Natun-an ni Jesus ang mga kinaiya nga nakabulig sa iya nga mangin maayo nga kaupod. Gani sang ari sia sa duta, maayo gid sia nga halimbawa sa sini. Paano makabulig sa aton ang iya halimbawa? Kon binagbinagon naton sing maayo ang iya halimbawa, mabal-an naton ang tatlo ka prinsipio nga makabulig sa aton nga mangin maayo nga kaupod sa pag-alagad. Makabulig ini nga mga prinsipio para mapalig-on naton ang aton paghiusa.

Maayo nga kaupod sa pag-alagad ang isa ka tawo nga mapainubuson. Para sa iya, mas importante ang iban kag wala sia nagapadayawdayaw. Natun-an ni Jesus ini nga kinaiya sa iya Amay. Bisan pa nga si Jehova lang ang nagakadapat tawgon nga Manunuga, gusto niya nga mabal-an sang iban nga importante ang ginhimo sang iya Anak. Maathag ini sa ginsiling sang Dios: “Mahimo kita sing tawo suno sa larawan naton.” (Gen. 1:26) Sang ginsiling ini ni Jehova, nahangpan ni Jesus nga mapainubuson gid si Jehova.—Sal. 18:35.

Sang ari si Jesus sa duta, mapainubuson man sia. Sang gindayaw sia sang mga tawo bangod sa iya mga nahimo, ang Dios ang iya gindayaw. (Mar. 10:17, 18; Juan 7:15, 16) Ginpanikasugan ni Jesus nga mangin maayo ang kaangtanan niya sa iya mga disipulo kag ginkabig niya sila nga mga abyan, indi mga ulipon. (Juan 15:15) Ginhinawan pa gani niya ang ila mga tiil para tudluan sila nga mangin mapainubuson. (Juan 13:5, 12-14) Dapat man naton padunggan ang aton mga kaupod sa pag-alagad, kag indi naton dapat pag-unahon ang aton personal  nga kaayuhan. Kon ‘ginapadunggan naton ang isa kag isa’ kag wala kita nagatinguha nga kita gid ang dayawon, madamo kita sing mahimo.—Roma 12:10.

Nahangpan man sang mapainubuson nga tawo nga “magamadinalag-on [ang mga plano] kon may madamo nga manuglaygay.” (Hulu. 15:22) Bisan pa madamo kita sang eksperiensia ukon ikasarang, dapat naton tandaan nga wala sing tawo nga nakabalo sang tanan. Bisan gani si Jesus nagsiling nga may mga butang nga wala niya nabal-an. (Mat. 24:36) Interesado man sia sa nabal-an ukon ginahunahuna sang iya indi perpekto nga mga disipulo. (Mat. 16:13-16) Gani indi katingalahan nga komportable sila kon kaupod nila sia. Kon mangin mapainubuson man kita kag tandaan naton nga wala naton nabal-an ang tanan, kag kon pamatian naton ang mga ideya sang iban, mangin maayo ang aton kaangtanan sa ila. Kon nagabuligay kita, “magamadinalag-on” kita sa aton mga hilikuton.

Dapat gid ilugon sang mga gulang ang pagkamapainubuson ni Jesus. Sa tion sang miting sang hubon sang mga gulang, dapat nila dumdumon nga puede giyahan sang balaan nga espiritu ang bisan sin-o man sa ila. Dapat sila magbuligay para mabatyagan sang kada isa nga puede sila makahatag sang panugda. Kon himuon nila ini, makahimo sila sang mga desisyon nga makabulig sa bilog nga kongregasyon.

Maayo nga kaupod sa pag-alagad ang isa ka tawo nga makatarunganon. Kabalo sia mag-adjust sa sitwasyon kag nagapasugot sia sa gusto sang iban. Madamo nga beses nga nakita ni Jesus ang pagkamakatarunganon sang iya Amay. Halimbawa, ginpadala sia ni Jehova para luwason ang katawhan sa kamatayon nga nagakadapat kuntani sa ila.—Juan 3:16.

Kon kinahanglanon ukon nagakaigo, nagapasugot si Jesus sa gusto sang iban. Halimbawa, bisan pa nga ginpadala si Jesus para sa panimalay sang Israel, ginbuligan niya gihapon ang babayi nga taga-Fenicia. (Mat. 15:22-28) Makatarunganon man sia sa iya mga disipulo. Sang ginpanghiwala si Jesus sang iya suod nga abyan nga si Pedro sa madamo nga tawo, ginpatawad sia ni Jesus. Sang ulihi, ginhatagan niya si Pedro sang importante nga mga responsibilidad. (Luc. 22:32; Juan 21:17; Binu. 2:14; 8:14-17; 10:44, 45) Maathag sa halimbawa ni Jesus nga dapat naton ‘ipakita sa tanan nga tawo ang aton pagkamakatarunganon’ paagi sa pagpasugot sa gusto sang iban.—Fil. 4:5.

Kon makatarunganon kita, mabuligan man kita sini nga mag-adjust sa tanan nga klase sang tawo. Gani bisan sin-o man ang kaupod naton sa pag-alagad, mangin maayo ang aton kaangtanan sa ila.  Bangod maayo gid ang pagtratar ni Jesus sa mga kaupod niya, nahisa sa iya ang iya mga kaaway. Nagsiling pa gani sila nga ‘abyan sia sang mga manugsukot sing buhis kag sang mga makasasala’ nga nagbaton sang iya mensahe. (Mat. 11:19) Mailog bala naton si Jesus kag mangin maayo man ang aton kaangtanan sa mga kaupod naton sa pag-alagad? Binagbinaga si Louis nga nangin manugtatap sang sirkito kag Bethelite sadto. Sarisari nga mga tawo ang nakaupod niya sa iya asaynment. Nagsiling sia: “Kon kaupod mo sa pag-alagad ang sarisari nga klase sang mga tawo, daw pareho lang nga nagagamit ka sang mga bato nga sarisari ang korte kag kadakuon para maghimo sang pader. Kinahanglan mo gid magpanikasog. Pero kon i-adjust mo ang pagplastar sang mga bato, makahuman ka sang matadlong nga pader. Ginapanikasugan ko man nga mag-adjust para mangin maayo ang akon kaangtanan sa iban kag para mahimo namon ang amon hilikuton.” Maayo gid ini nga panimuot.

Sa ano nga mga sitwasyon mapakita naton ang aton pagkamakatarunganon sa kongregasyon? Ang isa ka sitwasyon amo ang aton pagbantala kaupod ang mga kauturan sa aton grupo sa pag-alagad sa latagon. Indi palareho ang aton responsibilidad sa pamilya kag indi man palareho ang aton edad. Gani dapat handa kita nga bag-uhon ang aton kadasigon sa paglakat depende sa kon sin-o ang aton upod, ukon mag-adjust sa paagi sang pagbantala nga gusto sang aton upod para mangin malipayon pa gid sia sa iya pag-alagad.

Maayo nga kaupod sa pag-alagad ang isa ka tawo nga “handa sa pagpaambit.” (1 Tim. 6:18) Samtang nagapangabudlay si Jesus kaupod ang iya Amay, posible nga natalupangdan niya nga wala sing may gintago si Jehova sa iya. “Yara” si Jesus sang ‘ginhimo ni Jehova ang kalangitan,’ gani makatuon sia sa iya Amay. (Hulu. 8:27) Sang ulihi, nalipay si Jesus nga isugid sa iya mga disipulo ‘ang mga butang nga nabatian niya’ sa iya Amay. (Juan 15:15) Dapat naton ilugon si Jehova. Dapat handa man kita nga isugid sa aton mga kauturan ang aton mga natun-an. Wala ginasugid sang iban ang ila mga natun-an sa ila mga kaupod kay gusto nila nga sila pirme ang may kontrol sa iban. Pero ang maayo nga kaupod wala nagatago sang mga impormasyon nga kinahanglan sang iya mga kaupod. Sa baylo, nalipay sia nga isugid sa iban ang iya mga natun-an.

Puede man naton palig-unon ang aton mga kauturan. Kon natalupangdan sang iban ang aton mga pagpanikasog kag gindayaw nila kita, indi bala nga nalipay kita? Gindayaw ni Jesus ang maayo nga mga ginhimo sang iya mga disipulo. (Ipaanggid ang Mateo 25:19-23; Lucas 10:17-20.) Ginsilingan pa gani niya sila nga ‘magahimo sila sang mga buhat nga labaw pa’ sa nahimo niya. (Juan 14:12) Sang gab-i antes ginpatay si Jesus, gindayaw niya ang iya matutom nga mga apostoles. Nagsiling sia: “Gin-unungan ninyo ako sa akon mga pagtilaw.” (Luc. 22:28) Bangod sang iya ginsiling, napalig-on gid sila nga himuon ang ila bug-os nga masarangan. Kon pasalamatan man naton kag dayawon ang aton mga kauturan, sigurado gid nga mangin mas malipayon sila kag madamo sila sang mahimo sa ila pag-alagad.

Ang isa ka brother nga si Kayode nagsiling: “Indi kinahanglan nga mangin perpekto ang isa para masiling naton nga maayo sia nga kaupod sa pag-alagad, kundi nalipay ang iya mga kaupod kon ara sia kag daw nagamag-an ang ila ginahimo.” Amo ka bala sini nga klase sang kaupod? Puede mo pamangkuton ang pila sa imo mga kauturan kon ano ang masiling nila parte sa imo. Kon nalipay sila nga kaupod ka, pareho sa ginbatyag sang mga disipulo ni Jesus sang kaupod nila sia, masiling mo man ang ginsiling ni apostol Pablo: “Mga masigkamanugpangabudlay kami para sa inyo kalipay.”—2 Cor. 1:24.