Sa Jézi aprann lèwvwè i té an syèl-la édé-y ni dé bèl ti kalité. Grasa sé kalité-lasa, i té ka rivé kolaboré byen èvè lézòt lèwvwè i té asi latè. Ka ègzanp a-y ka aprann-nou ? Si nou ka pran tan étidyé ègzanp a-y, nou ké touvé dé bèl ti prensip. Nou ké vwè 3 adan yo ki ké édé-nou kolaboré byen èvè lézòt. É grasa sé prensip-lasa, nou ké pli soudé èvè frè é sè an nou.

On moun ki ka kolaboré byen èvè lézòt ni imilité. Pou-y, sé moun-la ki ka travay èvè-y la ni onlo valè é i pa’a chèché a fè sé moun-lasa pòté-y anlè. Jéova ni onlo imilité, é Jézi pran ègzanp asi-y. Sé vré, sé Jéova ki kréyé tout biten, men i té vlé kè toutmoun sav kè Gason a-y travay èvè-y é kè i fè on bèl travay toubònman. Nou ka vwè sa adan sa Bondyé di : « An-nou fè lòm pòtré an nou » (Jén. 1:26). Lè Jéova di sé pawòl-lasa, Jézi vwè kè Jéova té ni imilité toubònman (Sòm 18:35).

Lèwvwè Jézi té asi latè, i té ka aji èvè imilité osi. Pa ègzanp, lè sé moun-la té ka pòté-y anlè pou tousa i té ka fè, i toujou té ka di kè sé grasa Pap’a-y si i té ka rivé fè tousa (Mawk 10:17, 18 ; Jan 7:15, 16). Jézi té ka fè ansòt pou i toujou antann-li byen èvè disip a-y. Pou-y, a pa té èsklav a-y, men sé té zanmi a-y (Jan 15:15). On jou, i jous lavé pyé a yo pou montré-yo ka sa  vlé di on moun ki ni imilité (Jan 13:5, 12-14). Nou osi, sé konsa pou nou aji. Olyé nou mèt entéré an nou douvan, fò-nou ba sé frè é sè-la ki ka travay èvè nou la onlo valè. Siwvwè nou ka ba lézòt onlo valè, nou ké rivé fè plis biten ki si nou ka chèché a fè lézòt pòté-nou anlè (Wom. 12:10).

On moun ki ni imilité ka rèkonnèt kè « tout biten ka maché byen lè ni onlo moun pou bay konsèy » (Pwov. 15:22). Menmsi nou ni onlo èkspéryans, oben menmsi nou ni onlo kapasité, fò-nou toujou sonjé kè pa ni ponmoun asi latè ki konnèt toutbiten. Jézi limenm rèkonnèt kè i pa té konnèt toutbiten (Mat. 24:36). Anplisdisa, menmsi disip a-y té enpawfè, Jézi toujou té ka chèché a sav sa disip a-y té ka pansé (Mat. 16:13-16). Nou ka tou konprann jan sé moun-la ki té ka travay èvè-y la té ka santi-yo alèz èvè-y. Menmjan-la, si nou ni imilité é si nou ka rèkonnèt limit an nou, nou ké toujou chèché a sav ka lézòt ka pansé, nou ké fè ansòt pou nou antann-nou byen èvè yo, é tousa nou ka fè ké maché, pas nou ké ni onlo moun pou ban-nou konsèy.

Sa enpòwtan toubònman kè sé ansyen-la imité Jézi adan domenn-lasa. Fò-yo toujou sonjé kè lèspri sen pé pousé yonn adan yo di on biten ki ké édé kolèj a sé ansyen-la pran bon désizyon-la. Sé pousa, si adan réinyon a yo, yo ka fè ansòt pou toutmoun santi-yo alèz, chak ansyen ké di sa i ka pansé, é sa ké menné bon biten ba lasanblé-la.

On moun ki ka kolaboré byen èvè lézòt ka montré-y rézonab lè i ka travay èvè yo. I ka chèché a konprann-yo é a konprann sitiyasyon a yo, é i ka tchenn kont dè sa. Sèten Jézi ni lokazyon vwè kè Pap’a-y té rézonab. É i ni lokazyon vwè sa a plizyè rèpriz. Pa ègzanp, toutmoun asi latè mérité lanmò, paskè yo enpawfè, men Jéova voyé Gason a-y asi latè pou sové-yo (Jan 3:16).

Lè sa té nésésè oben lè sa té posib, Jézi té paré a fè sa lézòt té ka pwopozé-y fè, olyé i té fè sa lidé a-y té ka di-y. Pa ègzanp, i aksèpté édé on madanm Fénisyèn, alòskè Pap’a-y té voyé-y pou édé moun-Izrayèl (Mat. 15:22-28). I té rézonab osi pas i pa té ka mandé disip a-y fè dé biten kè yo pa té’é pé fè. Lèwvwè Pyè, yonn adan méyè zanmi a-y, trayi-y douvan toutmoun, Jézi padonné-y volontyé, é plita, i ba Pyè rèsponsabilité ki té enpòwtan toubònman (Lik 22:32 ; Jan 21:17 ; Akt 2:14 ; 8:14-17 ; 10:44, 45). Pou ‘toutmoun sav kè nou sé dé moun ki rézonab’, fò-nou paré a fè sa lézòt ka pwopozé-nou, olyé  nou fè sa lidé an nou ka di-nou fè. Sé sa ègzanp a Jézi ka aprann-nou (Filip. 4:5).

Lèwvwè nou ka montré-nou rézonab, sa vlé di kè kèlkèswa moun-la nou ka travay èvè-y la, nou ka fè ansòt pou nou anpé èvè-y. É sé konsa Jézi té ka aji. Sé pousa, konm lènmi a-y té jalou-y, yo ni lokazyon di kè Jézi « zanmi èvè moun ki ka ranmasé lajan a enpo é èvè moun ki ka fè péché », pas yo té ka kouté mésaj a-y (Mat. 11:19). É nou, ès nou ka rivé travay èvè tout kalité moun, kon Jézi té ka fè ? Louis, sé on frè ki ni lokazyon travay èvè diféran kalité moun lèwvwè i té rèsponsab a siwkonskripsyon, oben lèwvwè i té ka travay an Bétèl-la. Mi sa i ka di : « Lè ou ka travay èvè diféran kalité moun, sé konsi ou ka konstwi on masonn èvè diféran kalité wòch. Konm sé wòch-la pa ni menm gwosè-la, sa ka mandé kè ou fè onlo éfò pou masonn-la rété dwèt. An éséyé fè on travay asi mwen, mwen pé sa anpé èvè lézòt. Konsa, travay-la ka kontinyé vansé. » Mi on bèl mantalité mi !

A ki moman nou pé montré-nou rézonab èvè frè é sè an nou adan lasanblé-la ? Nou pé fè sa lè nou ka préché èvè gwoup a prédikasyon an nou pa ègzanp. Adan gwoup an nou, ni sèwten pwoklamatè ki pa ni menm sitiyasyon oben menm laj ki nou. Si nou ka préché dè kaz-an-kaz èvè yo, nou pé’é maché two vit oben dè tanzantan nou ké fè dé ti pòz. Siwvwè yo préféré préché pa téléfòn oben kè yo préféré voyé lèt ba moun, nou pé òwganizé-nou pou fè sa èvè yo. Konsa, yo ké ni plis jwa lèwvwè yo ké ka préché.

On moun ki ka kolaboré byen èvè lézòt, sé on moun men a-y toujou gran wouvè (1 Tim. 6:18). Sé sa Jézi konstaté lèwvwè i té ka travay èvè Pap’a-y. Pa ni pon biten kè Pap’a-y pa montré-y é i rann-li kont dè sa. Lè Jéova fè syèl-la, Jézi té la é i aprann onlo biten (Pwov. 8:27). Aprésa, lè Jézi vin asi latè, i té kontan fè disip a-y konnèt sa Pap’a-y di-y (Jan 15:15). Nou osi, nou pé fè kon Jéova é Jézi siwvwè nou ka pawtajé sa nou konnèt èvè lézòt é si nou ka pawtajé èkspéryans an nou èvè yo osi. On moun ki ka kolaboré byen èvè lézòt pa ka kaché-yo sèwten enfòwmasyon pou yo toujou ka mandé-y tanprisouplé a-y. Okontrè, i ké kontan pawtajé èvè yo tousa i aprann.

Ondòt biten nou pé fè, sé ankourajé sé frè é sè-la ki ka travay èvè nou la. Lè on moun ka rèmawké éfò nou ka fè é kè i ka di-nou on bèl mèsi pou sa, ès sa pa’a fè-nou dibyen ? Jézi pran on tan pou di disip a-y jan i té ka aprésyé-yo (gadé Matyé 25:19-23 ; Lik 10:17-20). I jous di-yo kè yo té’é fè on pli gwo travay ankò ki sila i fè la (Jan 14:12). Avan jou-la i mò la, lavèy oswa, i félisité tout sé apòt-la ki té rété fidèl la é i di-yo konsa : « Sé zòt ki toujou rété èvè mwen adan éprèv an mwen » (Lik 22:28). Lè sé apòt-la tann sa, ou ka imajiné jan sa dwèt touché tchè a yo é jan sa ba-yo balan ! Nou osi, si nou ka pran tan félisité sé frè é sè-la ki ka travay èvè nou la, sèten yo ké pli kontan é sèten yo ké travay èvè plis balan.

Mi sa on frè, non a-y sé Kayode ni lokazyon di : « On moun ki ka kolaboré byen èvè lézòt, a pa on moun ki pawfè men sé on moun toutmoun enmé travay èvè-y pas i ka mèt on bon anbyans alantou a-y é sa ka rann travay-la pi fasil pou toutmoun. » Ès ou sé on moun konsa ? Ès ou té’é pé mandé sé frè é sè-la ki ka travay èvè-w la, ka yo ka pansé dè-w adan domenn-lasa ? Si yo kontan travay èvè-w menmjan sé apòt-la té kontan travay èvè Jézi, ou ké pé di menm biten ki lapòt Pòl : « Nou ka travay ansanm èvè zòt pou zò ni jwa an tchè a zòt » (2 Kor. 1:24).