Lebuh ba serega, Jesus belajar mayuh utai ari Apai iya ke ulih nulung iya gawa manah enggau orang bukai. Ketegal nya, iya ulih ngajar kitai chara gawa begulai enggau orang bukai. Baka ni kitai ulih nunda Jesus? Lebuh kitai beratika teladan iya, kitai ulih tetemuka tiga iti prinsip ti ulih nulung kitai gawa manah enggau orang bukai. Semua prinsip tu ulih nulung kitai beserakup agi enggau bala menyadi Kristian.

Orang ke ulih gawa manah enggau orang bukai patut baruh ati. Iya enda ngemaruhka orang ke sama gawa enggau iya, lalu iya enda nguji nunjukka diri manah agi ari sida. Jesus belajar baruh ati ari Apai iya. Taja pan semina Jehovah ke dikumbai Penempa, tang Jehovah deka orang bukai nemu pengawa ti udah digaga Anak Iya. Kitai ulih meda tu ari utai ke dipadah Jehovah: ‘Aram kitai ngaga mensia neladan gamal kitai empu.’ (P-kal. 1:26) Lebuh Jehovah madahka utai tu, Jesus tentu nemu Jehovah amat baruh ati.—Mas. 18:35.

Lebuh ba dunya, Jesus mega baruh ati. Lebuh orang muji pengawa ti udah digaga iya, Jesus meri puji nya ngagai Petara. (Mrk. 10:17, 18; Jhn. 7:15, 16) Jesus bebendar deka gawa enggau manah enggau bala murid iya. Ba Jesus sida  pangan iya, ukai ulun. (Jhn. 15:15) Iya indah masu kaki sida kena ngajar sida pasal pemaruh ati. (Jhn. 13:5, 12-14) Baka Jesus, kitai deka bebasaka orang ke sama gawa enggau kitai. Kitai deka ngenuluka sida, ukai semina berundingka diri empu aja. Lebuh kitai “ngayanka basa ngagai pangan diri,” kitai enda irau sapa ke deka dipuji ketegal pengawa ti manah. Enggau nya, kitai ulih nembuka mayuh agi pengawa.—Rom. 12:10.

Orang ke baruh ati ‘enggau naka ulih ngiga semua jaku lalau.’ (J-lam. 15:22) Enda ngira pemayuh peneleba sereta pengelandik ti dikembuan kitai, kitai patut ingat nadai seiku pan mensia ulih nemu semua utai. Indah Jesus mega madahka diri enda nemu sekeda utai. (Mat. 24:36) Jesus mega keran deka nemu runding sereta asai ati bala murid iya. (Mat. 16:13-16) Nya meh kebuah bala murid iya berasai nyamai begulai enggau iya. Sama mega, lebuh kitai enggau baruh ati ingat kitai enda nemu semua utai lalu sedia mendingka penemu orang bukai, kitai deka bisi kaul ti manah enggau sida sereta “mujur” ba nama-nama pengawa ke digaga.

Bala tuai gempuru ulih neladan Jesus lebuh sida begulai gawa enggau pangan diri. Sida patut sedar, roh kudus ulih meransang sebarang tuai gempuru madahka sekeda utai ti ulih nulung raban tuai gempuru ngaga pemutus ti manah ke eklisia. Lebuh sida baum, sida patut nentuka semua tuai gempuru ulih madahka penemu diri. Tu deka nulung sida ngaga pemutus ti mai penguntung ngagai bala menyadi ba eklisia.

Orang ke nyamai enggau gawa, berundingka sida ke gawa enggau iya. Iya sedia ngaga ubah sereta sanggup ningaka penemu orang bukai. Jesus bisi mayuh peluang meda Apai iya seruran berundingka orang bukai. Ambika chunto, taja pan mensia patut mati, tang Jehovah nganjung Jesus nebus mensia ari pemati.—Jhn. 3:16.

Jesus nemu maya ti ngena patut ngalahka diri. Bisi sekali, seiku indu orang Kanaan minta tulung ngagai Jesus. Tang maya nya, Jesus semina dianjung kena nulung orang Israel. Pengujung iya, Jesus nulung indu nya. (Mat. 15:22-28) Jesus mega nemu bala murid iya enda sempurna. Pengudah Peter nyangkal iya ba mua orang mayuh, Jesus sedia deka ngampunka iya. Udah nya, Jesus meri Peter tanggung pengawa ti berat. (Luk. 22:32; Jhn. 21:17; SKR. 2:14; 8:14-17; 10:44, 45) Teladan Jesus ngajar kitai, bisi maya  kitai patut ngalahka diri. Enggau nya, kitai nunjukka diri ‘berundingka orang bukai.’—Plp. 2:4.

Enti kitai berundingka orang bukai, nya deka nulung kitai sedia ngaga ubah lebuh gawa. Enggau nya, kitai ulih gawa enggau mayuh macham orang. Jesus begulai manah enggau semua orang. Ketegal nya, bala munsuh iya berasai kepapas lalu nuduh Jesus “bepangan enggau orang ke pengumpul chukai, enggau orang ke bedosa!” Tang kebendar iya sida tu ningaka pesan Jesus. (Mat. 11:19) Kati kitai ulih neladan Jesus begulai gawa enggau orang bukai taja pan sida bebida ari kitai? Peratika peneleba seiku menyadi lelaki ke benama Louis. Iya kala nyadi tuai ti ngabas sereta gawa ba Betel, lalu gawa enggau mayuh macham orang. Ku iya madah: “Gawa enggau bemacham orang nya sama baka nirika dinding ari bemacham jenis batu ti enda sama pemesai. Ketegal batu nya enda sama, mayuh pengawa ke patut digaga ngambika dinding nya ulih didirika enggau manah. Aku mega patut ngaga sekeda ubah ngambika ulih gawa manah enggau orang bukai, lalu nembuka pengawa ke diberi ngagai kami.” Nya ulah ti endang patut dipuji!

Ni maya kitai ulih ngayanka diri berundingka bala menyadi ba eklisia kitai? Kitai ulih ngereja nya maya kitai enggau raban nginjil. Ba raban nya, engka bisi apai, indai, anak tauka bujang dara. Bisi mega engka enda sama umur enggau kitai. Ulih kitai ngaga ubah tauka nitihka chara sida nginjil ngambika sida mega ulih gaga ati ba pengawa nginjil?

Orang ke nyamai enggau gawa, patut ‘sedia deka bekunsi.’ (1 Tim. 6:18) Lebuh gawa enggau Apai iya, Jesus ulih beratika Jehovah enda ngelalaika utai ti ditemu Iya. Lebuh Jehovah “ngengkahka langit,” Jesus “bisi dia” lalu ulih belajarka mayuh utai ari Iya. (J-lam. 8:27) Lebuh ba dunya, Jesus gaga ati bekunsi enggau bala murid iya “semua utai ti didinga” iya ari Apai iya. (Jhn. 15:15) Baka ni kitai ulih neladan Jehovah? Kitai ulih bekunsika utai ti dipelajarka kitai enggau bala menyadi Kristian. Orang ke nyamai enggau gawa enda ngelalaika sebarang utai tauka penerang laban takut penuduk iya deka diambi orang. Iya gaga ati bekunsika utai ke udah dipelajarka iya enggau orang bukai.

Kitai mega ulih meri jaku peransang ngagai sida ke sama gawa enggau kitai. Lebuh orang beterima kasih ke pengawa kitai, endaka nya ngasuh kitai gaga ati? Jesus muji pemanah ke bisi ba bala murid iya. (Bandingka Matthew 25:19-23; Luke 10:17-20.) Iya indah madah, sida deka ngereja “pengawa ti besai agi” ari iya. (Jhn. 14:12) Ba malam sebedau iya mati, Jesus muji bala rasul iya ke tetap ati. Ku Jesus: ‘Kita udah begulai enggau aku lebuh aku natka semua pemerinsa aku.’ (Luk. 22:28) Jaku Jesus tentu negu ati sida lalu meransang sida bebendar agi gawa! Nya alai, enti kitai muji bala menyadi ke gawa enggau kitai, sida mega deka gaga ati lalu gawa enggau manah agi.

Seiku menyadi lelaki ke benama Kayode madahka: “Orang ke nyamai enggau gawa, enda ibuh sempurna. Tang iya ulih ngasuh orang gaga ati sereta ngasuh pengawa nya senang agi dikereja.” Kati orang rindu gawa enggau nuan? Engka nuan ulih nanya runding bala menyadi Kristian bekaul enggau chara nuan gawa. Enti sida gaga ati gawa enggau nuan, baka bala murid Jesus ke gaga ati gawa enggau Jesus, nuan ulih nyebut utai ti sebaka enggau rasul Paul: ‘Kami bekereja enggau kita ke pengaga kita.’—2 Kor. 1:24.