no dɛ: “Hom nye hɔn a hom ada ho aka mo ho wɔ mo nsɔhwɛ mu.” (Luke 22:28) Ɔwodze twa ho mfonyin hwɛ. Obotum aba dɛ, asɛm a Jesus kãa kyerɛɛ n’esuafo yi kaa hɔn akoma na ɔmaa wɔyeer hɔnho wɔ esuafoyɛ edwuma no mu! Hɛn so, sɛ yɛgye ber kamfo hɛn nuanom a, ɔda edzi kofee dɛ, hɔn enyi bɛgye na wɔaayɛ pii wɔ esuafoyɛ edwuma no mu.

Onua bi a wɔfrɛ no Kayode kãa dɛ, “Ɔnnsɛ dɛ obi yɛ nyimpa a odzi mũ ana ɔaayɛ ɔboafo pa. Mbom, ɔboafo pa nye obi a ɔma afofor a woetwa no ho ehyia no hɔn enyi gye na ɔma hɔn edwuma yɛ mberɛw ma hɔn.” Ana eyɛ w’adze dɛ ɔboafo pa a yɛakã no ho asɛm no? Ibotum ebisa wo nuanom no mu binom, na sɛ eyɛ ɔboafo pa anaa ennyɛ a, wɔbɛkã ho asɛm akyerɛ wo. Sɛ enuanom enyi gye ho dɛ wɔnye wo bɛyɛ edwuma dɛ mbrɛ Jesus n’esuafo no enyi gyee dɛ wɔnye no bɛyɛ edwuma no a, ɔno ibotum akã asɛm a ɔsomafo Paul kãe no bi. Ɔkãa dɛ: “Yɛyɛ hom enyigye aboafo.”​—2 Cor. 1:24.