Be A Yin Azọ́nwatọ Hatọ Dagbe de Ya?

MÌ HÒ (video kavi hoyidokanji lọ)

“YẸN tin to apá etọn taidi azọ́nwatọgan de. . . . N’sọ nọ jaya to nukọn etọn to whepoponu.” (Howh. 8:30) Lehe Biblu basi zẹẹmẹ owhe madosọha he Visunnu Jiwheyẹwhe tọn yizan nado wazọ́n dopọ hẹ Otọ́ etọn whẹpo do wá aigba ji lẹ tọn do niyẹn. Doayi e go dọ wefọ ehe sọ dọ numọtolanmẹ Jesu tọn na mí taidi azọ́nwatọ hatọ Jiwheyẹwhe tọn; e “nọ jaya” to nukọn Etọn.

Jesu plọn jẹhẹnu delẹ he zọ́n bọ to godo mẹ, e wá lẹzun azọ́nwatọ hatọ apajlẹnọ de na mẹhe wazọ́n dopọ hẹ ẹ to aigba ji lẹ. Nawẹ mí gán mọaleyi sọn apajlẹ Jesu tọn mẹ gbọn? Eyin mí gbadopọnna apajlẹ etọn po sọwhiwhe po, mí gán doayi nunọwhinnusẹ́n atọ̀n delẹ go he gán gọalọna mí nado lẹzun azọ́nwatọ hatọ dagbe lẹ. Nunọwhinnusẹ́n ehelẹ nasọ gọalọna mí nado hẹn gbigbọ pọninọ po gbekọndopọ tọn mítọn po lodo dogọ.

Nọ hẹn apajlẹ Jehovah po Jesu po tọn do ayiha mẹ bo nọ wleawufo nado má numimọ po nuhe a yọnẹn lẹ po hẹ azọ́nwatọ hatọ towe lẹ

NUNỌWHINNUSẸ́N 1: ‘MÌ NỌ DO GBÉGBÒ HIA ODE AWETỌ’

Azọ́nwatọ hatọ dagbe de nọ gbọn whiwhẹ dali yọ́n pinpẹn azọ́nwatọgbẹ́ etọn lẹ tọn bo nọ tẹnpọn ma nado dọ̀n ayidonugo wá ede ji. Pọndohlan whiwhẹ tọn mọnkọ yin dopo to nuhe Jesu plọn sọn Otọ́ etọn dè lẹ mẹ. Dile etlẹ yindọ Jehovah kẹdẹ wẹ jẹ nado yin yiylọdọ Mẹdatọ lọ, e dọ̀n ayidonugo wá adà he Visunnu etọn yiwà taidi azọ́nwatọ hatọ de ji. Hodidọ Jiwheyẹwhe tọn de wẹ do enẹ hia, e dọmọ: “Gbọ mí ni basi gbẹtọ to apajlẹ mítọn mẹ.” (Jen. 1:26) Ayihaawe ma tin dọ Jesu yọ́n pinpẹn whiwhẹ he Jehovah dohia to hogbe ehelẹ mẹ tọn.—Salm. 18:35.

To whenue Jesu to aigba ji, ewọ do whiwhẹ dopolọ hia. To whenue yè pà ẹ na nuhe e wà lẹ wutu, e gọ̀ pipà lọ jo na Mẹhe e jẹna nugbonugbo. (Malku 10:17, 18; Joh. 7:15, 16) Jesu dovivẹnu na jijọho nido tin to ewọ po devi etọn lẹ po ṣẹnṣẹn, podọ e nọ pọ́n yé hlan taidi họntọn lẹ, e ma yin taidi afanumẹ lẹ gba. (Joh. 15:15) E tlẹ klọ afọ yetọn lẹ nado na yé nuplọnmẹ de gando whiwhẹ go. (Joh. 13:5, 12-14) Mílọsu na wà dagbe nado nọ yọ́n pinpẹn azọ́nwatọ hatọ mítọn lẹ tọn kakati nado nọ na ayidonugo nujlomẹ mítọn lẹ hugan yetọn. Eyin mí ‘nọ do gbégbò hia ode awetọ’ bo ma nọ hanú gando mẹhe sọgan mọ pipà yí go, nususu wẹ gán yin wiwadotana.—Lom. 12:10.

Mẹhe yin whiwhẹnọ sọ nọ kẹalọyi ga dọ “gbọn ayinamẹtọ susu gblamẹ wẹ nuwadotana dagbe nọ tin.” (Howh. 15:22) Mahopọnna numimọ kavi nugopipe mítọn lẹ, mí dona nọ flindọ gbẹtọvi depope ma tin he yọ́n nulẹpo. Jesu lọsu tlẹ kẹalọyi dọ nudelẹ tin he emi ma yọnẹn. (Mat. 24:36) Podọ, e nọ jlo na yọ́n pọndohlan kavi linlẹn devi mapenọ etọn lẹ tọn. (Mat. 16:13-16) Abajọ azọ́nwatọ hatọ etọn lẹ nọ voawu to apá etọn! Mọdopolọ, eyin mí nọ gbọn whiwhẹ dali hẹn dogbó mítọn lẹ do ayiha mẹ, bosọ nọ dotoaina linlẹn mẹdevo lẹ tọn, mí na yidogọna jijọho to ṣẹnṣẹn mítọn, podọ to pọmẹ “nuwadotana dagbe [na] tin.”

Nujọnu taun wẹ e yin dọ mẹho lẹ ni nọ hodo apajlẹ Jesu tọn to adà ehe mẹ dile yé to azọ́nwa dopọ. Yé dona nọ flindọ gbigbọ wiwe sọgan yinuwado mẹdepope ji to pipli mẹho lẹ tọn de mẹ. To opli yetọn lẹ whenu, eyin mẹho lẹ nọ tẹnpọn nado hẹn ninọmẹ he na zọ́n bọ mẹdopodopo na vò bo dọ linlẹn etọn tọ́n de tin-to-aimẹ, to pọmẹ yé na basi nudide lẹ he na hẹn ale wá na agun lọ blebu.

NUNỌWHINNUSẸ́N 2TỌ: “MÌ GBỌ LẸNPỌN DAGBENỌ-YINYIN MÌTỌN NI YIN YINYỌNẸN”

Azọ́nwatọ hatọ dagbe de nọ do lẹnpọn dagbe hia to whenue e to nuyiwa hẹ azọ́nwatọgbẹ́ etọn lẹ. E ma nọ hẹn nulẹ sinsinyẹn, podọ e nọ joawunanu. Matin ayihaawe, Jesu do dotẹnmẹ susu nado doayi lẹnpọn dagbenọ-yinyin Otọ́ etọn tọn go. Di apajlẹ, Jehovah do e hlan nado wá whlẹn gbẹtọvi lẹ sọn whẹdanamẹ okú tọn he yé jẹna lọ si.—Joh. 3:16.

Jesu joawunanu whenue e biọ domọ kavi whenue e sọgbe nado wàmọ. Flin lehe e gọalọna yọnnu Fenikenu lọ do dile etlẹ yindọ owhé Islaeli tọn wẹ e yin didohlan. (Mat. 15:22-28) E sọ yin lẹnpọn dagbenọ to nuhe e nọ donukun sọn devi etọn lẹ si mẹ. To whenue họntọn vivẹ́ etọn Pita mọ́n ẹn to gbangba, Jesu wleawufo nado jona ẹn. To nukọn mẹ, e ze azọngban pinpẹn lẹ do alọmẹ na Pita. (Luku 22:32; Joh. 21:17; Owalọ 2:14; 8:14-17; 10:44, 45) Apajlẹ Jesu tọn dohia hezeheze dọ eyin mí nọ joawunanu, ‘lẹnpọn dagbenọ-yinyin mítọn na yin yinyọnẹn na gbẹtọ lẹpo.’—Flp. 4:5.

Lẹnpọn dagbenọ-yinyin nasọ whàn mí nado nọ diọalọ nado sọgan nọ wazọ́n to jijọho mẹ hẹ gbẹtọ wunmẹ lẹpo. Jesu yinuwa hẹ mẹhe lẹdo e lẹ to aliho dagbe mẹ sọmọ bọ kẹntọ awuwhàntọ etọn lẹ tlẹ sawhẹdokọna ẹn dọ e yin “họntọn tòkuẹ-ṣinyantọ lẹ po ylandonọ” he kẹalọyi owẹ̀n etọn lẹ po tọn. (Mat. 11:19) Taidi Jesu, be e gán pà mílọsu nado nọ wànu dopọ hẹ mẹdevo lẹ ya? Louis, yèdọ mẹmẹsunnu de he yí ojlẹ susu zan to azọ́n lẹdo tọn mẹ bosọ wazọ́n dopọ hẹ mẹhe wá sọn ninọmẹ voovo lẹ mẹ to Bẹtẹli dọmọ: “N’ko dovivẹnu nado yí pipli he n’wazọ́n dopọ hẹ dopodopo jlẹdo adó he yè yí bliki he ma do kiklo dopolọ lẹ do dó de go. Eyin yè basi vọjlado gando fie bliki delẹ yin zizedo go, e gán zọ́n bọ adó lọ na jlọ. N’ko sọ dovivẹnu nado basi diọdo mẹdetiti tọn lẹ nado sọgan yidogọna jijlọ adó lọ tọn.” Pọndohlan dagbe nankọ die!

Azọ́nwatọ hatọ dagbe de ma nọ whlá nuhe e yọnẹn lẹ do mẹdevo lẹ po linlẹn lọ po nado duklunọ do yé ji

Ninọmẹ tẹlẹ mẹ wẹ mí gán do gbigbọ gbekọndopọ tọn hia to agun mítọn mẹ te? Mí nọ do dotẹnmẹ nado wàmọ to whenue mí topọ hẹ hagbẹ pipli kunnudegbe tọn mítọn lẹ. Mí gán nọ wazọ́n dopọ hẹ wẹnlatọ he tindo azọngban whẹndo tọn he gbọnvo na mítọn lẹ kavi ma do owhe dopolọ hẹ mí lẹ. Be mí gán dovivẹnu nado yin lẹnpọn dagbenọ gbọn vọjlado bibasi gando whenu he mí nọ yizan to lizọnyizọn lọ mẹ go dali, ehe na zọ́n bọ yelọsu na duvivi lizọnyizọn lọ tọn dogọ ya?

NUNỌWHINNUSẸ́N 3TỌ: NỌ “WLEAWU NADO MÁNAMẸ”

Azọ́nwatọ hatọ dagbe de nọ “wleawu nado mánamẹ.” (1 Tim. 6:18) To whenue Jesu to azọ́nwa dopọ hẹ Otọ́ etọn, e dona ko doayi e go dọ Jehovah ma nọ whla nuhe e yọnẹn lẹ. Whenue Jehovah “wleawuna olọn lẹ,” Jesu “tin to finẹ” bosọ penugo bo plọnnu sọn ewọ dè. (Howh. 8:27) To nukọn mẹ, Jesu lọsu yí homẹhunhun do má ‘nuhe e ko sè’ sọn Otọ́ etọn dè lẹ hẹ devi etọn lẹ. (Joh. 15:15) Po apajlẹ enẹ po to ayiha mẹ, mílọsu dona wleawufo nado má nuyọnẹn po numimọ mítọn po hẹ azọ́nwatọ hatọ mítọn lẹ. E họnwun dọ azọ́nwatọ hatọ dagbe de ma na whlá nudọnamẹ he nuhudo etọn tin kavi he gán gọalọ de do mẹdevo lẹ, po linlẹn lọ po nado duklunọ do yé ji. Homẹ etọn na nọ hùn nado má nudagbe he e ko plọn lẹ hẹ mẹdevo lẹ.

Mí gán sọ nọ má hogbe tulinamẹ tọn lẹ hẹ azọ́nwatọ hatọ mítọn lẹ. Be homẹ mítọn ma nọ hùn whenue mẹde doayi vivẹnudido mítọn lẹ go bo do pinpẹn-nutọn-yinyọnẹn he wá sọn ahun mẹ hia mí ya? Jesu yí whenu nado dọ jẹhẹnu dagbe azọ́nwatọ hatọ etọn lẹ tọn he go e doayi lẹ na yé. (Yijlẹdo Matiu 25:19-23; Luku 10:17-20 go.) E tlẹ dọna yé dọ yé na “wà azọ́n he klohu” emitọn lẹ. (Joh. 14:12) To ozán he jẹnukọnna okú etọn mẹ, e pà apọsteli nugbonọ etọn lẹ bo dọmọ: “Mìwlẹ wẹ mẹhe ko gbọṣi dè e to whlepọn ṣie lẹ mẹ.” (Luku 22:28) Yí nukun homẹ tọn do pọ́n lehe hogbe etọn lẹ dona ko yinuwado yé ji sisosiso bosọ whàn yé nado yinuwa do sọ! Eyin mílọsu nọ yí whenu nado pà azọ́nwatọ hatọ mítọn lẹ, ayihaawe ma tin dọ yé na do ayajẹ, podọ e yọnbasi dọ yé ni do kọdetọn dagbe dogọ.

A GÁN YIN AZỌ́NWATỌ HATỌ DAGBE DE

Mẹmẹsunnu de he nọ yin Kayode dọmọ: “E ma biọ dọ azọ́nwatọ hatọ dagbe de ni yin mẹpipe, amọ́ e nọ gọalọna mẹhe lẹdo e lẹ nado do ayajẹ bosọ nọ hẹn azọ́n lọ bọawuna mẹhe to azọ́nwa dopọ hẹ ẹ lẹ.” Be azọ́nwatọ hatọ mọnkọ de wẹ a yin ya? Naegbọn a ma na yí sọwhiwhe do kanhose delẹ to azọ́nwatọ hatọ towe he yin Klistiani lẹ mẹ gando azọ́nwatọ hatọ wunmẹ he yé lẹndọ a yin go? Eyin homẹ yetọn nọ hùn nado wazọ́n dopọ hẹ we dile homẹ devi Jesu tọn lẹ tọn nọ hùn nado wazọ́n dopọ hẹ ẹ do, a gán dọ taidi apọsteli Paulu dọmọ: “Azọ́nwatọ hatọ mìtọn lẹ wẹ mí yin na ayajẹ mìtọn.”—2 Kọl. 1:24.

ATỌ̀HỌ̀-NUHIHỌ́ LỌ TỌN—ZINJẸGBONU OPLỌN TỌN