Ta langi, nagigiammu ni Jesus i kualidad ira nga kawagan na tapenu mabbalin tu mapia nga katrabahu. Tapus ta kegga na ta davvun, nabbalin yayya tu makakkasta nga ehemplo turi ira ta nakatrabahu na. Kunnasi ittam mabenefisiowan tatun? Nu gigiammuattam tu mapia i ehemplo ni Jesus, mannammuattam i tallu nga prinsipio tapenu mabbalin ittam tu mapia nga katrabahu. Makoffun nittam danatun nga prinsipio tapenu egga i pattaradday tam bilang mawwaragi.

I tadday nga mapia nga katrabahu ay mapakalinno anna ari mappasikat ta katrabahu na ira. Kunnatun si Jesus. Nagigiammu na i kinapakalinno ta Yama na. Maski nu si Jehova laman i mepangngo nga magalan bilang Namaratu, kayà na nga mammuan na tanakuan i trabahu nga kingngua na Ana na. Masingattam yatun taw nga kinagi na Dios: “Kuatta i tolay segun ta imahe ta.” (Gen. 1:26) Siguradu nga inappresia ni Jesus yatun nga kinapakalinno ni Jehova.​—Sal. 18:35.

Mapakalinno gapa si Jesus ta kegga na ta davvun. Turi ta zinayoda yayya gafu ta nakua na ira, niyawa na yatun nga dayaw ta Dios. (Mar. 10:17, 18; Juan 7:15, 16) Kanayun gapa nga memammo i pakipattrabahu ni Jesus ta disipulos na ira anna kokkofun i pattratu na nira, ari tu doroban. (Juan 15:15) Binaggawan na paga lagu i takki da tapenu tudduan ira nga mappakalinno. (Juan 13:5, 12-14) Makasta gapa nakuan i pattratu tam ta katrabahu tam ira. Pagolluattam i pammakapianadda imbes tu i pammakapianattam. Mas aru gapa i metuppal tam nu ‘ikakua tam i kataggi-tadday’  anna ariattam agga-nono nu sinni i medayaw.​—Roma 12:10.

Ammu gapa na mapakalinno nga tolay nga “egga i metuppal gukaban na aru nga gumattabarang.” (Prov. 15:22) Maski nu ekspiriensadu ittam ngana onu malalaki ittam, daddammattam nakuan nga awan tu tolay nga ammu na i ngamin. Maski paga lagu si Jesus, nirekunnisi na nga egga ira i gannug nga arian na nga ammu. (Mat. 24:36) Interesadu gapa yayya nga ammuan i nononopan na imperfekto nga disipulos na. (Mat. 16:13-16) Yatun i rason nu ngatta komfortable danuri katrabahu na nga makavulu yayya. Kunnatun nakuan gapa ittam. Mapakalinno tam nakuan gapa anna daddammattam nga ariattam ammu i ngamin. Ginnattam gapa i makagi ira na tanakuan onu i suhestiodda tapenu mabbalin tu memammo i pakipattrabahu tam ta nira anna megafu tatun, “egga i metuppal” tam.

Mas nakuan nga parigan na elder ira i kinapakalinno ni Jesus nu makipattrabahu ira ta kataggi-tadday. Daddammadda nakuan nga awayya nga paguyuan na masanto nga espiritu i maski sinni nga elder tapenu makoffun ta nira ngamin nga makangngua tu mapia nga desision. Ta pammiriting da, matageno nakuan na kada elder nga awayya na lagapa nga kagian i opinion na. Nu kunnatun, makangngua ira tu desision nga pakabenefisiowan na interu nga kongregasion.

I mapia nga katrabahu ay rasonable ta pakipattrabahu na ta tanakuan. Sigga-paran yayya nga magadjust anna ari yayya nga mangipapilit. Aru i chansa ni Jesus nga maobserba nu kunnasi nga nipasingan na Yama na i pabbalin tu rasonable. Angngarigan na, maski nu mepangngo nga masentensian tu patay i totolay, zinog ni Jehova si Jesus tapenu mepaliag ira.​—Juan 3:16.

Egga ira i tiempo nga rasonable si Jesus megafu ta kawagan yatun onu mepangngo. Angngarigan na, inuffunan na i tadday nga babay nga taga-Canaan maski nu nedog yayya ta totolay na Israel. (Mat. 15:22-28) Rasonable gapa yayya ta ekspektan na ta disipulo na ira. Nilimag na madukko nga kofun na nga si Pedro nga kilala na yayya ngem sigga-paran lagapa yayya nga mamakoma. Turi kua, nitalo na kani Pedro i madammo ira nga responsibilidad. (Luc. 22:32; Juan 21:17; King. 2:14; 8:14-17; 10:44, 45) Manawag ta ehemplo ni Jesus nga mawag tu “masingan paray na ngamin nga rasonable” ittam.​—Fil. 4:5, NW.

Nu rasonable ittam, sigga-paran ittam gapa nga magadjust tapenu memammo i pakipattrabahu  tam ta nadduruma nga klase na totolay. Makasta i pinakilallang ni Jesus turi ira ta nakavulu na yari tu inakusan yayya na minappassil ira nga kumokkontra nisa nga “kofun [yayya] na gumattuki ira ta vugi anna karuan paga nga marakay nga totolay” nga nagginna ta mensahe na. (Mat. 11:19) Maparigattam kari gapa si Jesus nga makasta i pakikavulu anna pakipattrabahu na ta tanakuan? Kunnaw i kagian ni Louis nga nakatrabahu na i nadduruma nga klase na totolay ta passerbi na ta sirkito anna ta Bethel: “Kada makipattrabahu ngà ta kaparefù tu imperfekto nga totolay, ikumparà yatun ta tadday nga pader nga napadday gukaban na batu ira nga nadduruma i kadakal anna forma da. Ngem tapenu makapadday tu tunung nga pader, mawag tu egga ira i uliammu ta puestu na karuan nga batu. Kunnatun gapa i kukukuakku nu makipattrabahu ngà ta tanakuan. Memammo anna mabalimmi i trabahu nu sigga-paran ngà nga kuan i kawagan ira nga panguli.” Kakkasta yatun nga pagimamma!

Kunnasi tam mepasingan ta kongregasiottam nga rasonable ittam? Awayya tam nga kuan yatun ta field service group tam. Awayya na tu makipattrabahu ittam ta wawwaragi nga nadduruma i responsibilidad da ta familia onu nadduruma i edad da. Puede tam nga i-adjust i kapaspas tam nga mallayyagayya onu sigga-paran ittam nakuan nga purueban i forma na pallayyagayya nga kayà da tapenu mas ma-enjoy da gapa i ministerio.

I tadday nga mapia nga katrabahu ay ‘sigga-paran nga mangibillay.’ (1 Tim. 6:18) Ta pakipattrabahu ni Jesus ta Yama na, siguradu nga nasingan na nga ari tu itu i Yama na. Turi ta ‘niprepara ni Jehova i langi, egga tari si Jesus’ yari tu awayya na i makagigiammu kani Jehova. (Prov. 8:27) Turi kua, magayayya gapa nga nibillay ni Jesus ta disipulos na i ‘ngamin nga naginna na ta Yama na.’ (Juan 15:15) Maparigattam i ehemplo ni Jehova nu sigga-parattam nga ibillay ta wawwaragi tam i nagigiammu tam ira. I tadday nga mapia nga katrabahu ay ari na nga iyetu i informasion nga kawagan onu makoffun ta tanakuan tapenu laman mattalupaddian nga yayya laman i makannammu. Magayayya yayya nga ibillay ta nira i mapia ira nga nagigiammu na.

Awayya tam gapa nga mangibillay ta katrabahu tam tu uvovug ira nga mamagaram nira. Nu egga i makasingan ta makasta ira nga kukukuattam tapus ikagi da ta nittam i napafutuan nga pappabalo da, ari kari nga makasta i annagenappattam? Kinomendan ni Jesus i katrabahu na ira gafu ta mapia ira nga nasingan na nga kingngua da. (Ikumpara i Mateo 25:19-23; Lucas 10:17-20.) Kinagi na paga lagu ta nira nga ‘mas paga nga makapabbaw i kuadda’ anne ta nisa. (Juan 14:12) Ta gabi nige nga natay si Jesus, kinomendan na i matalo nga apostoles na. Kinagi na nira: “Nakitappaddiak-kamu niakan ta ngamin nga nipazziga-riga ku.” (Luc. 22:28) Siguradu nga natukkal i giffutuadda tatun ira nga kinagi na anna napaguyu ira nga mattrabahu! Kunnatun gapa i mesimmu nu komendattam i katrabahu tam ira. Mabbalin ira tu mas magayayya anna mas aru i metuppal da.

Kinagi ni Brother Kayode: “Ari tu mawag nga perfekto i tadday nga mapia nga katrabahu. Ngem nu makatrabahu yayya na tanakuan, mas magayayya ira anna matageno da nga mas alappaw i pattrabahu da.” Kunnatun ka kari nga klase na katrabahu? Makasta nu iyavu mu ta katrabahum ira nga Cristiano tapenu mammuammu nu anni i makagi da nikaw. Na-enjoy na disipulos ni Jesus i makipattrabahu ta nisa. Nu kunnatun gapa i matageno na katrabahum ira ta nikaw, mekagim i nakagi ni apostol Pablo: “Makipattrabahu ngà laman nikamu tapenu sikamu laggapa i mapagayaya.”​—2 Cor. 1:24.