Wii Yeesus im himel waar, hot eyer kelërnt ti kwaliteete woo eyer must hon fer een kuute mit aarwayter sin. Tan, wii eyer uf te eyert waar, hot eyer kuut mit te anere kexaft. Meyer khene fiil nutse kriin fon Yeesus sayn payxpiil. Wën mer tëm sayn payxpiil xtutiire, fine mer 3 funtamente woo uns helfe een kuute mit aarwayter sin. Tiise funtamente tuun uns helfe noch eenicher mit unser priiter plaype.

Een kuute mit aarwayter is teemuutich. Tee tenkt tas tii woo mit tëm xafe wichtich sin, un tee wil net ti acht fer sich hoole. Yeesus hot kelërnt teemuutich sin mit sayn Fater. Ploos Yeehoowa khan keruuft wëre wii “Kriatoer”. Awer tee wolt hon tas ti anere tsum wise kreechte fon te wichtich aarwayt woo sayn Soon kemacht hot. Meyer khene tas mërke wën Kot kesaat hot: “Wole mer te mënx mache noo unser pilt.” (Xee. 1:26) Tiise wërter hon fer Yeesus ketsaycht wii teemuutich Yeehoowa is. (Psal. 18:35)

Wii Yeesus uf te eyert waar, waar eyer aach teemuutich. Wii ti layt tëm keloopt hon weeche was eyer kemacht hot, hot eyer eer fer Kot kep. (Mar. 10:17, 18; Yoo. 7:15, 16) Yeesus hot sich aach aan kextrengt fer te friit mit sayn tisipele hale. Tee hot tëne wii froynte, net wii sklaawe, pehantelt. (Yoo. 15:15) Een mool, hot eyer soo kaar tëne sayn fiis kewext fer tëne lërne teemuutich sin. (Yoo. 13:5, 12-14) Meyer mise aach ti layt woo mit uns xafe eere un tëne sayn interese foer unseres tuun. Was tuut pasiire wën mer ti anere eere un uns net tsu fiil ketanke mache mit weer ti loop kriit? Meyer tuun fiil mee aarwayt fërtich pringe. (Rom. 12:10)

 Een teemuutich persoon tuut aach ferxteen tas “mit fiile aanreeter, kriit ma kuute resultaate”. (Xpr. 15:22) Ekaal wii fiil speryens orer apiliteet yemant hot, meyer mise erkhëne tas kheen mënx ales wees. Soo kaar Yeesus hot erkhënt tas es tinge kep hot woo eyer net wust. (Mat. 24:36) Un Yeesus wolt aach wise was sayn imperfekte tisipele kemënt hon. (Mat. 16:13-16) Tes weeche, hon tëm sayn tisipele — sayn mit aarwayter — sich kuut mit tëm kexpiirt. Tan, was mise mer mache fer friit mit te anere hon un kuute resultaate kriin? Meyer mise teemuutich sin un erkhëne tas mer net ales wise un aach ti mënunge fon te anere heere.

Hauptseechlich ti elteste mise Yeesus sayn teemuut noo mache wën se mitsamer xafe tuun. Tii mise sich traan tenke tas te hayliche kayst khan kwalkee eene fon te elteste uf muute etwas saan woo tëne heleft een kuut ëntxlus mache. Tes weeche, wën se sich fersamele tuun, mus yeete elteste sich fray xpiire fer sayn mënung saan. Soo tuun se ëntxlise mache woo nutse fer ti kans kemaynt pringe.

Wën mer wole een kuute mit aarwayter sin, thërfe mer net xtreng sin; un mer mise aach lërne noo kepe. Kewis hot Yeesus oft kesiin tas sayn Fater net xtreng waar. Tsum payxpiil: weeche ti sint, hot ti mënxheet te toot fertiint; awer Yeehoowa hot tëm kexikt fer ti mënxheet rete. (Yoo. 3:16)

Yeesus hot aach noo kep wën es neetich orer richtich waar. Tsum payxpiil: Yeesus is kexikt kep fer ti israeliiter helfe; awer wii een feniisix fraa tëm hilef ferlangt hot, waar eyer net xtreng kewees: tee hot se keholef. (Mat. 15:22-28) Yeesus waar aach net xtreng mit was eyer fon sayn tisipele kewaart hot. Pheeter hot 3 mool foer ti anere kesaat tas eyer net Yeesus khëne teet; awer Yeesus waar wilich fer tëm fertsaye. Xpeeter, hot eyer soo kaar wichtiche flichte fer Pheeter kep. (Luk. 22:32; Yoo. 21:17; Aph. 2:14; 8:14-17; 10:44, 45) Yeesus sayn payxpiil tuut taytlich tsayche tas mer mise lërne noo kepe. Un tas mer mise fer al ti mënxe taytlich lose tas mer net xtreng sin. (Fili. 4:5)

Wën mer wilich sin fer noo kepe un net xtreng sin, tuun mer in friit mit ale layt xafe. Yeesus hot sich kuut kep mit ale kaar, too tepay ti sintiche un tii woo xtaye ferlangt hon, woo sayn pexeet aan kenom hon. Tes weeche, hon tëm sayn naytiche faynte tëm akusiirt: “Tee is froynt fon tëne woo xtaye ferlange un ti sintiche.” (Mat. 11:19) Khene mer, soo wii Yeesus, kuut mit te anere xafe? Louis, een pruuter woo mit fiil unerxiitliche priiter kexaft hot in te sirkuyt aarwayt un in  Petël, saat: “Mit imperfekte layt xafe is wii een mauer mit xteen paue. Soo wii ti xteen net ekaal sin, sin ti layt aach net ekaal. Tes weeche, khost es fiil aanxtrengung fer een mauer richt lose mit tiise sorte xteen. Awer es is meechlich tas hin kriin! Meyer mise ploos yeete xteen ufm richtiche plats tuun. Ich fersuuche aach imer noo kepe wëns meechlich is. Soo, khan ich te friit mit te anere hale un een kuute mit aarwayter sin.” Sicher, een xeene payxpiil fer uns, kël?

In was fer situatsyoone khene mer in unser kemaynt tsayche tas mer net xtreng sin? Een payxpiil is wën mer mit unser preetich aarwayt krup xafe. Als mool xafe mer mit puplikatoore woo een unerxiitlich situatsyoon in sayn familye hon orer woo elter orer yinger wii uns sin. Im xtant, khene se net tsu xnel laafe orer mise se als mool een pisye ruue. Orer, khan sin tas se kërn preetiche in een aner aat. Was mënst tuu: khanst tuu noo kepe un soo wii tii xafe? Tas tuut sicher tëne fiil fraye.

Een kuute mit aarwayter is “wilich fer se teele”. (1 Tim. 6:18) Wii Yeesus mit sayn Fater kexaft hot, sicher hot eyer kemërkt tas Yeehoowa net ti tinge ferxtekelt hot. Tsum payxpiil: wii Yeehoowa ‘te himel kemacht hot, waar Yeesus tat’ un khont fon Tëm lërne. (Xpr. 8:27) Xpeeter hot Yeesus selepst mit sayn tisipele keteelt ‘ales was eyer fon sayn Fater kelërnt hot’. (Yoo. 15:15) Wën mer mit unser priiter un xwestere teele was mer kelërnt hon, tuun mer Yeehoowa sayn payxpiil noo mache. Kewis, een kuute mit aarwayter tuut net tenke: ‘Ich tuun net tiise informatsyoone mit te anere teele. Wën net, ferliire ich mayn autoriteet.’ Kans anerste! — eene kuute mit aarwayter tuut kërn mit te anere teele ti tinge woo eyer kelërnt hot.

Een aner tings woo mer khene mit unser mit aarwayter teele sin ufmuutiche wërter. Wën yemant unser aanxtrengung mërkt un uns ‘tanke xeen’ saat, fine mer uns kuut, kël? Yeesus hot sayn mit aarwayter keloopt weeche ti kuute tinge woo se kemacht hon. (Kuk aach Matheus 25:19-23; Lukas 10:17-20.) Tee hot soo kaar kesaat tas ti teete “kreeser aarwayte” wii tee mache. (Yoo. 14:12) In te nacht foer sayn toot, hot eyer sayn troye aphostele keloopt mit te wërter: “Teyer sayt tii woo mit mich in mayn proope keplip sayt.” (Luk. 22:28) Xtel tich mool foer wii tiise wërter ti tisipele petrof hon! Kewis, hot tas tëne sayn hërts aan kekrif un tëne uf kemuut wayter xafe. Wën mer tsayt hoole fer se loope tii woo mit uns xafe, wëre se frooer un tuun tan noch peser xafe.

“Een kuute mit aarwayter mus net perfekt sin — saat een pruuter woo Kayode heest. — Awer tee macht ti anere froo un lost ti aarwayt fer ti anere laychter.” Pist tuu soo een sort mit aarwayter? Im xtant, khanst tuu fer etliche priiter un xwestere ferlange was se too triwer mëne. Wën se kërn mit tich xafe — wii Yeesus sayn tisipele kërn mit tëm kexaft hon — khanst tuu soo wii te aphostel Phaul saan: “Meyer sin mit aarwayter fer ayre frooheet.” (2 Kor. 1:24)