Prithumer ieunchea poilim dusream sangata bore toren koxem kam korchem, hea vixim Jezu sorgar zaite bore gunn xiklo. Ani prithumer ailea uprant dusream sangata kam kortana, tannem he gunn dakhoile dekhun to tanchea sangata ekdom bore toren kam korunk xoklo. Tor Jezuchea udharonnantlean amkam kitem xikonk melltta? Jezu jea toren dusream sangata vaglo tem ami polloitat tednam amkam tin totvam xikonk mellttat. Ani him totvam ami apnnailear, dusream sangata mellon bore bhaxen kam korunk amkam modot zatoli.

Khalto zaunchea vixim Jezu, aplea Bapai Jehova thaun xikonk pavlo. Jehova ekloch Rochnnar tem khorem, tori astana rochnne vellar Jezun kelʼlea mhotvachea kamam vixim dusreamnim zannam zalʼlem Jehovak zai aslem. Tea pasot, Jehovan mhunnttlem: “Amchea rupacho . . . monʼxak rochum-ia.” (Ut. 1:26) Jehovan hanga hanv nhoi, punn ami rochum-ia oxem mhunnttlem. Tor Jehovachea hea utrantlean aplo Bapui kitlo khalto tem Jezuk kollon ailem. Tor ek boro sangati sodanch khalto ravta, to dusreanchem dhean fokot apnnacheruch voddina ani dusreank apnna poros vorto mhunn lekhta.—St. 18:35.

Hea prithumer ailo tednam Jezu pasun Jehova bhaxen zaitea vattamnim khalto aslo. Lokamnim taka xabaski dili tednam tannem ti mhoima aplea Bapaik dili. (Marku 10:17, 18; Juanv 7:15, 16) Toxench, tachea xisam sangata xanti samballunk tannem tankam aple chakor nhoi punn ixtt mhunn lekhle. (Juanv 15:15) Ani khaltikaie vixim xikounk ek pavtt tannem tanche paim pasun dhule. (Juanv 13:5, 12-14) Tor ami pasun dusrim amchea poros  vortim mhunn pollounk zai ani soglem dhean amcheruch voddun haddchem nhoi. Oxem korun ami ‘dusreank man ditat’ tednam ami zaitem borem korunk pavtolim.—Rom. 12:10.

“Zaiteacheo budhi ghetloleo ievzonneo folladik zatat” mhunn ek khalto munis vollkhon gheta. (Mho. 15:22) Amkam zaito onubhov asonk puro vo ami khub korunk xoktat astolim. Punn khoinchea-i munxak soglench khobor asona mhunn ami ugddas dovrunk zai. Apleak soglem khobor na mhunn Jezun pasun manun ghetlem. (Mt. 24:36) Ani hea pasot tannem aplea xisanchim chitnam zannam zaunk proitn kelo. (Mt. 16:13-16) Hea karonnak lagon tachea xisank tachea sangata ravonk khub borem distalem! Teach bhaxen, amkam sogli mahiti na mhunn ami khaltikaien vollkhon ghetat tednam ami xanti samballunk pavtat ani amcheo “ievzonneo folladik zatat.”

Dusream sangata kam kortana khas korun vhoddilamnim Jezu bhaxen khalti ravonk zai. Vhoddilanchea mittingent te sangata mellon nirnnoi ghetat tednam, Devachi povitr xokti khoinchea-i eka vhoddilak ek boro vichar sangonk modot korunk xokta mhunn tannim ugddas dovrunk zai. Tor hea mittingent dor eka vhoddilan ukteponnim ulounk zata mhunn te visronant. Oxem kelolean sobhek faideak poddttat tosle bore nirnnoi te gheunk pavtat.

Ek munis somjikaiecho asa zalear to dusream sangata kam kortana tanchem aikonk toiar asta. Jehovan pasun somjikai dakhoilʼli tem Jezun zaite pavtti polloilʼlem astolem. Udharonnak, munxakullak moronn favo aslem. Tori punn, Jehovan tankam mornnantlean salvar korunk Jezuk hea prithumer dhaddlo.—Juanv 3:16.

Tor Jezun pasun taka sondhi mellʼlli tednam dusreank somjikai dakhoili. Jehovan Jezuk prithumer Isrealachea ghorannea pasot dhaddlolo. Tori astana eka vellar tannem eke Kanaanit bailechi modot kelʼli mhunn tumkam ugddas asa astolo. (Mt. 15:22-28) Jezu aplea xisam sangata pasun somjikaien vaglo dekhun te kednanch chuk korche nant oxem tannem chintunk na. Karonn ek pavtt tacho lagxilʼlo ixtt Pedrun, sogleam hujir apunn Jezuk vollkhona oxem mhunnttlem. Tednam Jezun Pedruk bhogxilo ani uprant taka vhoddleo zobabdareo pasun dileo. (Lukas 22:32; Juanv 21:17; Itihas 2:14; 8:14-17; 10:44, 45) Tor Jezu bhaxen ami pasun amkam bodlunk sodanch toiar asonk zai ani dusrim kednanch chukchinant oxem chintchem nhoi. Ami oxem kelear, amchi ‘somjikai’ sogleank dixtti poddttoli.—Tit. 3:2, Povitr Pustok – Novo Korar.

Ami somjikaien vagtat tednam, ami bodlav korunk toiar astolim ani veg-vegllea lokam sangata mellon  xantin kam korunk pavtolim. Ani oxench Jezun kelem. Aplea bhonvtonnim aslolea lokam sangata Jezu kitle bore toren vaglo hea pasot te tache aikotale. Ani hem polloun tachea dusmanak tachi nattkai zali ani tannim taka “donddvosuldarancho ani patkiancho ixtt” oso mhunnttlo. (Mt. 11:19) Tor Jezu bhaxen ami dusream sangata mellon kam kortat kai? Hea vixim amkam bhav Louis-achem udharonn asa. To sorkittachi dekhrekh korpi aslo ani magir Bethel-ant seva kortalo tednam tannem veg-vegllea bhav-bhoinnam sangata kam kelem. To mhunntta: “Opurnn lokam sangata kam korop mhunnttlear ek durig bandop, zache fator ek-sarke asonant ani hea pasot tem durig bandunk amkam zaito vavr korcho poddtta. Tori punn te fator sarke bosoile zalear ami ek nitt durig bandunk xoktat. Teach bhaxen hanvem mhaka sarko bosoilo, mhunnche hanvem bodlav kele. Hea toren hanv dusream sangata xantin kam korunk pavlo.” Ho kitlo boro sobhav zaun asa nhoi!

Ami bhav-bhoinnam sangata somjikaien koxem vagonk zata? Porgottnnechea grupa sangata astana hem korunk amkam ek bori sondhi melltta. Bhav-bhoinnank veg-veglli zobabdari asa ani tanchi pirai veg-veglli asa. Hea pasot ami tanchea sangata porgottnni kortana, ami tanchi poristhiti somzon gheunk zai. Ghoddie amkam amche porgottnnent thoddo bodol korunk poddot. Zoxem, amkam sovkas cholonk poddot vo thoddea vella uprant visov gheunk poddot vo tankam avoddtta tea torechi porgottnni korunk poddot. Oxem ami kelem zalear porgottnnent tanchi khuxalkai anik vaddttoli.

Dusream sangata kam kortat tednam ‘udar kallzan herank vanttun diunk‘ ami sodanch toiar asonk zai. (1 Tim. 6:18) Jezu Jehova sangata sorgar aslo tednam Jehova dusream thaun kainch lipoina tem tannem polloilem. Jehovan “ontrall thirailem” tednam Jezu ‘thoim aslo‘ ani Jehova thaun to khub xikonk pavlo. (Mho. 8:27) Uprant, aplea “Bapa koddchem [tannem] aikolam titlem-i” aplea xisank sanglem. (Juanv 15:15) Teach bhaxen, Jehovachi dekh gheun ami jem kitem xikleant tem ami bhav-bhoinnank sangonk zai. Punn aiz choddxe lok oxem korinant ani dusreancher odhikar cholounk tanche koddlean gorjechi mahiti lipoitat. Punn dusream sangata ami bore toren kam kortolim zalear, ami xikleant tem dusreank khuxalkaien sangtolim.

Toxench, amchea sangata kam kortat tankam ami xabaski ditolim. Ami vavr kortat to polloun dusrim amkam xabaski ditat tednam amkam kitlem borem dista nhoi? Jezun pasun aplea xisanchim borim kamam polloun tankam xabaski diunk vell kaddlo. (Matev 25:19-23; Lukas 10:17-20 sor korat.) Tannem tankam oxem-i sanglem ki te “tache poros xrextt kortutvam kortole.” (Juanv 14:12) Ani to morchea poilim, tea ratik tannem aplea visvaxi apostlank xabaski diun oxem mhunnttlem: “Mhojea upodreamnim visvaxiponnim Mhojea sangata ravleat te tumich.” (Lukas 22:28) Tor Jezuchim him utram aikon tankam anik vavrunk kitli urba mellʼlli astoli! Teach bhaxen, amchea sangata kam kortat tankam ami xabaski diunchi goroz asa. Oxem ami kelem zalear tim khuxal zatolim ani khub vavr korunk pavtolim.

Kayode nanvacho ek bhav oxem mhunntta, “Dusream sangata bore toren kam korunk ami soglea kamamnim poripurnn aspachi goroz na. Punn kam kortana ami dusreank khuxal kortat zalear tem kam korunk tankam sompem zatolem.” Tumi pasun hea toren kam kortat kai? Hea vixim zannam zaunk, tumchea bhav-bhoinnank tumchea vixim kitem dista tem tumi tanchea lagim vicharunk zata. Jezuchea xisank tachea sangata kam korun khuxalkai mellʼlli. Toxench tumchim bhav-bhoinnam tumchea sangata kam korunk khuxal asat zalear, Paulun mhunnttlim tinch utram tumi-i mhunnonk zatat: “Tumcho sontos vaddounchea monan tumche borabor vavrunk amchi khuxi.”—2 Kor. 1:24.