Amango aliri omu mbingu, Yesu aliyigire engeso zinja zamujiraga abe muntu mwinja w’okukola haguma n’abandi. Amango ajag’agera oku gulu, aliyerekene omufano gwinja g’omuntu onakola bwinja haguma n’abandi. Nka gurhe omufano gwa Yesu gwakarhurhabala? Omu kushambala oku mufano gwage, rhwakabona makanuni masharhu makarhurhabala kukola bwinja haguma n’abandi. Amola makanuni marhurhabala rhukomeze obuguma haguma na bene-berhu na bali-berhu.

Omuntu onakola bwinja haguma n’abandi aba mwirhohye, anabona oku ababo bali b’akamaro, arhachibona oku ye mukozi mwinja kulusha abandi. Yesu ayigaga eyola ngeso y’okuchirhohya kurhenga kw’Eshe. Chiro akaba oku Yehova yenyine ye kwanene kuhamagalwa Mulemi, alishondere abandi bamenye akasi k’akamaro Omugala ajira. Rhubwene echola omu binwa Mungu aderhaga: “Leka rhukole omuntu oku shusho lyerhu.” (Mwa. 1:26) Amango Yehova aderhaga ebyola binwa, Yesu amenya oku Yehova ali mwirhohye bwenene.​—Zb. 18:35.

Amango aliri oku gulu, Yesu naye aliyerekene obwirhohye buli nk’obola. Amango baliri bamukuuza oku byaliri ajira, aliri aha obola bukuuze ok’obukwanene, k’okuderha, Mungu. (Mk. 10:17, 18; Yoh. 7:15, 16) Yesu aligenderere kukola omu murhula haguma n’abanafunzi bage, analiri abarhola nka bera s’arhali baja bage. (Yoh. 15:15) Chiro analibashukire amagulu omu kubayigiriza obwirhohye. (Yoh. 13:5, 12-14) Nerhu, rhukwanene kubona  oku abarhuli rhwakola nabo bali b’akamaro hali h’okuheba enyungu zerhu oku nafasi y’oburhanzi. Amango ‘rhwamayerekana obukenge’ ku buli muguma n’owindi, buzira kulaga ku nde wahabwa obukuze, rhwakakola kasi kanene.​—Ro. 12:10.

Kandi omuntu mwirhohye ab’amenyere oku “ebintu binagenda bwinja amango hali bahanuzi banene.” (Mez. 15:22) Chiro akaba rhwagerere mu binene changwa rhugwerhe obuhashe buli gurhe, rhukwanene rhuyikube oku nta muntu ob’amenyere byoshi. Chiro Yesu naye aliyemerere oku hali ebintu arhaliyinji. (Mt. 24:36) Kandi, alisimire amenye eby’abanafunzi bage barhaliri bashinganyanya balimenyere changwa ebi baliri bawaza. (Mt. 16:13-16) Che cherhumire rhurhakasomezwa okubona abaliri bakola naye baliri bachiyunva bwinja ahaburhambi bwage! Konakuguma, amango rhwamayibuka oku bwirhohye oku rhurhamenyere buli chintu n’amango rhuli rhwayunviriza abandi, rhwakomeza omurhula haguma nabo, n’omu kukola haguma nabo, “ebintu byagenda bwinja.”

Ahanene kuli kw’akamaro abashamuka bayiganye Yesu omu kuyerekana obukenge amango bali bakola haguma. Bakwanene kuyibuka oku eroho lichesibwa lyakola ku buli muntu omu baraza. Akaba banachihangana kukola omu murhula omu mbuganano yabo, n’aha buli muntu achiyunva huru kuderha, barhola emihigo yakalerhera echibaga choshi enyungu.

Omukozi mwinja anayemera amawazo m’abandi amango ali akola nabo. Anayemera amawazo m’abandi n’okukulikira ebi baderhere. Yesu aligwerhe orozo l’okulolereza gurhe Eshe aliyemerere amawazo m’abandi. Omufano, Yehova amurhuma ajichungula abantu omu buhane b’olufu balikwanene.​—Yoh. 3:16.

Yesu aliri akulikira eby’abandi baderhere amango bihemere kujira ntyo. Rhuyibuke nka gurhe Yesu arhabalaga mukazi muguma we Foinike, chiro akaba oku bamurhumaga oku lubaga we Izraeli. (Mt. 15:22-28) Kandi arhaliri alolera abanafunzi bage k’obushinganyanya. Amango mwira wage Petro amulahiraga embere z’abantu, Yesu aliri tayari kumubabalira. Enyuma w’aho Yesu amuha engabane z’akamaro. (Lu. 22:32; Yoh. 21:17; Mdo. 2:14; 8:14-17; 10:44, 45) Omufano gwa Yesu gurhuyerekere bwinja oku rhukwanene “kumenyikana oku bantu boshi oku rhuli bantu banarholeka” omu kuyemera amawazo m’abandi.​—Flp. 4:5.

Okuba bantu banarholeka kwakashuba rhurhabala rhuchikomeeze yi rhugala kukola omu buguma n’abantu boshi. Yesu aliri akolera bwinja  abantu aliri akola nabo kugera amango abanzi bage bamuyunvira obongwa n’okumushobeka oku ali mwira “w’abanalipisa ekoli n’abanya-byaha” baliyemerere oburhumwa bwage. (Mt. 11:19) Ka nerhu rhwakagala kuyunvikana n’abandi kuguma na Yesu? Mwene-werhu Louis, wagezeze myaka minene omu kulambagirira ebibaga n’okukola oku Beteli haguma n’abantu ba buli lubero, aderhere ntya: “Naliri nachihangana kuhuzanya buli chigusho ch’abantu nakolere nabo n’echibambazi chiyumbakirwe n’amabale marhali kuguma. Bulala amabale-marhayingene, bihunire okuchihangana, aliko echibambazi chakanyoroka. Nachihanganire kuhindamula bintu biguma omu kalamo kani yi ngala kukola n’abandi omu murhula yi n’akasi kagenderera bwinja.” Eyola eli ngeso nyinja bwenene!

Mango chi bihemere rhuyerekane oku rhuli bantu banarholeka omu chibaga cherhu? Rhugwerhe orozo l’okujira ntyo amango rhuli haguma n’aba rhuba nabo omu chigusho cherhu ch’amahubiri. Rhwakahubiri haguma n’abahubiri bashabire changwa abalamba, n’abashaja changwa emisole. Rhwakapunguza oku ntambu zerhu n’okukolesa amahubiri basima yi nabo bagwarha omwishingo bwenene omu mahubiri.

Omuntu onakola bwinja haguma n’abandi aba “tayari kusangira.” (1 Ti. 6:18) Amango Yesu aliri akola haguma n’Eshe, kweri alichibwenere oku Yehova arhabisha ebintu oku bandi. Amango Yehova aliri “arheganya embingu,” Yesu “aliriho” akanayigire binene kuye. (Mez. 8:27) Enyuma w’aho, Yesu naye alisangire oku mwishingo haguma n’abanafunzi bage “ebintu ayunvaga” kurhenga kw’Eshe. (Yoh. 15:15) Rhwakayiga omufano gwa Yehova omu kubwira bene-berhu na bali-berhu ebi rhwayigire. Kweri, omuntu onakola haguma n’abandi, arhakwanene kubishiriza omu kurhababwira ebibakenere changwa eby’akabarhabala. Anagwarha omwishingo g’okusangira haguma n’abandi ebintu binja ayigire.

Kandi rhwakabwira abarhukola nabo ebinwa bihebere omurhima. Amango omuntu amarhegera obushiru bwerhu, n’okurhubwira koko n’omurhima goshi, k’echola chirhasimisa omurhima gwerhu? Yesu alirholere akasanzi k’okubwira abaliri akola nabo ebinja ababweneko. (Huzanya na Matayo 25:19-23; Luka 10:17-20.) Anababwira chiro oku “bakakolere kasi kanene kulusha” akage. (Yoh. 14:12) Omu budufu bw’embere y’olufu lwage, abwira ntya entumwa zage baliri bimana: “Mwabo mwemwachishwekere ku nyono omu bigeregezo byani.” (Lu. 22:28) Waza okuntu ebyola binwa byalibahumire oku murhima bwenene n’oku bashunika bakole! Amango rhwarhola akasanzi k’okubwira abarhunakola nabo koko, kweri bagwarha omwishingo nkabaga bakanashuba kukola bwenene.

Mwene-werhu muguma oyirikirwe Kayode, aderhere ntya: “Omuntu onakola bwinja haguma n’abandi, birhahemere oku abe mushinganyanya. Aliko anarhabala abandi bagwarhe omwishingo, n’okujira akasi kabayorohere.” K’oba muntu onajira ntyo amango oli wakola n’abandi? Nkabaga wakabaza baguma mu bene-benyu na bali-benyu onakola nabo, bakwire nka gurhe banakubona. Akaba banayunva omwishingo g’okukola haguma nawe kuguma n’abanafunzi baliri bayunva omwishingo g’okukola haguma na Yesu, wakaderha nk’oku entumwa Paulo naye aderhaga: “Rhuli benyu bakozi yi mugwarha omwishingo.”​—2 Ko. 1:24.