E vulica kina o Jisu na itovo me itokani ivakaraitaki vinaka vei ira na cakacaka vata kei koya e vuravura. Ena yaga vakacava vei keda na ivakaraitaki i Jisu? Nida dikeva vinaka na nona ivakaraitaki, eda na raica e tolu na ivakavuvuli meda dua kina na itokani vakacakacaka vinaka. Na ivakavuvuli qo ena uqeta na yalo ni dauvata kei na cakacaka vata.

Na itokani vakacakacaka vinaka ena mareqeti ira na cakacaka vata, ena sega ni via sakitaki koya ga. Na ivakarau qori e vulica o Jisu vei Tamana. E ganiti Jiova duadua ga me vakatokai me Dauveibuli, ia e tukuna na itavi e qarava o Luvena ni nona itokani vakacakacaka. E laurai qori ena ka e tukuna na Kalou: “Daru cakava na tamata me ucui kedaru.” (Vkte. 1:26) Kena irairai ni marautaka sara ga o Jisu na nona yalomalumalumu o Jiova.—Same 18:35.

E vakaraitaka na yalomalumalumu o Jisu ni bula e vuravura. Ni vakacaucautaki ena ka e rawata e vakacaucautaka ga na Kalou. (Mari. 10:17, 18; Joni 7:15, 16) E dau saga o Jisu me vinaka nona veimaliwai kei ratou nona tisaipeli, e okati ratou me ratou nona itokani, sega ni bobula. (Joni 15:15) E savata mada ga na yavadratou me vakavulici ratou ena yalomalumalumu. (Joni 13:5, 12-14) Bibi tale ga meda mareqeti ira eda cakacaka  vata, eda vakaliuca na veika me baleti ira, sega ni veika me baleti keda. E levu na ka e rawati nida “veirokorokovi” da qai sega ni leqataka o cei e vakacaucautaki.—Roma 12:10.

O koya e yalomalumalumu e kila ni “vakavatukana na sasaga ni levu na daunivakasala.” (Vkai. 15:22) Ena rairai levu na ka eda kila se tiko noda taledi, ia meda nanuma tiko ni sega ni dua e kila na ka kece. O Jisu mada ga e tukuna ni tiko eso na ka e sega ni kila. (Maciu 24:36) E via kila tale ga na ka ratou nanuma na nona tisaipeli eratou sega ni uasivi. (Maciu 16:13-16) Sa rauta mera taleitaka na nona itokani vakacakacaka na veimaliwai kei koya! Koya gona nida yalomalumalumu, eda nanuma tiko ni vakaiyalayala na ka eda kila da qai rogoca nodra vakasama eso tale. Nida cakava qori eda uqeta na duavata qai rawa kina ni “vakavatukana na sasaga.”

E bibi sara vei ira na qase ni ivavakoso mera vakatotomuria na yalomalumalumu i Jisu nira cakacaka vata. Mera nanuma tiko ni rawa ni uqeta e dua na qase na yalo tabu ena ilawalawa qase. Ena gauna era bose kina, mera uqeta mera vakamacala eso tale, e rawa kina nira vakatulewataka na ka e yaga ena ivavakoso taucoko.

Na itokani vakacakacaka vinaka e yalorawarawa ni veimaliwai kei ira nona itokani era cakacaka vata. E sega ni yalodredre. E raica o Jisu e levu na ituvaki e yalorawarawa kina o Tamana. Me kena ivakaraitaki, e talai koya mai o Jiova me vakabula na kawatamata mai na itotogi mate.—Joni 3:16.

E yalorawarawa o Jisu ena gauna veiganiti. Nanuma ni a talai mai me vukei ira na Isireli, ia e vukea e dua na marama ni Finaisi. (Maciu 15:22-28) E yalorawarawa tale ga ena ka e namaka vei ratou na nona tisaipeli. Ni cakitaki koya oti e matanalevu na nona itokani voleka o Pita, e tu vakarau o Jisu me vosoti koya. E muri e lesi Pita ena so na itavi bibi. (Luke 22:32; Joni 21:17; Caka. 2:14; 8:14-17; 10:44, 45) E matata mai na nona ivakaraitaki o Jisu ni bibi ‘me kilai na noda yalorawarawa vei ira na tamata kece ga.’—Fpai. 4:5.

Ena uqeti keda tale ga na yalorawarawa meda dau veisau me rawa nida cakacaka  vata kei na so tale. E rawarawa nona veimaliwai o Jisu kei na so tale, era mani vuvutaki koya na kena meca era tukuna ni nodra “itokani na daukumuni ivakacavacava kei ira na ivalavala ca” era taleitaka na nona itukutuku. (Maciu 11:19) Vakacava eda rawa ni vakataki Jisu meda cakacaka kei na so tale? Dua na tacida o Louis, e veiqaravi tu vakaivakatawa ni tabacakacaka, e veiqaravi tale ga e Peceli, e cakacaka kei na levu e duidui nodra isususu, e kaya: “Niu cakacaka kei ira e levu, e vaka ga niu tara tiko e dua na bai ena vatu e duidui na kedra levu. Ni duidui na vanua e biu kina eso na vatu, ena sega ni sukusukura na bai. Au cakava tale ga eso na veisau meu duavata tiko ga kina kei ira me rawa ni qaravi vinaka na itavi.” E totoka dina na ivakarau ni nona rai!

Na gauna cava eda rawa ni yalorawarawa kina ena noda ivavakoso? Eda rawa ni cakava qori nida cakacaka ena noda iwasewase lalai. Eda rawa ni cakacaka kei ira na dautukutuku e duidui na nodra itavi ena vuvale se duidui nodra yabaki ni bula. Vakacava eda rawa ni veisau meda muria na iwalewale ni vunau era taleitaka?

Na itokani vakacakacaka vinaka e dau “yalosolisoli.” (1 Tim. 6:18) Ni cakacaka tiko o Jisu kei Tamana, e dikeva o Jisu ni sega ni dau vunitaka na ka o Jiova. Ni “vakarautaka” o Jiova na lomalagi, e “tiko e kea” o Jisu qai vuli vua. (Vkai. 8:27) E muri e marau o Jisu me wasea vei ratou nona tisaipeli ‘na ka kece e rogoca’ vei Tamana. (Joni 15:15) Nida vuli mai na ivakaraitaki qori, e bibi meda wasea tale ga na ka eda kila vei ira noda itokani vakacakacaka. Io, na itokani vakacakacaka vinaka ena sega ni burogotaka na itukutuku e bibi se yaga me rawa ni lewa tiko ga na ka. Ena marau me wasea na veika vinaka e vulica.

Eda rawa tale ga ni vakacaucautaki ira noda itokani vakacakacaka. Eda dau marau ni raica e dua na noda sasaga qai vakacaucautaki keda. O Jisu e dau tukuna na ka vinaka e raica vei ira na nona itokani vakacakacaka. (Vakatauvatana Maciu 25:19-23; Luke 10:17-20.) E tukuna mada ga vei ratou ni na ‘levu sara na cakacaka’ ratou cakava. (Joni 14:12) Ena bogi ni bera ni mate, e vakacaucautaki ratou nona yapositolo yalodina, e kaya: “O kemudou ga dou sa dau tiko vata kei au niu sotava na veika dredre.” (Luke 22:28) Sa na bau uqeti ratou sara ga na vosa ya me ratou cakava e levu na ka! Ke tiko na gauna meda dau vakacaucautaki ira kina na noda itokani vakacakacaka, era na marau ra qai cakava e levu tale na ka.

E kaya e dua na tacida o Kayode: “Na itokani vakacakacaka vinaka e sega ni tukuni me uasivi, ia e marautaki na cakacaka kei koya, e rawarawa tale ga.” Vakacava o dua na itokani vakacakacaka vinaka? Vakacava mo taroga na nodra rai na tacimu lotu vaKarisito ena ka era nanuma baleti iko. Kevaka ra marau na cakacaka kei iko me vaka ga nodratou marau na tisaipeli nei Jisu na cakacaka kei koya, o rawa ni tukuna na ka e kaya na yapositolo o Paula: “Keitou nomuni itokani vakacakacaka ga moni marau kina.”—2 Kor. 1:24.