Indu tja ri meyuru, Jesus we rihonga ovikaṋena mbya tjita kutja ma yenene okurira omuungure wa pamwe omuwa. Nu tje ya kombanda yehi eye wa ri omundu wotjihorera otjiwa ngwaa ungura nawa ku na varwe. Omomuano uṋe mu matu yenene okuhorera ku Jesus? Tji twa tara nawa kotjihorera tje, eṱe matu yenene okumuna omirari vitatu mbi mavi yenene okutuvatera okurira ovaungure va pamwe ovawa. Omirari mbi, mavi tu vatere okukara noruwano nomaunguriro wa kumwe ku novakambure ovakwetu.

Omuungure wa pamwe omuwa u risusuparisa, u vara varwe otjovananḓengu, nu kakondjo okuraisa kutja ongu ri onongo pu varwe. Ongaro yomerisusuparisiro ndjo Jesus we rihonga okuza ku Ihe. Nandarire kutja Jehova erike ongwa pwa okuisanewa Omuute, eye aa vanga kutja varwe ve tjiwe ohunga noviungura ovinanḓengu Omuna we mbya ungura otjomuungure wa pamwe na ye. Iho matu tji munu momambo wa Mukuru ngu maye tja: “Ngatu meme ovandu kombunikiro na kosaneno yetu.” (Gen. 1:26) Indu Jehova tja hungira omambo ngo, Jesus wa tjiwa kutja Jehova omurisusuparise.—Eps. 18:35.

Jesus wina wa ri omurisusuparise indu tja ri kombanda yehi. Indu ovandu tji ve mu tanga mena roviṋa mbyaa tjiti, eye aa yandja ohiviro ndjo ku Mukuru. (Mar. 10:17, 18; Joh. 7:15, 16) Kutja pe kare ombepo ombwa pokati ke novahongewa ve, Jesus ee ve tjindi otjomapanga we, nu kee ve tjindi otjovakarere. (Joh. 15:15) Eye nandarire wa koha  ozombaze zawo okuvehonga omerisusuparisiro. (Joh. 13:5, 12-14) Eṱe wina matu sokuyozika ovaungure va pamwe na eṱe, nokuhina okutwa po ozonḓero zetu komeho wa inḓa ozawo. Indu tji matu ‘yozikasana’ nokuhina okurikenda kutja ouṋe ngu ma munu ohiviro, eṱe matu yenenisa oviṋa ovingi.—Rom. 12:10.

Omundu omurisusuparise wina u tjiwa kutja ma ‘sokuyakura ondunge aihe’ ndji ma pewa kutja ma ‘ṋingapare.’ (Omiano 15:22) Nandarire kutja tu nondjiviro poo tu yenena okuungura ovingi, eṱe ngatu tjiwe kutja kaku nomundu ngu yenena okutjiwa oviṋa avihe. Jesus wina wa yakura kutja pa ri noviṋa mbye hi na aa tjiwa. (Mat. 24:36) Eye wina aa yandja ombango ku imbi ovahongewa ve mbe ha ri ohomonena mbyaave tjiwa poo mbyaave ripura. (Mat. 16:13-16) Ku nao, ovaungure va pu na ye opaave zu okukara nondjoroka tji ve ri pu na ye. Momuano otjingewo, indu tji twe risusuparisa natu zemburuka kutja katu nokutjiwa oviṋa avihe, na tji matu puratene kondunge yovakwetu, mape kara ohange pokati ketu nu matu “ṋingapara.”

Otjiṋa otjinanḓengu kovanene vombongo, okuhorera komerisusuparisiro wa Jesus otja tji mave ungura kumwe. Owo mave hepa okutjiwa kutja ombepo ondjapuke i yenena okuhongorera omunene ngamwa auhe wombongo, kutja ma yandje ondunge ndji mai ve vatere okutwa po ondyero ombwa. Indu ovanene vombongo tji mave kondjo okutjita kutja omundu auhe ma kare noukutuke okuyandja oumune mozombongarero zawo, mave yenene okutwa po ozondyero nḓu maze yenene okuyeta ouwa kombongo aihe.

Omuungure wa pamwe omuwa u raisa oupore tji ma ungura pu na varwe. Eye u rira omundu omupupu okuungura pamwe nu u puratena kondunge yovakwao. Jesus wa ri noruveze oruingi okutarera omuano Ihe maa raisa oupore nomaunguriro wa kumwe omawa. Otjotjihorera, Jehova ope mu hindira okuyekuyama ovandu komberero yonḓiro, ndje ve pwira.—Joh. 3:16.

Jesus aa puratene ku varwe tje ri ohepero. Zemburuka omuano mbwa vatera omukazendu Omukanaan nandarire kutja wa ri a hindwa kotjiwaṋa tja Israel. (Mat. 15:22-28) Eye wina kaa undjire ko oviṋa ovingi okuza kovahongewa ve. Kombunda ya indu epanga re ropopezu Petrus tje mu pataṋa momurungu wovandu avehe, Jesus wa ri nonḓero okumuisira. Nu kombunda eye we kemupa otjiungura otjinanḓengu. (Luk. 22:32; Joh. 21:17; Oviung. 2:14; 8:14-17; 10:44, 45) Otjihorera tja Jesus tji tu vatera kutja ‘oupore wetu u tjiukwe i ovandu avehe,’ mokuripurira kozongaro za varwe.—Fil. 4:5.

 Oupore wetu wina u tu hinga kutja tu rundurure ongaro yetu, kokutja tu yenene okuungura mohange ku novandu pekepeke. Jesus aa tjindi imba mbaave raisa onḓero mombuze ye mongaro ombwa tjinene, nga ovanavita mba ri neruru na ye tjaave mu kuminine kutja eye ‘epanga rovasutise votjimariva tjouhona norovanauvi.’ (Mat. 11:19) Hapo matu yenene okuungura nawa ku na varwe mba panguka ku eṱe tjimuna Jesus tjaa tjiti? Omurumendu omukambure wena Louis, ngwa ungura ku novandu ovengi pekepeke motjiungura tjokuvarura ozombongo na poBetel wa tja: “Ami ee kondjo okusasaneka otjimbumba atjihe tjovandu mbu twa ungura pamwe ku nekuma rondjuwo nda ungurwa pomawe nga panguka. Tji wa tjiti omarundurukiro komuano omawe tjiva mu ya zikwa, mo yenene okukara nekuma rondjuwo ndi hi notjipo. Ami wina ee kondjo okutjita omarundurukiro mu ami omuini, kutja mbi ungure mohange ku na varwe, nokuvatera kutja oviungura vi yenenisiwe.” Indjo tjiri ombepo ombwa.

Omozongaro zeṋe mu matu yenene okuraisa ombepo yomaunguriro wa kumwe mombongo? Matu yenene okuraisa ombepo yomaunguriro wa kumwe tji tu ri pu notjimbumba tjetu tjokuzuvarisa. Mape ya atu ungura pu novakambure ovakwetu mbe nomerizirira meṱunḓu rawo nga panguka ku inga owetu, poo votjiwondo tji tja panguka ku ihi otjetu. Ma rire nawa tji twa tjiti omarundurukiro momuano wetu wokuzuvarisa, kokutja tu zuvarise momuano wawo, poo mbu mau tjiti kutja ve kare nondjoroka motjiungura tja wo tjokuzuvarisa.

Omuungure wa pamwe omuwa u ‘suvera okuyandja.’ (1 Tim. 6:18) Jesus mape ya wa muna kutja Jehova kaa horeke oviṋa indu tjaa ungura pu na ye. Indu Jehova “tja zika evaverwa,” Jesus ‘opa ri’ nu aa yenene okurihongera ku ye. (Omiano 8:27) Kombunda Jesus omuini wa yenena okuraera ovahongewa ve ‘omambo aehe nga zuva’ mu Ihe. (Joh. 15:15) Eṱe matu yenene okuhorera ku Jehova indu tji matu raere ovakambure ovakwetu imbi mbi matu tjiwa. Omuungure wa pamwe omuwa ka vanga okuhonaparera po varwe mokuhina okuveraera oviṋa mbi mave sokutjiwa poo mbi mavi ve vatere. Eye u kara nondjoroka okuraera varwe oviṋa oviwa mbye rihonga.

Eṱe wina matu yenene okuhaṋasana omambo omatunduuze ku novaungure va pamwe na eṱe. Indu omundu tja munu ongondjero yetu netu tanga okuza komutima, hapo iho katjiṋa tji tji ṱuna komitima vyetu, are? Jesus aa yenene okutwa po oruveze okuraera ovaungure va pamwe na ye ouwa mbwa munu mu wo. (Sasaneka Mateus 25:19-23; Luk. 10:17-20.) Eye nandarire we ve raera kutja ‘mave tjiti oviṋa ovinene komeho’ vya imbi mbya tjita. (Joh. 14:12) Ongurova yokomurungu wonḓiro ye, eye wa tanga ovaapostele ve ovaṱakame nomambo nga: “Oweṋe mba aruhe mbu mwa kara po momarorero wandje.” (Luk. 22:28) Ripura nomuano omambo ngo mu ye ve yanḓiparisa nokuvehinga kutja ve ungure ovingi. Eṱe wina tji twa tanga ovaungure va pamwe na eṱe, mave kara nondjoroka nu mape ya ave vanga okuungura ovingi.

Omurumendu omukambure wena Kayode wa tja: “Omuungure omuwa ka hepa okurira ohomonena, posi yokutja u yorokisa varwe nu u tjita kutja oviungura vi rire ovipupu ku imba mbu mave ungura pu na ye.” Hapo oove omuungure wa pamwe otja ingo? Mo yenene okupura ovakambure ovakweṋu mbu mu ungura pamwe kutja owo ve noumune uṋe ohunga na ove. Ndoovazu varwe ve kara nondjoroka okuungura pu na ove tjimuna ovahongewa va Jesus tji va ri nondjoroka okuungura pu na ye, ove mo yenene okuhungira omambo womuapostele Paulus nga: “Matu vanga okurira ovaungurevapamwe venyando reṋu.”—2 Kor. 1:24.