Nütüjaa aaʼu Jesuu tü nukuwaʼipainjatkat sünain aʼyanaajirawaa namaa na waneinnua sünainjee tü nütüjakat chaa iipünaa. Nüntapa yaa mmapaʼamüin, anasü maʼin nukuwaʼipa napüleerua na aʼyanaajiraakana nümaa. Waashajaa süchiki nukuwaʼipa Jesuu. Wekirajaajeerü anain apünüinsü pütchi oʼunirajatka wakuwaʼipa süpüla paaʼinwajiraain waya sünain aʼyanaajirawaa namaa na waneinnua.

Chi wayuu atüjakai aʼyanaajirawaa namaa na waneinnua nnojotsü yaletüin naaʼin jee kojutushii naya nümüin. Niʼrüin Jesuu nnojoluin yaletüin naaʼin chi Nüshikai. Mayaainjeʼe niain Maleiwa nümüiwaʼa kojutuinjachikai atumawaa sünainjee nukumalain kasakat süpüshuaʼa, nüküjapejeʼe niʼyanaajiraain Jesuu nümaa. Watüjaa aaʼu tia sünainjee tü nümakat Maleiwa, tü makat: «Anakaja jooluʼu wakumajüle wayuu. Meena naya aka waaʼin» (Gén. 1:26). Niyaawata aaʼu Jesuu sükajee tü nümakat Jeʼwaa nnojoluin yaletüin naaʼin chi Nüshikai (Sal. 18:35).

Nnojotsü yaletüin naaʼin Jesuu yaaiwaʼaya nia mmapaʼa. Naküjapa na wayuukana nümüin anain maʼin tü naaʼinrakat, nüküjain nuuntuin tia süka nükaalinjain nia Jeʼwaa (Mar. 10:17, 18; Juan 7:15, 16). Otta müsia nüchajaain maʼin sukuwaʼipa süpüla anajiraain nia namaa na nikirajüinkana. «Tatünajut», müshi nia namüin, nnojoishii müin aka saaʼin wanee achepchiee nümüin (Juan 15:15). Nuʼlojooin Jesuu nooʼui na nikirajüinkana  süpüla natüjaain saaʼu nnojoluinjatüin yaletüin naaʼin (Juan 13:5, 12-14). Maʼaka naaʼin Jesuu kojutuinjana maʼin wamüin na aʼyanaajiraakana wamaa jee nnojoluinjatü jülüjain waaʼin wakuwaʼipa neʼe wamüiwaʼa. Wainma kasa anasü weʼraka kojutujiraale waya jee nnojorüle jülüjain waaʼin jaralin chi eʼnnaajünakai maʼin waʼakajee (Roma 12:10).

Chi wayuu nnojoikai yaletüin naaʼin niyaawata aaʼu aneerüin sukuwaʼipa wanee kasa süsakinnüle süchiirua (Prov. 15:22). Jaʼitairü wainmain kasa nütüjaka apüleerua wanee wayuu nnojotsü nütüjaain aaʼu kasa süpüshuaʼa. Jamüshijaʼa Jesuu nüküjain eein kasa nnojotka nütüjaain aaʼu (Mat. 24:36). Kojutupuʼusü nümüin tü jülüjakat naaʼin na nikirajüinkana mayaainjeʼe nnojoluin lotuin maʼin nakuwaʼipa (Mat. 16:13-16). Müsüjeseʼe nnojoluin ponuin waaʼin anain naaʼin na aʼyanaajiraakana nümaa. Nnojorüle yaletüin waaʼin, wayaawatüle saaʼu eein tü isakat wachiki jee waapajüle nanüiki na waneinnua, paaʼinweena waya jee aneerü sukuwaʼipa tü waaʼinrakat.

Anasü maʼin nashatüle nukuwaʼipa Jesuu na laülaashiikana sünain nnojoluinjatüin yaletüin naaʼin naʼyanaajiraapa. Soteesü naaʼin na laülaashiikana eein süpüla naapüin Maleiwa chi naaʼinkai nümüin wane laülaashi süpüla anainjatüin süneekia natuma wanee kasa. Noutkajaapa, anasü nachajaale sukuwaʼipa süpüla jülüjain naaʼin tü namakat na wane laülaashiikana. Naaʼinrüle tia aneerü sukuwaʼipa tü kasa naneekakat napüleerua na wawalayuukana.

Anasü maʼin waʼyanaajiraale nümaa wanee wayuu nnojoikai macheʼein süchiirua tü nümakat otta nnojoikai mojushiin amüin nuʼwanajaain sukuwaʼipa niʼyataain. Niʼrüin Jesuu kojuyatua müin nukuwaʼipa chi Nüshikai. Jamüshijaʼa Jeʼwaa nuluwataain nia süpüla outajachin saaʼu saainjala wayuu mayaainjeʼe nnojoluin lotuin maʼin nakuwaʼipa na wayuukana (Juan 3:16, TNM).

Aluwataanüshi Jesuu süpüla nükaalinjain na israeliitakana, anapejeʼe sotule waaʼin nükaalinjain wanee jiet nnojotka israeliitain. Wayaawata aaʼu sünainjee tia, nnojoluin macheʼein Jesuu süchiirua tü nümakat (Mat. 15:22-28). Otta niyaawata aaʼu eein tü kasa isakat nachiki na nikirajüinkana. Jamüshijaʼa wanaa sümaa nuunjulajüin Pedro süchiki niʼraajüin Jesuu suʼupala wainma wayuu, motusü naaʼin Jesuu tia naainjalakat nümüin. Mapa, naapüin sooʼomüin aʼyatawaa nümüin (Luc. 22:32; Juan 21:17; Aluw. 2:14; 8:14-17; 10:44, 45). Sükajee tü nukuwaʼipakat Jesuu  wayaawata aaʼu nnojoluinjanain macheʼein waya süchiirua tü wamakat süpüla sütüjaanüin aaʼu wayuuin kamaneeshii waya (Filip. 4:5).

Wayaawatüle saaʼu naatain sukuwaʼipa wayuu nnojoleerü mojushiin wamüin waʼyanaajiraapa sümaa wayuu naataka akuwaʼipa woulia. Kamaneeshi Jesuu sümüin wayuu süpüshuaʼa. Sutuma tia, naʼürülaain nia na nüʼünüükana jee naküjain nüchiki sütünajutüin nia tü akotchojütkalüirua nneerü otta tü kaainjaratkalüirua (Mat. 11:19). ¿Eesüche süpüla washatüin nukuwaʼipa Jesuu waʼyanaajiraapa sümaa wayuu naataka akuwaʼipa woulia sümaa anain waaʼin namaa? Jülüjaa waaʼin tü naaʼinrakat Louis, wanee wawala alapalaapuʼukai naaʼu na wawalayuukana otta aʼyataapuʼukai suluʼu Weteet. Aʼyataapuʼushi nia namaa wawalayuu naatakana akuwaʼipa nuulia. Anuu nünüiki: «Waʼyanaajiraapa namaa na wawalayuukana müsü aka saaʼin wakumajüle wanee süsepü wanee miichi süka ipa eekai joʼuuchein, eekai muloin, eekai koʼoyooin otta waneirua ipa. Mayaainjeʼe naatawalin shia, anale sukuwaʼipa shiʼitaaya watuma eesia süpüla lotuin süsepü tü miichikat. Tachajaain maʼin sukuwaʼipa süpüla tanoutuin wanee kasa sünain takuwaʼipa süpüla paaʼinwaain taya sünain aʼyanaajirawaa namaa na wawalayuukana otta süpüla anain sukuwaʼipa waʼyataain». Anasü maʼin tü naaʼinrakat chia wawalakai.

¿Kasa waaʼinrajatka süpüla anain wakuwaʼipa sünain aʼyanaajirawaa namaa na wawalayuukana? Jülüjataa waaʼin tüü: naʼakajee na wawalayuu waküjakana amaa pütchi eeshiijaʼa eere tepichi, eekai nataralüin, eekai kachooin, eekai maʼwayuusein. Waküjale pütchi namaa, anasü waainjale kasa talateetka atuma naaʼin sünain aküjaa pütchi maʼaka saaʼin wojuʼitüin namaa soʼu tü oora nachekakalü oʼu otta waküja pütchi namaa süka tü kamalainkat namüin maʼaka saaʼin süka tü kareetachonkat otta suluʼupünaa teleepono.

Anasü waaʼin waʼyanaajiraale nümaa wanee wayuu eekai nüsülajülin (1 Tim. 6:18). Niʼyanaajiraapa Jesuu nümaa chi Nüshikai niyaawata aaʼu nnojoluin nuunjulajüin süchiki kasa nuulia. Wanaa sümaa nukumajüin Jeʼwaa tü sirumatuʼukat yalajachi Jesuu nümaa jee atüjashi nia nünainjee (Prov. 8:27). Kakalia mapa nüküjain Jesuu namüin na nikirajüinkana tü nütüjakat nünainjee chi Nüshikai (Juan 15:15). Washatüin nukuwaʼipa Jeʼwaa wekirajapa na wawalayuukana sünain tü kasa watüjakalü apüleerua. Nnojotsü anain wounjulajüle süchiki kasa noulia na waneinnua süpüla wayainjanain atüjain wamüiwaʼa.

Wasülajüliire watütüleʼereerü naaʼin na wawalayuukana. ¿Aashin talatüin waaʼin süküjünapa wamüin anain tü kasa waaʼinrakat? Nüküjain Jesuu namüin na nikirajüinkana tü akuwaʼipa anasü eekat nanain (anasü paashajeʼerüle Mateo 25:19-23; Luc. 10:17-20). Jee nüküjain anaʼleejeerüin maʼin tü naaʼinreetkat suulia tü naaʼinrakat niakai (Juan 14:12). Anasü nünüiki Jesuu namüin na nikirajüinkana wanee kaʼi süpülapünaa nuʼutunuin aaʼin, nüküjain namüin nnojolin nayüülajüin nia soʼunnaa tü müliaa niʼrakat (Luc. 22:28). Atütülaakajasaʼa maʼin naaʼin na nikirajüinkana sutuma tia süpüla ayatüin naaʼinrüin tü anasükat. Waküjale namüin na wawalayuukana anain maʼin tü naaʼinrakat, talateerü maʼin naaʼin jee ayateerü naaʼinrüin tü kasa anasükat.

Anuu nünüiki wanee wawala kanüliakai Kayode: «Nnojotsü choʼujaain maʼin anainjatüin süpüshuaʼa tü paaʼinrakat süpüla piʼyanaajiraain namaa na waneinnua, eepejeʼe süpüla paaʼinrüin kasa talateenaka atuma naya». ¿Jama piakai? ¿Anasü nanüiki püchiki na aʼyataajiraakana pümaa? ¿Anashii naya pümaa maʼaka naaʼin na nikirajüinkana Jesuu nümaa? Müle pukuwaʼipa mayaa, eesüjaʼa süpüla müin pünüiki maʼaka naaʼin Pablo, tü makat: «Takaaliijeena jia süpüla talatüinjatüin jaaʼin» (2 Cor. 1:24).