Jesús oĩrõ guare yvágape oaprende vaʼekue heta mbaʼe ikatu hag̃uáicha ombaʼapo porã upéi ótrondi. ¿Mbaʼépa ikatu ñaaprende Jesús ehémplogui? Ñañehaʼãmbaite vaʼerãha ñambaʼapo porã ñane kompañerokuéra de traváhondi. Jahechamína mbohapy konsého ñanepytyvõtava ikatu hag̃uáicha ñaime en unida, ha jajogueraha porã hendivekuéra.

Peteĩ persóna iñumíldeva omombaʼe umi ikompañéro de traváhope ha ndoikói ojechaukase hína. Jesús oaprende vaʼekue upéva Itúagui oĩrõ guare yvágape. Jehová añoite omereséramo jepe oñehenói chupe Kreadór, haʼe oipota vaʼekue umi ótro ohecha iñimportanteha la Itaʼýra ojapo vaʼekue. Heʼi voi: “Jajapo yvypórape ñande joguaháramo” (Gén. 1:26). Jesús katuete omombaʼéne rakaʼe Jehová ohechauka haguére péicha iñumildeha (Sal. 18:35).

Jesús oĩrõ guare ko yvy ape ári ohechauka vaʼekue avei péicha iñumildeha. Ojeguerohorýrõ guare chupe, haʼe oipota vaʼekue oñemombaʼe pe omeresévape (Mar. 10:17, 18; Juan 7:15, 16). Jesús oñehaʼã vaʼekue avei ojogueraha porã hag̃ua idisipulokuérandi. Upévare haʼe heʼi voi haʼekuéra haʼeha iñamígo ha ndahaʼéi ijesklávo (Juan 15:15). Ha omboʼe hag̃ua chupekuéra iñumílde hag̃ua haʼe ombojepyhéi vaʼekue voi chupekuéra  (Juan 13:5, 12-14). Iporãta avei ñande jasegíramo Jesús ehémplo ha ñañehaʼãmbaite ñamombaʼe umi ñane kompañéro de traváhope, ha ñamotendonde chupekuéra. Ñande ndajaikói jave jajepyʼapy mávapepa oñemombaʼe vaʼerã, hetaitereive mbaʼe porã ikatu jahupyty (Rom. 12:10).

Peteĩ persóna iñumíldeva orrekonose ‘oĩhápe heta omeʼẽva konsého porã, ojehupytyha heta mbaʼe’ (Prov. 15:22). Ñande jahechakuaa vaʼerã ndaiporiha peteĩ persóna oikuaáva opa mbaʼe. Jesús jepe orrekonose vaʼekue haʼe ndoikuaaiha entéro mbaʼe (Mat. 24:36). Avei oikuaase vaʼekue mbaʼépa idisipulokuéra imperfékto opensa ha oikuaa (Mat. 16:13-16). ¡Ndareíri ningo umi idisipulokuéra oñeñandu porã vaʼekue hendive! Upéicha avei, ñande ñarrekonoséramo umi mbaʼe ndaikatúiva jajapo ha ñapermiti umi ótrope ñanepytyvõ, ikatúta jajogueraha porã oñondivepa ha jahupytýta heta mbaʼe porã.

Iñimportanteterei avei umi ansiáno osegi Jesús ehémplo ombaʼapo jave oñondive. Por ehémplo, oreko jave rreunión de ansiáno, imanduʼa vaʼerã hikuái pe espítiru sánto ikatuha oipytyvõ oimeraẽvape heʼi hag̃ua álgo ideprovéchotava ojedesidi porã hag̃ua. Péicha ombaʼapóramo hikuái oñondive, ojehupytýta heta mbaʼe porã kongregasiónpe.

Peteĩ kompañéro de traváho ikalidáva ningo noñemohatãi la haʼe heʼívapente ombaʼapo jave umi ótrondi. Jesús oaprende vaʼekue avei ko kualida Itúagui. Por ehémplo, ñande ñamereséramo jepe ñamano pekadór haguére Jehová ombou vaʼekue Itaʼýrape ñanderreskata hag̃ua upévagui (Juan 3:16).

Jesús noñemohatãi vaʼekue la haʼe heʼívape tekotevẽ jave ha opyta porã jave. Por ehémplo, ñanemanduʼamína mbaʼéichapa haʼe oipytyvõ vaʼekue peteĩ kuña Feniciaguápe oñemboúramo jepe chupe oipytyvõ hag̃ua umi israelítapente (Mat. 15:22-28). Jesús ohechauka vaʼekue avei noñemohatãiha haʼe heʼívapente pe otrata lájare idisipulokuérape. Por ehémplo Pedro onega vaʼekue chupe en púvliko, péro haʼe operdona chupe. Hiʼarive upéi onkarga vaʼekue Pédrope heta rresponsavilida tuicháva (Luc. 22:32; Juan 21:17; Hech. 2:14; 8:14-17; 10:44, 45). Jesús ehémplo ohechauka ñandéve tekotevẽha jahechauka enterove renondépe nañañemohatãiha ñande jaʼévapente (Filip. 4:5).

Ñande avei nañañemohatãiramo umi mbaʼe jaʼévapente ikatúta ñambaʼapo opaichagua persónandi. Jesús otrata porãiterei vaʼekue umi  oĩvape ijerére, upévare iñenemigokuéra iñenvidiosoitéva heʼi hese ‘ojeheʼaha umi pekadór ha umi okovrávare impuésto’ (Mat. 11:19). ¿Ikatúpa avei ñande, Jesús ojapo haguéicha, ñambaʼapo umi ótro idiferéntevandi ñandehegui? Peteĩ ermáno hérava Louis haʼe vaʼekue superintendénte de sirkuíto ha ombaʼapo Betélpe, upéicha rupi haʼe ombaʼapo vaʼekue opaichagua ermánondi. Haʼe heʼi: “Ambaʼapóvo umi ótro persóna iñimperféktovandi haʼete hína amopuʼãva peteĩ murálla orekóva diferénte tamáño ita, ha añehaʼãvémante vaʼerã idiferénte rupi umi ita. Péro pe murálla ikatu hína opyta iderécho asy. Che ningo añehaʼãmbaite ajadapta ambaʼapo hag̃ua pyʼaguapýpe umi ótrondi, ha péicha ikatu hag̃uáicha pe traváho osẽ porã”. ¡Ajépa iporãite la ojapo vaʼekue!

¿Mbaʼéicha javépa ikatu jahechauka nañañemohatãiha ñande jaʼévapente kongregasiónpe? Ñaime jave pe ñande grúpo de predikasióndi jareko la oportunida ñambaʼapo hag̃ua diferénte ermánondi. Por ehémplo ikatu hína ñambaʼapo umi ermáno orekóvandi diferénte rresponsavilida familiár ñandehegui, térã umi ndahaʼéivandi ñande avegua. Ñande ikatu jajadapta hesekuéra térã jaipuru pe método de predikasión ogustavéva chupekuéra. Ha upéva oipytyvõta ermanokuérape ovyʼave hag̃ua predikasiónpe.

Peteĩ kompañéro de traváho ikalidáva oĩ ‘okomparti hag̃uáicha ótrondi’ (1 Tim. 6:18). Jehová “ojapórõ guare pe yvága”, Jesús oĩ vaʼekue upépe ha oaprende chugui heta mbaʼe. Haʼe ohechakuaa vaʼekue hese ndahaʼeiha oñomiséva umi mbaʼe ojapóva (Prov. 8:27). Upéi Jesús voi vyʼápe okomparti idisipulokuérandi umi mbaʼe oaprende vaʼekue Itúagui (Juan 15:15). Ñande ikatu jasegi Jehová ehémplo ha ñaime dispuésto ñakomparti hag̃ua umi mbaʼe jaikuaáva ha jahasa vaʼekue. Peteĩ kompañéro de traváho ikalidáva ndoikomoʼãi hakateʼỹ la haʼe oikuaávare, ha nomombeʼúi umi ótrope umi mbaʼe oikotevẽva térã oipytyvõtava chupekuéra, ha péicha oreko hag̃ua chupekuéra ipoguýpe. Upéva rangue haʼe vyʼápe okompartíta umi mbaʼe porã oaprende vaʼekue.

Ñande ikatu avei ñamokyreʼỹ umi ñane kompañéro de traváhope. ¿Ajépa ñañeñandu porã oĩ jave ohechakuaáva umi mbaʼe jajapo vaʼekue? Jesús ojapo vaʼekue upéva ha oñemotiémpo heʼi hag̃ua idisipulokuérape umi mbaʼe porã ojapóva hikuái (ekompara Mateo 25:19-23; Luc. 10:17-20 heʼívare). Avei heʼi vaʼekue chupekuéra ojapotaha umi traváho tuichavéva voi (Juan 14:12). Ha pe pyhare haʼe omano mboyve katu oguerohory ijapostolkuérape, ha heʼi chupekuéra: “Peẽ ndapecherejái ni ahasárõ guare umi situasión ijetuʼúva” (Luc. 22:28). ¡Mbaʼeichaitépa oiméne opoko raʼe ikorasõrekuéra umi mbaʼe heʼíva chupekuéra Jesús, ha omomýi chupekuéra ikyreʼỹ hag̃ua! Upéicha avei ñande ñañemotiémporamo jaguerohory hag̃ua umi ñane kompañerokuéra de traváhope, ñamokyreʼỹta chupekuéra ha iguapovéta hikuái.

Peteĩ ermáno hérava Kayode heʼi: “Oiko hag̃ua ñandehegui peteĩ vuén kompañéro de traváho natekotevẽi ñandeperfékto. Ñañehaʼãnte vaʼerã enterove oĩva ñande jerére ovyʼa hag̃ua, ha péicha ivevyivéta chupekuéra pe traváho”. ¿Ndépa peichagua kompañéro de traváho hína? Iporãta ningo reporandúramo peteĩva umi ne kompañéro de traváhope mbaʼépa haʼe opensa nderehe. Haʼekuéra oñeñandu porãramo ombaʼapóvo nendive Jesús disipulokuéra oñeñandu porã haguéicha ombaʼapóvo hendive, ikatu ere apóstol Pablo heʼi haguéicha: “Ore rombaʼapo pende ykére roipotágui peẽ pevyʼa” (2 Cor. 1:24).